Prezident Donald Trampın administrasiyası ABŞ Konqresinə xaricə ayrılan 5 milyard dollarlıq humanitar yardımın ləğvi ilə bağlı sorğu göndərib.

“İki sahil” xəbər verir ki, bu barədə "New York Post" öz mənbələrinə istinadla məlumat yayıb.

Bildirilir ki, qərar indiyə qədər görünməmiş addəm adlanır, çünki bu vəsait artıq ABŞ Konqresi tərəfindən ayrılıb.

Konqresə göndərilən sənəddə maliyyənin kəsilməli oldiuğu proqramlar vurğulanır. O cümlədən, ukraynalı sənətçilərin dəstəklənməsi üçün ayrılan 1,5 milyon dolların ləğv edilməsi təklif edilir. Həmçinin ləğv edilməli olan yardımlar arasında sülhməramlı əməliyyatlar üçün 838 milyon dollar, o cümlədən Konqo Demokratik Respublikası və Mərkəzi Afrika Respublikasındakı BMT sülhməramlılarına dəstək, Hondurasda “iqlim davamlılığı” üçün tədbirlərin maliyyələşdirilməsinə 24,6 milyon dollar, demokratiyanın inkişafı üçün Cənubi Afrika fonduna, Demokratiya İşləri Fonduna 2,7 milyon dollar nəzərdə tutulmuşdu.

Tramp prezidentliyinin əvvəlindən mütəmadi olaraq beynəlxalq yardım tədbirlərini ləğv edib. O, faktiki olaraq USAID-i bağlayıb. ABŞ administrasiyası həmçinin yoxsul ölkələr üçün ərzaq proqramları, xəstəliklərlə mübarizə tədbirlərinin maliyyələşdirilməsi proqramları, təbii fəlakətlərin nəticələrinin aradan qaldırılması və s. daxil olmaqla milyard dollarlıq beynəlxalq yardım proqramlarını dəfələrlə ləğv edib.