Lerik rayonun Orand kəndində dünyaya göz açan Natiq Balamirzə oğlu Mirhüseynov 44 günlük haqq savaşımızda özünü Vətənə fəda etməklə əbədi bir ulduzlu həyat qazandı. Özü cismən aramızda olmasa da, təkcə adı çəkiləndə bütün Azərbaycan onunla fəxr edir. Bütöv bir xalqın qəhrəmanlıq simvolunu adında yaşadan Natiqin keçdiyi qısa, olduqca şərəfli həyat yolu qərinələr boyunca gələcək nəsillərə də örnək olacaqdır...
Doğma Azərbaycanının daşına, hər qarış torpağına ürəkdən bağlanan Natiq Balamirzə oğlu həqiqi xidmət zamanı onu göz bəbəyi kimi qoruyur, əsgəri borcunu ləyaqətlə yerinə yetirir. Bundan sonra da, canına yağı dadanmış Vətənin taleyi onu narahat edir. Nəticədə yenidən ordu sıralarına üz tutmalı olur. Hərbi Polis sıralarında gizir rütbəsində xidmət etməklə bərabər, yağıdan qisas alacağı günü gözləyir. Nəhayət, Natiq istəyinə çatır. 2020-ci il sentyabrın 27-də başlayan İkinci Qarabağ müharibəsinin ilk günündən 30 il düşmənə əsir olan Vətən torpaqlarının azad olunması uğrunda savaşa girir. Və Vətən, torpaq sevgisi onu atıldığı döyüşlərdən zəfərlə çıxardır. Cəbrayıl, Füzuli və Xocavənd rayonlarda xüsusi rəşadət göstərməklə düşmənə ürəyincə qan uddurur, onlarla canlı qüvvəsini, neçə-neçə hərbi texnikasını məhv edir. 44 gün müharibə meydanında yağıya qarşı vuruşmaqla ən böyük arzusuna çatır. Düşmən məğlub olub, noyabrın 8-də üçrəngli qələbə bayrağımız Şuşada dalğalanır. Təəssüf ki, qəhrəman döyüşçü Vətən müharibəsindən sonra 2021-ci il yanvarın 30-da işğaldan azad edilmiş ərazilərdə xidməti vəzifələrini yerinə yetirərkən qəfil atılan xain gülləsinə tuş gəlir və Vətən eşqli qəlbi əbədi dayanır. Milyonların ürəyinə köçən igid dağlar qartalı gizir Natiq Balamirzə oğlu dövlət tərəfindən "Azərbaycan Bayrağı" ordeninə, "İgidliyə görə", "Vətən uğrunda" və digər medallara layiq görülür.
Leriklilər Azərbaycan xalqının tarixinə qeyrət, hünər, şərəf səhifəsi kimi yazılan 44 günlük haqq savaşımızın ölümsüzlüyə qovuşan qəhrəmanların xatirəsini hər zaman əziz tuturlar. Natiq Balamirzə oğlu da belə. Anım günündə rayon rəsmiləri, ictimaiyyət nümayəndələri, şəhidin ailə üzvləri, müharibə iştirakçıları, məktəblilər qəhrəman Vətən sevdalısına ehtiram əlaməti olaraq məzarını ziyarət edib ,önünə gül çiçək dəstələri düzdülər. Həmçinin onu da bildirdilər ki, Natiq öz halal torpağı və Vətənin müdafiəsi uğrunda canından keçərək şəhidlik zirvəsinə ucalıb. Bəşər övladı üçün bu böyük şərəf və qürurdur. Çünki şəhid adını qazananlar heç zaman ölmürlər. Onlar vətənləşib əbədi bir ömür yaşayırlar.
Zəfər Orucoğlu,
Azərbaycan Jurnalistlər Birliyinin üzvü
