Yeni araşdırmalar göstərir ki, ABŞ 1990-cı ildən bəri yüksək həcmli karbon emissiyaları nəticəsində qlobal iqtisadiyyata təxminən 10 trilyon dollar ziyan vurub.

“İki sahil” xarici KİV-ə istinadən xəbər verir ki, tədqiqatın nəticələrinə görə, bu ziyanın təxminən dörddə biri ABŞ-ın öz iqtisadiyyatına təsir edib. Araşdırmada qeyd olunur ki, ABŞ tarixən ən böyük karbon emissiyası istehsal edən ölkə olaraq dünya iqtisadi artımına digər ölkələrlə müqayisədə daha çox mənfi təsir göstərib və bu göstəricidə Çini qabaqlayıb.

Hazırda isə Çin dünyanın ən böyük emissiya istehsalçısı hesab olunur və 1990-cı ildən bu yana qlobal ÜDM-in təxminən 9 trilyon dollar azalmasına səbəb olub.

Məlumata əsasən, qlobal ÜDM-dəki azalmanın təxminən 25 faizi ABŞ-ın özündə qeydə alınıb. Bununla yanaşı, digər ölkələr də ciddi iqtisadi itkilərlə üzləşib və bu təsir xüsusilə kasıb ölkələrdə daha kəskin hiss olunub.

Tədqiqat göstərir ki, son onilliklərdə ABŞ-ın emissiyaları Hindistan iqtisadiyyatına təxminən 500 milyard dollar, Braziliyaya isə 330 milyard dollar ziyan vurub.