Dekabrın 23-də Tibbi Ərazi Bölmələrini İdarəetmə Birliyinin (TƏBİB) 2024-cü ilin yekunlarına və 2025-ci ilin planlarına dair mətbuat konfransı keçirilib.
Konfransda TƏBİB-in İcraçı direktoru Vüqar Qurbanov ətraflı təqdimatla çıxış edib. O, son illərdə Azərbaycanda səhiyyənin yeni inkişaf mərhələsini yaşadığını, Prezident İlham Əliyevin rəhbərliyi, Birinci-vitse prezident Mehriban xanım Əliyevanın xüsusi diqqəti ilə ölkədə ən müasir tələblərə cavab verən səhiyyə infrastrukturunun yaradıldığını, yeni xəstəxanaların tikildiyini, mövcud tibb ocaqlarının yenidən qurulduğunu bildirib.
Daha sonra Vüqar Qurbanov 2024-cü ilin yanvar-noyabr ayları ərzində TƏBİB və tabeli tibb müəssisələrinin fəaliyyətindən bəhs edib. O, 2024-cü ilin yanvar-noyabr ayları ərzində tibb müəssisələrinə 22.1 milyon müraciət qeydə alındığını, 76.8 milyon tibbi xidmət göstərildiyini bildirib: “2023-cü ilin müvafiq dövründə isə 20.3 milyon müraciət qeydə alınıb, 63.8 milyon tibbi xidmət göstərilmişdi. Belə ki, cari ildə müraciət sayında 9%, göstərilən tibbi xidmət sayında isə 20%-lik artım qeydə alınıb. Eyni zamanda, tabeliyimizdəki tibb müəssisələrinə gündəlik ortalama müraciət sayı cari ilin ötən dövrü ərzində 66 min, ötən ilin eyni dövründə isə bu rəqəm 60 min təşkil edib.
2024-cü ilin yanvar-noyabr ayları ərzində tibb müəssisələrimizdə 348 mindən çox cərrahi əməliyyat və prosedur icra olunub. 6 milyondan çox radioloji müayinə həyata keçirilib. Hesabat dövründə laborator xidmətlərin sayı 30.5 milyon olub ki, bu da keçən illə müqayisədə 34% artım deməkdir.
Cari ilin 11 ayı ərzində Respublika Təcili və Təxirəsalınmaz Tibbi Yardım Mərkəzinə 1,6 milyondan çox çağırış qeydə alınıb. Ən çox müraciət Bakı şəhəri üzrə olub, paytaxtda 11 ay ərzində 781 min 152 müraciət qeydə alınıb. Sumqayıt üzrə 132 min 711, Gəncə üzrə 93 min 536, Abşeron üzrə 34 min 46, Mingəçevir üzrə isə 38 min 357 çağırış qeydə alınıb.
Bakı üzrə olan çağırışlar əsasında 742 min 152 nəfərə yerində yardım olunub, 75 min 21 nəfər isə müxtəlif profilli tibb müəssisəslərinə hospitalizasiya olunub, müraciətlərin 39 minini əsassız çağırışlar təşkil edib. Ümumiyyətlə, Bakı üzrə gündəlik olaraq müraciətlərin sayı təxminən 2 200 – 2 300 arasında dəyişir”.
