Evinizi və bağçanızı bəzəmək üçün seçdiyiniz çiçəklər düşündüyünüz qədər məsum olmaya bilər. Gözəl görünüşü ilə insanları valeh edən bəzi bitkilər əslində ciddi sağlamlıq təhlükəsi yaradır.  "Nationalgeographic.com" yazır ki, Onların yarpaqlarına toxunmaq, hətta havada yaydığı maddələri udmaq belə zəhərlənməyə səbəb ola bilər. Bəs hansı bitkilərdən uzaq durmalısınız? 

Oleandr (Nerium oleander) – Ölümcül Gözəllik
Tez - tez rast gəlinən oleandr çiçəyi hər kəsi valeh edir. Ancaq bu bitkinin yarpaqları və çiçəkləri son dərəcə zəhərlidir. Bir neçə yarpaq belə ürək problemlərinə, qusmaya və hətta ölümə səbəb ola bilər.

Xanım Otu (Atropa belladonna) – Adı Gözəl, Təsiri Qorxunc
Xanım otunun meyvələri şirin görünə bilər, lakin onların yeyilməsi son dərəcə təhlükəlidir. Halüsinasiyalar, nəfəs darlığı və ürək dayanmasına səbəb olan bu bitki ən zəhərli növlərdən biridir.

Dəlibəng (Datura stramonium) – "Dəli Edən Bitki"
Bu bitkinin toxumları halüsinasiyalara, şüur itirməyə və ölümə səbəb ola bilər. Uşaqlar və ev heyvanları üçün xüsusilə təhlükəlidir.

Qurdboğan (Aconitum napellus) – Toxunmaq Belə Təhlükəlidir
Bu bitkinin tərkibində olan zəhər dəridən belə sorula bilər. Bir neçə saat ərzində ölümə səbəb olan qurdboğan tarixdə ovçular tərəfindən ox uclarına zəhər kimi istifadə olunub.

Mələk Şixməmmədova,
BSU-nun tələbəsi