Şimali Koreya Yaponiyanın əsas təhlükəsizlik qanunvericiliyini islah etmək cəhdlərinə qarşı tənqidlərini artıraraq, bunu "ehtiyatsız militarist hərəkətlər" adlandırıb.

“İki sahil” “Yonhap”a istinadla xəbər verir ki, Pxenyan Tokionu "Yaponiya İmperiyası"nı dirçəltmək üçün özünü "müharibə dövləti"nə çevirməkdə günahlandırıb və şənbə günü hakim Koreya İşçi Partiyasının rəsmi ruporu olan “Rodonq Sinmun” qəzetində dərc olunan məqaləyə görə, "militarizmi dirçəltmək üçün beynəlxalq ictimaiyyətin xoş niyyətindən istifadə etdiyini" bildirib.

Pxenyanın son tənqidi, Tokionun bu il ərzində üç əsas təhlükəsizlik sənədini - Milli Təhlükəsizlik Strategiyasını, Milli Müdafiə Strategiyasını və Müdafiə Quruculuğu Proqramını yenidən nəzərdən keçirməsi ilə əlaqədar gəldi. Bu, Çinin bölgədəki artan hərbi mövcudluğuna və digər regional təhlükəsizlik təhdidlərinə cavab olaraq geniş şəkildə qəbul edilən bir təşəbbüsdür.

"Əgər Yaponiya daha bir işğala cəhd edərsə, bu, keçmişdəkindən daha dağıdıcı nəticələrə səbəb olacaq", - deyə xəbərdarlıq edilib.

Məhərrəm Ağalaroğlu, “İki sahil”