Baş ağrıları müxtəlif yollarla baş verir və bunun bir çox səbəbləri ola bilər. Ancaq dörd əlamət ayrı-ayrılıqda baş verərsə, dərhal həkimə müraciət etməlisiniz. Rusiyalı həkim Aleksandr Myasnikov “Rossiya 1” telekanalında "Ən vacibi haqqında" verilişinin yeni buraxılışında onların hər biri haqqında danışıb.

Doktor Myasnikov vurğulayıb ki, baş ağrısına məhəl qoymamaq mümkün olmayanda “qırmızı bayraqlar” var. Həkim inkişaf edən insult, təhlükə yaradan aorta anevrizması və ya şiş prosesinin arxasında ola biləcək həyəcanverici simptomları sadalayıb.

1. Baş ağrısı sizi gecənin bir yarısı yuxudan oyadır

Gecələr ard-arda dəhşətli baş ağrısından oyanırsınızsa, bu, artıq ciddi bir siqnaldır.

2. Nevroloji dəyişikliklər nəticəsində baş ağrısı

Baş ağrısı nevroloji əlamətlərlə müşayiət olunarsa- nazolabial qıvrımın hamarlanması, barmaqların uyuşması, ağız küncünün sallanması, sözləri tələffüz edə bilməmə kimi hallar baş verərsə həkimə müraciət etməlisiniz.

3. Həyatımın ən pis baş ağrısı

Həkim bildirib ki, şiddətli bir baş ağrısı yaranıbsa,  “indiyə qədər keçirdiyim ən güclü baş ağrısıdır” deyirsinizsə həkimə müraciət etmək qaçınılmazdır.

4. Ağrı hərəkətlə güclənir

Baş ağrısı bədən mövqeyini dəyişdirərkən, öskürərkən, irəli əyildikdə güclənirsə, bu da həyəcanverici bir simptomdur.

Nubar Süleymanova, “İki sahil”