Azərbaycan Respublikasının Prezidenti İlham Əliyev kənd təsərrüfatı məsələlərinə həsr olunmuş müşavirədə çıxışı zamanı qeyd etmişdir ki, “Bu gün də dövlət xətti ilə həyata keçirilən bir çox layihələr təbii ki, kənd təsərrüfatının inkişafına böyük təkan vermişdir”. Bu fikir ölkəmizdə aqrar sahənin inkişafına göstərilən diqqət və qayğının bariz nümunəsidir. Son illərdə kənd təsərrüfatının modernləşdirilməsi, fermerlərin sosial rifahının yaxşılaşdırılması və ərzaq təhlükəsizliyinin təmin olunması istiqamətində həyata keçirilən ardıcıl tədbirlər Azərbaycanın iqtisadi inkişaf strategiyasında mühüm yer tutur.
Kənd təsərrüfatı hər bir ölkənin iqtisadiyyatında strateji əhəmiyyət daşıyan sahələrdən biridir. Azərbaycan da zəngin torpaq və iqlim potensialına malik ölkə kimi aqrar sahənin inkişafına xüsusi önəm verir. Dövlət başçısının rəhbərliyi ilə həyata keçirilən islahatlar nəticəsində kənd təsərrüfatında məhsuldarlıq artmış, yeni iş yerləri yaradılmış və kənd əhalisinin məşğulluq səviyyəsi yüksəlmişdir. Aqrar sahəyə göstərilən dövlət dəstəyi fermerlərin fəaliyyətini daha da genişləndirmişdir.
Son illərdə dövlət tərəfindən kənd təsərrüfatının inkişafı məqsədilə mühüm layihələr həyata keçirilmişdir. Suvarma sistemlərinin yenilənməsi, yeni su anbarlarının tikilməsi, meliorasiya tədbirlərinin genişləndirilməsi kənd təsərrüfatında məhsuldarlığın artmasına şərait yaratmışdır. Xüsusilə regionlarda infrastruktur layihələrinin icrası kənd yerlərində iqtisadi fəallığı gücləndirmişdir. Yeni yolların çəkilməsi, elektrik enerjisi və qaz təminatının yaxşılaşdırılması kənd təsərrüfatı məhsullarının bazarlara daha rahat çıxarılmasına imkan vermişdir.
Fermerlərə göstərilən maliyyə dəstəyi də aqrar sahənin inkişafında mühüm rol oynayır. Subsidiyaların verilməsi, güzəştli kreditlərin ayrılması, texnika təminatının yaxşılaşdırılması kənd təsərrüfatı ilə məşğul olan insanların fəaliyyətini stimullaşdırır. Aqrolizinq xətti ilə müasir texnikaların fermerlərə təqdim olunması məhsul istehsalında keyfiyyətin və məhsuldarlığın yüksəlməsinə səbəb olmuşdur. Bununla yanaşı, gübrə və toxum təminatında tətbiq edilən güzəştlər də fermerlərin xərclərinin azalmasına kömək edir.
Azərbaycanın qeyri-neft sektorunun inkişafında kənd təsərrüfatı mühüm istiqamətlərdən biri hesab olunur. Dövlət başçısı dəfələrlə vurğulamışdır ki, ölkə iqtisadiyyatının şaxələndirilməsi əsas prioritetlərdəndir. Aqrar sahənin inkişafı həm ixrac imkanlarını genişləndirir, həm də ərzaq təhlükəsizliyinin təmin olunmasına xidmət edir. Yerli istehsalın artırılması nəticəsində daxili bazarın tələbatı daha yüksək səviyyədə ödənilir və xarici asılılıq azalır.
İşğaldan azad edilmiş ərazilərdə kənd təsərrüfatının inkişafı üçün də geniş imkanlar yaranmışdır. Həmin ərazilərin münbit torpaqları və zəngin su ehtiyatları gələcəkdə aqrar sahənin daha da inkişafına böyük töhfə verəcəkdir. Müasir texnologiyaların tətbiqi ilə “ağıllı kənd” və “ağıllı təsərrüfat” layihələrinin həyata keçirilməsi bu bölgələrdə kənd təsərrüfatının yeni inkişaf mərhələsinə qədəm qoymasına şərait yaradır.
Prezident İlham Əliyevin həyata keçirdiyi uğurlu siyasət nəticəsində Azərbaycan kənd təsərrüfatı sahəsində mühüm nailiyyətlər əldə etmişdir. Dövlət tərəfindən həyata keçirilən layihələr kənd əhalisinin rifahının yüksəldilməsinə, aqrar sahənin müasir tələblərə uyğun inkişafına və ölkənin iqtisadi qüdrətinin möhkəmlənməsinə xidmət edir. Bu siyasətin nəticəsində kənd təsərrüfatı gələcək illərdə də Azərbaycanın dayanıqlı inkişafının əsas istiqamətlərindən biri olaraq qalacaqdır.
Ehtibar İsmayılov,
YAP Ordubad rayon təşkilatının sədri