İcraçı direktor 2024-cü ildə əldə olunan uğurlardan da bəhs edib: “Ən böyük uğurlarımızdan biri kimi möhtərəm Prezidentimiz cənab İlham Əliyevin birbaşa dəstəyi ilə Yeni Klinikanın “Sana Hospital” brendindən istifadə hüququ əldə etməsini qeyd etməliyəm. Bundan əlavə, yüksək nailiyyətlərimizdən biri Cənubi Qafqazda ilk dəfə olaraq TƏBİB-in tabeliyində fəaliyyət göstərən Yeni Klinika üçün beynəlxalq nüfuza malik HIMSS təşkilatının EMRAM 6 akkreditasiya sertifikatının əldə edilməsi idi. Beynəlxalq müstəvidə uğurlarımızdan digəri TƏBİB tabeli tibb müəssisələrinin Ümumdünya İnsultla Mübarizə Təşkilatının (World Stroke Organization) sertifikasiyasından keçirilməsi prosesi ilə əlaqədar müvafiq işlərə başlanılmasıdır. “Donor orqanların götürülməsi, hazırlanması, saxlanması, daşınması, idxalı və ixracını həyata keçirən tibb müəssisələrinin siyahısı” və eləcə də “Donor orqanların transplantasiyasını həyata keçirən ixtisaslaşdırılmış tibb müəssisələrinin siyahısı”na TƏBİB-in tabeli tibb müəssisəsi olan Yeni Klinikanın əlavə edilməsi də önəmli hadisələrdən biridir”.
Vüqar Qurbanov 2024-cü ildə bir çox dövlət və qeyri-dövlət müəssisələri, qurum və təşkilatları ilə TƏBİB arasında əməkdaşlığa dair memorandumların imzalandığını, həmçinin xarici ölkələrlə əməkdaşlıq sahəsində bir çox işlərin görüldüyünü diqqətə çatdırıb. O, hazırda 3315 sayda tibbi xidmətin əhaliyə ödənişsiz əsaslarla göstərildiyini deyərək, bu xidmətlərin 90 faizdən çoxunun TƏBİB-in tabeliyində olan tibb müəssisələrində icra idilməsinin mümkünlüyünü də söyləyib: “TƏBİB-in tabeliyində olan tibb müəssisələrində icbari tibbi sığorta hesabına sığortaolunanlara Xidmətlər Zərfi çərçivəsində göstərilən tibbi xidmətlərin ümumi məbləği 2023-cü ilin 11 ayı üzrə 572 milyon 710 min 547 manat təşkil etdiyi halda, 2024-cü ilin müvafiq dövründə bu rəqəm 809 milyon 724 min 452 manat təşkil etməklə, ümumilikdə 42% artım izlənilib.
Müxtəlif sahələrdə çalışan, işə daxil olarkən və sonradan dövri tibbi müayinədən keçməsi tələb olunan obliqat qruplarla bağlı 246 xidmət paketi formalaşdırılıb və tarifləri təsdiq edilib. Beləliklə, icbari tibbi müayinələrin tələb olunduğu işlərdə və zərərli amillərlə işləyənlərin bütün müayinələri tam əhatə olunub.
“Tibbi sığorta haqqında” Azərbaycan Respublikasının Qanununa əsasən sığortalı hesab edilməyənlər üçün göstərilən tibbi xidmətlərə də müvafiq əlavələr edilib və hazırda 4 931 sayda tibbi xidmət və tarifləri təsdiqlənib”.
Vüqar Qurbanov səhiyyə sahəsində yeniliklər, müasir yanaşmalar, innovasiyaların TƏBİB tabeli tibb müəssisələrinin fəaliyyətində tətbiqindən də bəhs edib. Canlı növbələrin elektronlaşdırılmasının, onlayn növbə xidmətinin istifadəyə başlanmasının, sürücülüyə yararlı olmaq barədə tibbi arayışın, sağlamlıq haqqında tibbi arayışın elektronlaşdırılmasının da cari ildə rəqəmsallaşma ilə bağlı həyata keçirilən layihələrdən olduğunu deyib: “Artıq 100 mindən çox sürücülüyə yararlı olmaq barədə tibbi arayış, 250 minə yaxın sağlamlıq haqqında arayış elektron formatda təqdim edilib. İşə qəbul prosesinin vahid platforma üzərindən həyata keçirilməsi məqsədilə İşə qəbul modulu qurulub, mərkəzləşmiş bir sistem yaradılıb. Bundan əlavə, Prezident İlham Əliyevun "Müddətli həqiqi hərbi xidmətə çağırılan vətəndaşların tibbi şəhadətləndirilməsi sahəsində fəaliyyətin təkmilləşdirilməsi ilə bağlı bəzi tədbirlər haqqında" Fərmanının icrası ilə əlaqədar, çağırışçıların yekun tibbi qiymətləndirilməsi işləri üzrə proseslərin idarə edilməsi üçün müvafiq altsistem qurulub. İnstrumental müayinəyə dair şəkillərin bir bazada toplanması və əlçatanlığın təmin edilməsi üçün Mərkəzi PACS sistemi qurulub. Həmin sistemə hazırda 16 tibb müəssisəsinin bütün müvafiq tibbi avadanlıqları inteqrasiya edilib. Hazırda sistemdə 400 minə yaxın pasiyentin məlumatları yerləşdirilib.
