Xəbər verildiyi kimi, ABŞ Beynəlxalq İnkişaf Agentliyi (USAID) dünyada çeşidli çirkli prosesləri idarə edib. Məsələn, milyonlarla insanın ölümünə səbəb olan COVID-19 da daxil olmaqla bioloji silah tədqiqatlarını, həmçinin heroin istehsalını maliyyələşdirməsi ilə məşğul olan bu qurum Əfqanıstanda irriqasiya kanallarının yaradılması və gübrənin alınmasında fəallıq göstərib. (Bu sistemin narkotik istehsalında daha çox istifadə edildiyi bildirilir). Eyni zamanda USAID İrlandiyada LGBT myuzikl və Serbiyada inklüzivliyin irəlilədilməsinə, Qvatemalada cinsin dəyişdirilməsinə və LGBT fəallığına, İnkişaf etməkdə olan ölkələrdə personallaşdırılmış kontraseptivlərin maliyyələşdirilməsinə və s. bu kimi çirkin işlərə milyonlarla dollar vəsait ayırıb. Bəzi məlumatlara görə, USAID ilə bağlı təsəvvürümüzə belə gətirə bilmədiyimiz məlumatların da ortaya çıxacağı gözlənilir.

Şübhəsiz, bütün bunlar USAID-in rəsmi missiyası ilə reallıq arasında fərqləri ortaya qoyur. Bu məqamda USAID-in fırıldaqçılıqla məşğul olduğuna diqqət çəkən, onun bağlanmasının vacibliyini bildirən Trampın fevralın 8-də Ağ evdə Yaponiyanın Baş naziri Sigeru İşiba ilə görüşündə jurnalistlərin suallarını cavablandırarkən söylədiyi bu sözləri xatırlamaq yerinə düşər: “Onun büdcəsinin hər bəndinə baxdığım zaman ya korrupsiya görürəm, ya da gülünc bir şey”. Yeri gəlmişkən qeyd edək ki, bütün bunlar Bayden administrasiyası dövrünə və Sorosun dəstəyi ilə karyera quran ermənipərəst Samanta Pauerin bu quruma rəhbərlik etdiyi dönəmə təsadüf edir.

Geniş maliyyə imkanlarından istifadə etməklə “humanitar yardım” adı ilə müxtəlif dövlətlərin daxili işlərinə qarışan, həmin ölkələrdəki vəziyyəti öz istəyinə uyğunlaşdıran USAID dünya üzrə 707 media qurumu, 6200 jurnalist və jurnalistika sahəsində fəaliyyət göstərən 279 qeyri-hökumət təşkilatını da maliyyələşdirib. Bu isə o deməkdir ki, yerli mediaya və QHT-lərə təsir imkanlarının genişləndirilməsi müharibələrin, antidemokratiyanın, korrupsiyanın beşiyi olan USAID-in əsas funksiyalarından biri olub. Daha doğrusu, təşkilat, ölkələr daxilində xaos yaradan media orqanları və QHT-lərə sözün həqiqi mənasında sponsorluq edib. 

Buradan bir daha belə qənaətə gəlmək olar ki, ölkəmizə qarşı aparılan çirkin kampaniyaların arxasında məhz USAID dayanıb. Başqa sözlə desək, 2012-ci ildə “Eurovision” mahnı müsabiqəsi, 2015-ci ildə keçirilən ilk Avropa Oyunları da daxil olmaqla, həmçinin 44 günlük Vətən müharibəsi vaxtı, Laçın yolunda ekoloqların aksiyaları, COP29 dövründə beynəlxalq mediada ölkəmizə qarşı aparılan çirkin kampaniyalar USAID-ın “canfəşanlığının məhsulu” olub. Bir məsələni də xatırladaq ki, 30 ildən çox Azərbaycan torpaqlarının işğalına göz yuman, sülh təşəbbüsü ilə çıxış etməyən USAID heç vaxt torpaqlarımızın işğalına dair bəyanat yaymayıb, qaçqınların problemlərinin həllinə dəstək verməyib. Əksinə, həmişə dövlətimizə qarşı kampaniya aparıb və ermənilərin müdafiəsinə qalxıb. Bir sözlə, USAID ölkəmizdə siyasi hakimiyyətə qarşı təzyiq vasitəsi kimi istifadə etmək üçün öz şəbəkəsini formalaşdırmağa çalışıb. Yeri gəlmişkən, bu təşkilat “Abzas Media”nı, “Meydan TV”ni, “Toplum TV”nı öz təsir dairəsinə salmışdı. Amma hüquq-mühafizə orqanları bu şəbəkənin qanunsuzluğunu vaxtında ifşa etməyi bacardı. 

Prezident İlham Əliyev hələ ötən ilin dekab ayında “Rossiya Seqodnya" Beynəlxalq İnformasiya Agentliyinin Baş direktoru Dmitri Kiselyova verdiyi müsahibədə ABŞ-ın Beynəlxalq İnkişaf Agentliyindən (USAID) söz açarkən demişdi ki, Tramp onu qadağan edə bilər. Dövlət başçımızın uzaqgörənliklə söylədiyi bu fikir artıq öz yerini tutmaqdadır.

Qvami Məhəbbətoğlu, “İki sahil”