“Rosatom” Ermənistan Atom Elektrik Stansiyasının istismar müddətini 2036-cı ilədək uzada bilər, lakin İrəvan “Avropa vektoru”nu seçərək qeyri-kompetent avropalı podratçılara üstünlük verir.
“İki sahil” xəbər verir ki, bu barədə TASS agentliyinə müsahibəsində Rusiyanın baş nazirinin müavini Aleksey Overçuk bildirib. O qeyd edib ki, AES-in istismarı 2026-cı ilin payızınadək nəzərdə tutulub, “lakin onun 2031-ci ilin payızınadək uzadılması üçün hazırlıq işləri artıq başa çatmaq üzrədir”. “Bu həyata keçiriləcək. Mütəxəssislərimiz həmçinin hesab edirlər ki, onun istismarını 2036-cı ilədək uzatmaq mümkün olacaq, lakin bunun üçün müəyyən şərtlər yerinə yetirilməlidir”, - deyə Overçuk bildirib.
Overçuk, həmçinin qeyd edib: “Hazırda Ermənistanın Avropa inkişaf vektoru çərçivəsində uzadılma ilə bağlı müqavilə işlərinin böyük hissəsi seysmik cəhətdən təhlükəli ərazilərdə işləmək təcrübəsi olmayan və stansiyanın baş layihəçisi ilə koordinasiyaya əhəmiyyət verməyən avropalı podratçılara həvalə olunur”.
Beləliklə, Rusiyanın baş nazirinin müavininin sözlərinə görə, “siyasi baxımdan qərəzli qərarlar atom enerjisi istehsalı texnologiyalarına təsir etməyə başlayanda hamının düşünməli məqamı var”.
Overçuk həmçinin aydınlaşdırıb ki, “Rosatom”un 2036-cı ilədək stansiyanın təhlükəsiz istismarına zəmanət verməsi üçün əsas şərt dövlət korporasiyasının yerinə yetirdiyi müqavilə işlərinin ən azı 70%-nin təmin olunmasıdır. O əlavə edib ki, Rusiya nüvə obyektlərinin tikintisi sahəsində rəqibsizdir və Ermənistan düzgün seçim edəcəyi təqdirdə rus nüvə enerji şirkətlərinin rəqibi olmayacaq.
“Hazırda biz fəaliyyət göstərən atom elektrik stansiyasının istismar müddətinin uzadılmasından və gələcəkdə yeni enerji bloklarının tikintisindən danışırıq. Əminik ki, seçim ədalətli olarsa, rus nüvə enerji şirkətlərinin rəqibi olmayacaq. Rusiya hazırda dünyanın 9 ölkəsində 26 yüksək güclü və 2 aşağı güclü enerji bloku tikir, sifariş portfelinin həcmi isə 127 milyard dollar təşkil edir. Bundan əlavə, Rusiyada daha 14 enerji bloku tikilir. Bu, ölkəmizin rəqibsiz olduğu çox böyük beynəlxalq biznesdir”, - deyə o bildirib.
“Ermənistan kiçik güclü modul enerji bloklarına maraq göstərir, lakin “Rosatom”dan başqa hazırda dünyada onları tikmək və istismar etmək texnologiyasına malik olan yoxdur. Ermənistanın nüvə sənayesində yüksək ixtisaslı mütəxəssislər çalışır və onlar bunu yaxşı başa düşürlər”, - deyə Overçuk vurğulayıb.