E-tabib Xəstəxana İdarəetmə Sisteminin, İT infrastrukturun təkmilləşdirilməsi və İnformasiya təhlükəsizliyinin gücləndirilməsi ilə bağlı da uğurlu addımlar atılıb. Xəstəxana İdarəetmə Sisteminin mobil versiyası da hazırlanıb. Həmin sistemin 2025-ci ilin birinci rübündən başlayaraq tətbiq edilməsi planlaşdırılır”.
İcraçı direktor cari il ərzində tibbi xidmətlərin təmin olunması istiqamətində atılan addımlardan da bəhs edib. “2024-cü ilin avqust ayında Goranboy Rayon Mərkəzi Xəstəxanasında 10 cihazlıq Hemodializ şöbəsi istifadəyə verilib. Mərkəzdə ayda orta hesabla təqribən 60-dan çox xəstəyə dializ xidməti göstərilir. Gələn il isə Sumqayıt Tibb Mərkəzində 10 aparatlıq 2-ci hemodializ şöbəsi fəaliyyətə başlayacaq. Ümumiyyətlə, hazırda ölkədə işlək vəziyyətdə olan hemodializ aparatlarının sayı 723 ədəddir. Ölkə üzrə hemodializ şöbələrinin sayı isə 54-dür. Ölkə üzrə 4 mindən artıq xəstəyə xidmət göstərilir.
Cari ildə Respublika Klinik Xəstəxanası, Yeni Klinika, Nizami Tibb Mərkəzi, Quba, Abşeron və Qəbələ rayon mərkəzi xəstəxanalarında endoprotezləşdirmə əməliyyatlarının icrası təmin edilib. Hazırda bu müəssisələrlə yanaşı, Mərkəzi Neftçilər Xəstəxanası, Kliniki Tibbi Mərkəz, Gəncə Birləşmiş Şəhər Xəstəxanası, Sumqayıt Tibb Mərkəzi, Qusar, Şirvan və Zaqatala rayon mərkəzi xəstəxanaları da daxili olmaqla 13 tibb müəssisəsində mürəkkəb travmatoloji və endoprotezləşdirmə əməliyyatları uğurla icra olunur. 2024-cü il ərzində ümumilikdə 772 endoprotez əməliyyatı həyata keçirilib. Bu il Nizami Tibb Mərkəzində, Qobustan Rayon Mərkəzi Xəstəxanasında oftalmologiya şöbəsi yaradılıb, oftalmoloji cərrahi əməliyyatların icrasına başlanılıb. Həmçinin hazırda Respublika Klinik Xəstəxanasında, Mərkəzi Neftçilər Xəstəxanası, Yeni Klinikada, Sabunçu, Sumqayıt tibb mərkəzlərində, Füzuli, Ağdam rayon mərkəzi xəstəxanalarında oftalmoloji cərrahi əməliyyatlar icra olunur və hesabat dövündə 24 min 284 oftolmoloji əməliyyat icra olunub.
