Ölkə ərazisində son günlər davam edən qeyri-sabit hava şəraiti və güclü yağışlar kənd təsərrüfatına da ciddi təsir göstərməkdədir.

“İki sahil” xəbər verir ki, yağış və onun nəticəsində yaranan selsubasma hadisələrindən zərər çəkən əkin sahələri və fermerlərin Aqrar Sığorta Fonduna ünvanladığı zərər müraciətlərinin sayı artmaqdadır. Son məlumatlara görə, ölkə ərazisində güclü yağışların başladığı 27 mart 2026-cı il tarixindən 9 aprel tarixinədək olan dövrdə Aqrar Sığorta Fonduna müxtəlif hadisələr üzrə ümumilikdə 601 sığorta müqaviləsini əhatə edən 93 müraciət daxil olub. Bu müraciətlər müxtəlif bitkilərin əkildiyi 6541 hektar əkin sahəsini əhatə edib.

Ən çox müraciət Quba-Xaçmaz regionu üzrə daxil olub, bu bölgələn 5700 hektarı əhatə edən müraciət edilib. Xüsusilə Xaçmaz və Şabran rayonlarından Fonda çoxsaylı müraciətlər daxil olub. Dağlıq Şirvan regionundan 381 hektar, Mərkəzi Aran regionundan 213 hektar, Gəncə Daşkəsən regionundan 154 hektar, Qarabağ regionundan 56 hektar, Şirvan-Salyan regionundan 24 hektar, Abşeron – Xızı regionundan isə 12 hektar sahədə baş verən hadisə üzrə müraciətlər daxil olub. Ümumilikdə 6541 hektar sahəni əhatə edən müraciətlərin əksər hissəsi – 6256 hektarı sel-subasma ilə bağlı olub. 223 Hektar sahə üzrə müraciət 3-cü şəxsin hərəkəti, 53 hektarda, fırtına-qasırğa hadisəsi, 5 hektarda vəhşi heyvan hücumu, 3,46 hektarda isə müraciət dolu hadisəsi ilə bağlıdır.

Aqrar Sığorta Fonduna daxil olan bütün müraciətlər qeydə alınıb, hadisələrin araşdırılması və ilkin qiymətləndirmə işlərinin aparılması üçün ərazilərə müsğəqil aqrar sığorta ekspertləri yönəldilib. Yağış və sel-subasma hallarının davm etməsi səbəbindən bəzi ərazilər üzrə təkrar müraciətlər daxil olmaqdadır. Nəticətə bəzi hallarda artıq ekspert tərəfindən ilkin zərər qiymətləndirilməsi aparılmış ərazilərdə yenidən hadisələrin baş verdiyi bildirilir və həmin əkin sahələrinə yenidən ekspertlər yönəldilir.

Aqrar Sığorta Fondu fermer və təsərrüfat sahiblərini dövlətin dəstəyindən faydalanmağa və əkin sahələrini vaxtında sığortalamağa çağırır.  Sığortalanma prosesini asanlaşdırmaq üçün isə fermerlərin sığorta ödənişini “AsanPay” sistemi vasitəsilə, mobil telefonla ödəməsi imkanı yaradılıb.

Aqrar sığortanın əhatə etdiyi məhsullarının sığorta şərtləri və tarifləri ilə Aqrar Sığorta Fondunun rəsmi internet səhifəsində «Bitkiçilik məhsulları» bölməsində ətraflı tanış olmaq, sığorta haqqını isə «Bitkiçilik kalkulyatoru» vasitəsilə hesablamaq mümkündür. Əlavə məlumatları ASF-nin sosial şəbəkə hesablarını izləməklə və 1651 nömrəsi ilə əlaqə saxlamaqla əldə etmək olar.