30 il düşmən tapdağında olan Qarabağımızın  azadlığı uğrunda başlanan 44 günlük haqq savaşımızda minlərlə qeyrətli Vətən övladı öz canından keçdi. Masallıda boya-başa çatan  Xüsusi Təyinatlı Qüvvələrin giziri İntiqam Əsgərli də qorxmadan, çəkinmədən odun-alovun içinə girib  düşmənə qarşı son nəfəsinədək vuruşub qəhrəmancasına şəhidlik zirvəsinə ucaldı. Masallı camaatı torpağına, elinə-obasına sonsuz məhəbbət mücəssəməsinə dönən oğlunu ürəyində yaşatmaqla , onu özünə qürur, iftixar mənbəyi bilirlər. Burada kiçik də, böyük də  ölməzliyə qovuşan İntiqamı  hər yerdə, hər zaman böyük  sevgi və məhəbbətlə xatırlayır.

İgidliyi, rəşadəti ilə tarixin səhifəsində şərəfli yer tutan  İntiqam Əsgərli  ömrünün 35-ci ilinə çatdı. Masallı camaatı bu əziz günü yüksək səviyyədə qeyd etdi. Ehtiram əlaməti olaraq məzarı ziyarət olundu,  üstünə təzə güllər qoyuldu. Çıxışlar zamanı İntiqam Əsgərlinin keçdiyi  döyüş yoluna nəzər salındı, onun həyatının bütün gənclərə nümunə olduğunu bildirildi. Həmçinin  bu kimi tədbirlərin  böyük önəm daşıdığını, gələn nəslin əsl vətənpərvər böyüməsində mühüm rol oynadığı söylənildi.    

Xüsusi Təyinatlı Qüvvələrinin giziri, zəfər şəhidi İ. Əsgərli birinci öz gücünü  2016-cı ilin Aprel döyüşlərində erməni dığalarına göstərib. Vətən müharibəsi zamanı Şuşanın azadlığı uğrunda gedən döyüşlərdə böyük şücaət göstərib. Neçə-neçə savaşda  yağı düşmənə qan qusduran Vətən sevdalısı   9 noyabr 2020-ci ildə Şuşa istiqamətində döyüş tapşırığının yerinə yetirilməsi zamanı şəhid olub. İ. Əsgərli ölümündən sonra “Vətən Müharibəsi Qəhrəmanı” fəxri adına, “Cəsur döyüşçü”,  “Vətən uğrunda”, Şuşanın, Xocavəndin,  Kəlbəcərin azadlığına görə  medallarına layiq görülüb.

Qeyd edək ki, İntiqam Əsgərlinin qardaşı Nurlan Əsgərli 2016-cı ildə Talış kəndi istiqamətində döyüş tapşırığını yerinə yetirərkən şəhidlik zirvəsinə ucalıb. Hər iki qardaş cismən aramızda olmasa da, bütün Azərbaycan xalqı onlarla fəxr edir.

Zəfər Orucoğlu,
Azərbaycan Jurnalistlər Birliyinin üzvü