Stasionar müraciətlərin sayının artması ilə əlaqədar Zaqatala Rayon Mərkəzi Xəstəxanasının Cərrahiyyə, pediatriya və infeksion xəstəliklər şöbəsinin çarpayı fondu artırılıb. Xəstəxanalarda tibbi xidmətin keyfiyyətinin artırılması məqsədilə Şamaxı və Zaqatala rayon mərkəzi xəstəxanalarının yeni bina tikintisi ilə bağlı layihələrə də müvafiq rəylər hazırlanıb. “Məhəmmədi modul tipli xəstəxana”da “Sabunçu Tibb Mərkəzi” publik hüquqi şəxsin I Anesteziologiya-reanimasiya və intensiv terapiya şöbəsinin (Terapevtik reanimasiya) 40 çarpayılıq İntensiv terapiya bölməsi yaradılıb. Hövsan Sağlamlıq Mərkəzi, Çilov Ailə Sağlamlıq Mərkəzi, Yevlax Rayon Mərkəzi Xəstəxanasının strukturunda 7 həkim məntəqəsi yaradılıb”.
V.Qurbanov mətbuat konfransında işğaldan azad olunan rayonlarda tibbi xidmətlərin təşkili sahəsində görülən işlərdən də bəhs edib, Qubadlı və Cəbrayıl modul tipli xəstəxanaların layihələndirilməsinə start verildiyini diqqətə çatdırıb: “İşğaldan azad olunmuş ərazilərdə ilkin səhiyyə xidmətinin təşkili üçün baş plan hazırlanıb, 81 kənddə, 8 qəsəbə və 8 şəhərdə ilkin səhiyyə müəssisələrinin dəqiqləşdirilmiş dislokasiyaları və eskiz layihələri Səhiyyə Nazirliyinin tikinti üzrə mütəxəssisləri ilə birlikdə hazırlanaraq Nazirliyin Tikilməkdə Olan Müəssisələrin Müdiriyyəti İdarəsinə təqdim edilib. Hazırda işğaldan azad edilən torpaqlarımızda Ağalı, Hadrut, Cəbrayıl, Laçın, Talış, Füzuli, Xocalı ASM, Şuşa, Zəngilan, Ağdam modul, Ağdərə xəstəxanası, Xankəndi poliklinikası fəaliyyət göstərir. Böyük Qayıdış Proqramı çərçivəsində Qaçqınların və Məcburi Köçkünlərin işləri üzrə Dövlət Komitəsi tərəfindən təqdim olunan siyahı əsasında 2022-2024-cü illər ərzində ümumilikdə 6561 sakinin tibbi müayinələrdən keçirilməsi təmin edilib. 2024-cü ilin yanvarından bugünədək isə 819 ailənin, 3100 sakinin tibbi müayinələrədən keçirilməsi icra olunub”.
TƏBİB-in İcraçı direktoru qazilərin və şəhid ailə üzvlərinin tibbi xidmətlərlə təmin olunması istiqamətinə də xüsusi həssaslıqla yanaşıldığını vurğulayıb: “Cari ilin 11 ayı ərzində 10 min 284 qazimizin 87 min 757 müraciətinə uyğun olaraq 251 min 82 tibbi xidmət göstərilib. Şəhidlərimizin ailə üzvlərindən 6 min 43 vətəndaşın 46 min 526 müraciətinə uyğun olaraq 161 min 901 tibbi xidmət göstərilib. Bundan başqa, “Əlilliyin qiymətləndirilməsi məqsədilə tibbi-sosial ekspertiza müayinəsinə göndərişlərin verilməsi Qaydası”na əsasən tibbi-sosial ekspertiza müayinəsinə göndəriş vermək hüququ saxlanılan Həkim Məsləhət Komissiyalarının yekun siyahısı hazırlanıb və həmin siyahıya əsasən göndəriş vermək hüququ saxlanılan TƏBİB tabeli tibb müəssisələrinin sayı 24-ə çatdırılıb. 2024-cü il ərzində əlilliyin qiymətləndirilməsi məqsədi ilə tibb müəssisələri tərəfindən 61 min 260 nəfərə göndəriş rəsmiləşdirilib və Tibbi-Sosial Ekspert Komissiyasına göndərilib. Səfərbərlik və Hərbi Xidmətə Çağırış üzrə Dövlət Xidməti ilə TƏBİB arasında Xaçmaz, Qusar, Quba, Şabran və Siyəzən rayonlarının inzibati əraziləri üzrə ilkin hərbi qeydiyyata alınan, hərbi xidmətə çağırılan və ehtiyatda olan vətəndaşların tibbi müayinəsinə dair pilot layihəyə başlanılıb”.
