Milan meriyası sentyabrın 30-da səhər saatlarında San Siro stadionunun və ətrafındakı torpaqların ev oyunlarını burada keçirən iki kluba - "Milan" və "İnter"ə satılmasına icazə verib. Stadion tezliklə söküləcək.

“İki sahil” xəbər verir ki, bu barədə AFP məlumat yayıb.

Agentliyin məlumatına görə, San Siro-nun satışı ilə bağlı müzakirələr 11 saatdan çox davam edib və yekun qərar yerli vaxtla səhər saat 4:00 radələrində verilib. Məsələləri çətinləşdirən o idi ki, AC Milan və Inter Milan müqavilə təsdiq olunmasa, Milandan şəhərətrafı ərazilərə köçmək niyyətində idilər. Sonda satışın lehinə 24, əleyhinə 20 səs verilib.

Mənbənin məlumatına görə, klublar şəhərin qərb kənarında yeni stadion tikmək niyyətindədirlər. Onun 71500 tutumlu olacağı gözlənilir. Dizaynın 12 ay ərzində təqdim ediləcəyi gözlənilir. Keçən həftə klublar yeni stadionun müvafiq olaraq Lord Norman Foster və David Manica başçılıq etdiyi Foster + Partners və Manica memarlıq firmaları tərəfindən layihələndiriləcəyini elan etdilər. Hər iki firma dörd il əvvəl sökülən köhnə Wemcley Stadionunun yerində 2007-ci ildə açılan yeni Uembli Stadionunun dizaynında iştirak ediblər.

Arenanın 2031-ci ilə qədər istismara verilməsi planlaşdırılır.