Fransa parlamenti ölkənin üç ən böyük şəhərində - Paris, Lion və Marseldə bələdiyyə seçkiləri ilə bağlı islahatları təsdiqləyib.

“İki sahil” "Kommersant"a istinadla xəbər verir ki, Milli Assambleyanın 28 əleyhinə 112 səslə təsdiq etdiyi yeni qanun seçki sistemində köklü dəyişiklik təklif edir. İndi şəhərin meri rayon şuralarına seçkilərdən ayrı olaraq vahid ümumşəhər dairəsində seçiləcək.

İndiyədək seçicilər hər bir rayonda namizədlər siyahısına səs verirdilər və qaliblər həm rayon, həm də şəhər şurasında yer alırdılar. Bu o demək idi ki, uduzmuş siyahılar üçün verilən səslər qüvvələr balansının yekununda praktiki olaraq nəzərə alınmır.

İslahatın təşəbbüskarları israr edirlər ki, yeni sistem hər bir şəhər sakininin səsinə real çəki qaytaracaq: “bir parisli – bir səs, bir lionlu – bir səs, bir marselli – bir səs”.