Vüqar Qurbanov TƏBİB-in 2 701 tabeli tibb müəssisəsində 93 min 64 işçinin çalışdığını, 2024-cü il ərzində də peşəkar kadrların TƏBİB ailəsinin sıralarına qoşulması üçün işlərin aparıldığını bildirib:“Bu il 21 müəssisənin ümumi ştat və strukturu dəyişilib. İl ərzində “Respublika Təcili və Təxirəsalınmaz Tibbi Yardım Mərkəzi” publik hüquqi şəxs üzrə birləşdirmə prosesi uğurla aparılaraq yekunlaşdırılıb. Yeni yaradılan Respublika Pediatriya Mərkəzi, Ağciyər Xəstəlikləri Mərkəzi, “Rəqəmsal Tibbi Həllər” MMC və İnnovasiya və Təchizat Mərkəzinin ştat və strukturu formalaşdırılıb. Təhvil alınan Dəmir Yol Xəstəxanasının işçilərinin tabeli tibb müəssisələrində işlə təmin edilmə prosesi müvəffəqiyyətlə yekunlaşdırılıb”.
İcraçı direktor cari il ərzində Klinik Tibbi Mərkəzin 2 əsas korpusunun əsaslı təmir layihələndirilməsi üzrə tender prosesinə, Respublika Klinik Xəstəxanasının isə tam əsaslı təmir işlərinə başlanıldığını, Nərimanov Tibb Mərkəzinin yenidən qurulmasının həyata keçirildiyini vurğulayıb.
O, çıxışında tibbi xidmətlərin inkişafında, keyfiyyətli tibbi xidmətlərin təşkilində vətəndaşların şikayətlərinin araşdırılmasına da daim xüsusi diqqət göstərildiyini söyləyib: “2024-cü ildə TƏBİB-ə daxil olan vətəndaş müraciətlərinin sayı və onların strukturlaşmış şəkildə cavablandırılması, həmçinin minnətdarlıq məktubları və təşəkkür zənglərinin artımı müşahidə edilib. 2024-cü ilin yanvar-noyabr ayları ərzində TƏBİB-ə Elektron Sənəd Dövriyyəsi sistemi üzərindən və kağız daşıyıcıda ümumilikdə 24 min 265 vətəndaş müraciəti (birbaşa vətəndaşlardan və təşkilatlardan vətəndaşla bağlı) daxil olub. Bu müraciətlərdən 13 min 120-si ərizə, 11 min 117-si şikayət, 28-i isə təklif olub. TƏBİB-in rəsmi elektron poçt ünvanına isə 23 min 247 müraciət daxil olub. 2024-cü ilin 11 ayı ərzində TƏBİB-də 5 561 vətəndaşın qəbul edilməsi təmin edilib. Çağrı xidməti şöbəsinə daxil olan müraciətlərin sayı isə 101 min 853 olub”.
Mətbuat konfransında TƏBİB-in İcraçı direktoru il ərzində ictimaiyyətlə əlaqələr və kommunikasiya sahəsində görülən işlərdən də bəhs edib. O, səhiyyə sahəsində görülən işləri doğru və ətraflı şəkildə vətəndaşlara çatdırdıqları üçün media nümayəndələrinə təşəkkür edib.
Yaqut Ağaşahqızı, "İki sahil"
