Türkiyənin zəlzələ bölgəsində bərpa və quruculuq işlərinə töhfə məqsədilə nəzərdə tutulmuş 100 milyon ABŞ dollarının (170 milyon manat) qalan 70 milyon manatı 2024-cü ildə aidiyyəti üzrə ayrılıb.

“İki sahil” xəbər verir ki, bununla bağlı məlumat Nazirlər Kabinetinin 2024-cü ildəki fəaliyyəti haqqında hesabatında əks olunub.

Bildirilib ki, hesabat ilində Ukraynaya da humanitar yardım göstərilməsi davam etdirilib.

“Azərbaycan Prezidentinin müvafiq Sərəncamı ilə göndərilməsinə 2023-cü ildə başlanmış elektrik avadanlıqlarından ibarət yardımın (7,6 milyon ABŞ dollarn məbləğində) çatdırılması 2024-cü ildə tamamlanıb.

Beləliklə, elektrik avadanlıqlarından ibarət ümumilikdə 107 yük maşını Ukraynaya yola salınıb. Həmçinin Kiyevdə uşaq kitabxanasının sığınacağının təmiri üçün 30 min ABŞ dolları məbləğində maddi yardım göstərilib”, - məlumatda qeyd edilib.

Vurğulanıb ki, Azərbaycan tərəfindən bu günədək Ukraynaya göstərilmiş humanitar, eləcə də bərpa və yenidənqurma məqsədli yardımların məbləği təxminən 40 milyon ABŞ dollarından çox olub.

Bunlarla yanaşı, "Qarşısı alına bilən görmə qabiliyyətinin itirilməsi ilə mübarizə" (AFAB) kampaniyasının dəstəklənməsi məqsədilə İslam İnkişaf Bankına AIDA xətti ilə müvafiq maliyyə töhfəsi ayrılıb:

“AFAB layihəsinin həyata keçirilməsinə 2012-ci ildən başlayaraq Azərbaycan tərəfindən ümumilikdə 1,5 milyon ABŞ dollarından artıq maliyyə töhfəsi verilib. Ümumilikdə, kampaniya çərçivəsində indiyədək 575 mindən çox insan ödənişsiz əsasda göz müayinəsindən keçib və Burkino Faso, Çad va Qvineyada 33 tibbi məntəqə zəruri gözə qulluq avadanlıqları ilə təchiz edilib”.