Fransa Baş naziri Sebastyan Lökornü Matignon iqamətgahından yayımlanan çıxışında ölkənin enerji müstəqilliyini artırmaq məqsədilə genişmiqyaslı elektrikləşdirmə planını açıqlayıb.

“İki sahil” xəbər verir ki, Baş nazir bu planın Fransanın xarici enerjidən asılılığını azaltmaq məqsədi daşıdığını bildirib. Elektrikləşməyə dəstəyin ikiqat artırılacağını qeyd edib. Plan çərçivəsində istifadə sahələrinin elektrikləşdirilməsinə illik dəstək 5,5 milyard avrodan 10 milyard avroya qaldırılacaq. Baş nazir bu addımı güclü seçim adlandırıb və Fransanın gələcək enerji böhranlarına hazırlığını artırmaq istədiyini vurğulayıb.

“Neft və qazdan asılı olduqca, başqalarının müharibələrini maliyyələşdiririk. İndi dəyişiklik etməliyik, amma bunu metodik şəkildə etməliyik”, – deyə Lökornü qeyd edib. Onun sözlərinə görə, Fransanın enerji istehlakının 60%-i hələ də fosil yanacaqlardan ibarətdir.

Plana əsasən Fransada 2026-cı ilin sonundan etibarən yeni tikililərdə təbii qaz vasitələrinin quraşdırılması qadağan ediləcək. Eyni zamanda, fərdi ev sahibləri üçün dövlət yardımları qaz və neft qazanlarını istilik nasosları ilə əvəz etməyə dəstək verəcək. Sosial mənzillərdə elektrikləşmə sürətləndirilib. 2050-ci ilə qədər 2 milyon sosial mənzil qazdan istifadədən çıxarılacaq.

Sosial lizinq və elektromobillərin təşviqi

Fransa hökuməti elektromobillərdən istifadəni də stimullaşdıracaq. İyun ayından başlayaraq sosial lizinq proqramı çərçivəsində əlavə 50 min elektromobil təqdim ediləcək. Orta təbəqədən olan sürücülər, xüsusilə də ev xidmətləri ilə məşğul olanlar, səhiyyə işçiləri, sənətkarlar və dövlət əməkdaşları subsidiyalardan yararlanacaq.

Həmçinin sənətkarlar və ticarət sahibləri üçün iş alətlərinin elektrikləşdirilməsi də dəstəklənəcək. Eyni zamanda, enerji intensiv sənaye obyektləri və qida emalı müəssisələrinin karbonsuzlaşdırılması üçün addımlar atılacaq.

Sebastyan Lökornünün açıqladığı bu plan Fransanın enerji müstəqilliyini artırmaq və xarici yanacaqlardan asılılığı azaltmaq istiqamətində mühüm addım kimi qiymətləndirilir.