Yaxşı və sağlam yuxu insan orqanizminin bütün sistemləri üçün lazımdır. Gecələr istirahət edə bilmirsinizsə, nə etməlisiniz? Bu barədə rusiyalı somnoloq Roman Buzunov “Rossiya” telekanalında danışıb.

Alimlər sübut ediblər ki, insan yatarkən beyin demensiya, Alzeymer və digər neyrodegenerativ xəstəliklərin inkişafına təsir edən zəhərli zülallardan təmizlənir. Fasiləli gecə yuxusu bu xəstəliklərin inkişafına, eləcə də bir sıra digər mənfi sağlamlıq nəticələrinə görə təhlükəlidir. Gecənin ortasında tez-tez yuxudan oyanmağın aydın olmayan səbəbləri ola bilər.

Gün ərzində həddindən artıq məlumat və stress

Yuxu zamanı beyin bir insanın gün ərzində qarşılaşdığı məlumatları emal edir. Əgər çoxdursa, o, öhdəsindən gələ bilmir, daha çox kortizol ifraz olunur və insan oyanır. Rusiyalı tibb elmləri doktoru Roman Buzunov gündəlik iş prosesinə müntəzəm və tez-tez fasilələr daxil etməyi tövsiyə edir - hər saatda ən azı 10 dəqiqə. Bu, beyninizin boşalmasına imkan verəcək və axşama qədər özünüzü daha az yorğun hiss edəcəksiniz.

Fərqli saatlarda oyanmaq

Həftə sonları daha çox yatmaq gözəldir, amma sağlamlığınız üçün pisdir. Hər gün eyni vaxtda yataqdan qalxmaq və yatmaq faydalıdır. Həkimlər təkid edirlər ki, bədənimizin daimi sağlam gündəlik rejimə ehtiyacı var. Onlar həftə sonları iş günləri ilə müqayisədə iki saatdan gec olmayaraq durmağı məsləhət görürlər.

Bədəndə dəmir çatışmazlığı

Yuxusuzluq dəmir çatışmazlığından yaranır. Dəmir bədəndə bir çox həyati proseslərdə iştirak edir. Xüsusilə motor fəaliyyətini və narahat ayaq sindromunu tənzimləyən dopaminin sintezi üçün lazımdır ki, bu da özlüyündə gecə qəfil oyanmaların səbəbi ola bilər.

Fiziki fəaliyyətin olmaması

Oturaq iş və oturaq həyat tərzi gecələr yuxu və istirahətin keyfiyyətinə mənfi təsir göstərir. Həkimlər həftədə dörd dəfə, ideal olaraq bir saat fiziki məşqlər etməyi məsləhət görürlər. Araşdırmalara görə, stress, narahatlıq, depressiya və yuxusuzluğun müalicəsində müntəzəm fiziki fəaliyyət dərman müalicəsi və psixoterapiyadan daha təsirli olur.

Nubar Süleymanova, “İki sahil”