Fransanın telekommunikasiya operatoru SFR “Red by SFR” brendi ilə bağlı saxta reklamlara görə 10 milyon avro cərimə olunub, bunun 5 milyon avrosu şərti cərimədir.

“İki sahil” xəbər verir ki, bu barədə şirkət və istehlakçı hüquqlarını qoruyan “UFC-Que Choisir” assosiasiyası açıqlama yayıb. Operatora qarşı ittiham telefon paketlərini “müddət şərti olmadan”, “bir ildən sonra qiyməti ikiqat artırılmayan” və ya “ömürlük zəmanətli” kimi təqdim etməsi ilə bağlı olub.

“UFC-Que Choisir” assosiasiyası bu qərarı telekommunikasiya sektorunda kommersiya praktikalarının şəffaflığı üçün güclü siqnal kimi qiymətləndirib. Qeyd edək ki, assosiasiya istehlakçı şikayətlərindən sonra 2021-ci ildə məhkəməyə müraciət etmişdi. Paris Cinayət Məhkəməsi SFR-i “saxta kommersiya təcrübələri”nə görə günahkar bilib.

“UFC-Que Choisir” açıqlamasında bildirib ki, operator 2019-cu ildən etibarən paketlərin qiymətini birtərəfli şəkildə artırıb və bu, əvvəlki vədlərlə tamamilə ziddiyyət təşkil edib. Assosiasiya həmçinin əlavə edib ki, SFR ona 50 000 avro ödəməyə məhkum olunub. Operator isə mövzu ilə bağlı şərh vermək istəməyib.

Bu qərar Fransada telekommunikasiya sektorunda istehlakçı hüquqlarının qorunması və reklamların dürüstlüyünün təmin olunması istiqamətində əhəmiyyətli bir nümunə olaraq qiymətləndirilir.