Azərbaycan Dövlət Neft Şirkəti (SOCAR) hazırda ilkin kütləvi yerləşdirmə (Initial Public Offering – IPO) haqqında düşünmür.
“İki sahil” xəbər verir ki, bu barədə SOCAR-ın vitse-prezidenti Əfqan İsayev "Euronews"a müsahibəsində deyib.
"Lakin biz müəyyən aktivləri satırıq. Məsələn, keçən il biz "Şahdəniz" layihəsinin 5 %-ni enerji bazarının qlobal oyunçularından biri olan "MVM Energy" şirkətinə satdıq. İkinci misal SOCAR və "TotalEnergies"in səhmdarları olduğu "Abşeron" qaz yatağıdır. 2023-cü ildə "Total" və SOCAR səhmlərinin bir hissəsini Əbu Dabi Milli Neft Şirkətinə satıb", - o bildirib.
Aktivlərin alınması imkanlarından danışan SOCAR-ın vitse-prezidenti xatırladıb ki, ötən il şirkət BƏƏ-də qaz yatağında pay ala bilib.
"Bu il biz sövdələşməni tamamladıq və Aralıq dənizinin şərqindəki "Tamar" yatağında pay aldıq və bu, bizim beynəlxalq inkişaf strategiyamızın mühüm hissəsidir. Təbii ki, qarşılıqlı faydalı yeni imkanlar yaranarsa, şübhəsiz ki, növbəti alışları nəzərdən keçirəcəyik", - deyə Ə. İsayev fikrini yekunlaşdırıb.
