Cənubi Koreyanın enerji sektoru üçün əhəmiyyətli bir inkişaf olaraq, ölkənin Ticarət, Sənaye və Energetika Nazirliyi fevralın 2-də açıqlayıb ki, “Actegeo” Amerika resurs kəşfiyyatı şirkətinin son hesabatına görə Şərq dənizinin dərin sularında 5,17 milyard barrelə qədər qaz və neft aşkar edilib. Bu kəşf təsdiq olunduğu təqdirdə Ulleung hövzəsinin təxmin edilən ehtiyatları 14 milyard bareldən 19,17 milyard barrelə qədər arta bilər ki, bu da ölkənin enerji müstəqilliyi səylərində potensial dönüş nöqtəsinə işarə edir.
“Daxili Ulleung Hövzəsinin Əlavə Perspektivlik Qiymətləndirməsi” adlı hesabat ötən ilin sonunda Koreya Milli Neft Korporasiyasına (KNOC) təqdim edilib. Bu, daha əvvəl elan edilmiş yeddi strukturdan başqa 14 əlavə perspektivli strukturun mövcudluğunu təsdiqləyir. Ən böyük strukturun "Goblin Shark" olduğu və maksimum 1,29 milyard barel tutacağı təxmin edilir. Kəşfiyyatın müvəffəqiyyət nisbətinin əvvəllər kəşf edilmiş "Mavi Balina" strukturuna bənzər-təxminən 20% olduğu bildirilir.
Hökumət “Actegeo”nun hesabatının məzmununu yoxlamaq üçün dərhal ekspertlər qrupu toplayıb. "Bizim keçən ildən təcrübəmiz olduğundan, bu yoxlama prosesinin daha qısa olacağı gözlənilir”, -deyə hökumət rəsmisi qeyd edib.
Hesabat Cənubi Koreyanın ərazi suları daxilində istifadə olunmamış ehtiyatların potensialını vurğulayaraq Şərq dənizinin dərin sularının istifadə olunmamış geoloji məlumatlarına əsaslanır. Bununla belə, qeyd etmək vacibdir ki, hesablanmış ehtiyatlar gələcək yoxlama və qazma nəticələrindən asılı olaraq dəyişə bilər. Çünki hesabat yalnız faktiki qazma aparılmadan olan kəşfiyyat məlumatlarına əsaslanır.
Bu kəşf enerji idxalından çox asılı olan Cənubi Koreya üçün əhəmiyyətli nəticələrə malikdir. Daxili ehtiyatların potensial artımı enerji təhlükəsizliyini gücləndirə və iqtisadi siyasətlərə təsir göstərə bilər. Koreya yarımadası, Rusiya və Yaponiya ilə həmsərhəd olan Şərq dənizinin strateji yerləşməsi kəşfə geosiyasi əhəmiyyət qatır və regional dinamikaya və beynəlxalq enerji bazarlarına potensial təsir göstərir.
Nubar Süleymanova, “İki sahil”
