Azərbaycan xalqı 26 İyun – Silahlı Qüvvələr Gününü böyük qürur, yüksək iftixar hissi ilə qeyd edir. Bu gün təkcə peşə bayramı deyil, həm də müstəqil dövlətimizin gücünün, xalq-dövlət birliyinin və milli iradəsinin təntənəsidir. Bu tarixin əhəmiyyətini daha dərindən dərk etmək üçün ordumuzun keçdiyi yola nəzər salmaq kifayətdir.
Müstəqilliyin ilk illərində AXCP–Müsavat hakimiyyətinin dövlət idarəçiliyində buraxdığı ciddi səhvlər Azərbaycan tarixinin ən ağır səhifələrindən biri kimi qiymətləndirilir. Həmin dövrdə dövlət institutlarının zəifləməsi, siyasi səriştəsizlik, şəxsi və qrup maraqlarının milli maraqlardan üstün tutulması ölkəni faktiki idarəolunmaz vəziyyətə gətirmişdi. Orduda vahid komandanlıq yox idi, hərbi hissələr arasında koordinasiya zəif idi, müxtəlif silahlı dəstələr dövlətin nəzarətindən kənarda fəaliyyət göstərirdi. Bu isə döyüş meydanında ardıcıl uğursuzluqlara və torpaq itkilərinə səbəb oldu.
Məhz həmin dövrdə torpaqlarımızın əhəmiyyətli hissəsi işğal olundu, minlərlə soydaşımız şəhid verdi, yüz minlərlə insan doğma yurd-yuvasından didərgin düşdü. Ordudakı nizamsızlıq, hərbi intizamsızlıq, siyasi çəkişmələrin dövlət maraqlarından üstün tutulması Azərbaycanın milli təhlükəsizliyinə ciddi zərbə vurdu. Tarix bu hadisələri obyektiv qiymətləndirir və həmin dövrün acı nəticələri bu gün də hər kəs üçün dərs olmalıdır.
Ən böyük faciə ondan ibarət idi ki, xalqın taleyi siyasi təcrübəsizliyin girovuna çevrilmişdi. Dövlət idarəçiliyində məsuliyyətsizlik, daxili qarşıdurmalar və hakimiyyət uğrunda mübarizə cəbhədə döyüşən əsgər və zabitlərin fədakarlığını kölgədə qoyurdu. Nəticədə Azərbaycan ağır hərbi və siyasi itkilərlə üzləşdi, yüz minlərlə vətəndaş qaçqın və məcburi köçkünə çevrildi.
Tarix sübut etdi ki, güclü dövlət yalnız güclü idarəçilik və peşəkar ordu ilə mövcud ola bilər. 1993-cü ildə xalqın tələbi ilə Ümummilli Lider Heydər Əliyevin hakimiyyətə qayıdışı ölkəni parçalanmaq və vətəndaş qarşıdurması təhlükəsindən xilas etdi. Məhz bundan sonra dövlətçiliyin möhkəmləndirilməsi, nizami ordunun formalaşdırılması və gələcək Zəfərin təməli qoyuldu.
Bu gün 44 günlük Vətən müharibəsində qazanılan möhtəşəm Zəfər ilə 1992–1993-cü illərin acı mənzərəsini müqayisə etdikdə fərq aydın görünür. Bir tərəfdə nizamsızlıq, siyasi məsuliyyətsizlik və ağır məğlubiyyətlər, digər tərəfdə isə güclü dövlət, peşəkar ordu, milli birlik və tarixi Qələbə dayanır. Bu müqayisə Azərbaycan dövlətçiliyinin hansı prinsiplər üzərində inkişaf etməli olduğunu açıq şəkildə göstərir.
Bu məqsədyönlü siyasətin ən möhtəşəm nəticəsi 2020-ci ildə 44 günlük Vətən müharibəsində əldə edilən tarixi Zəfər oldu. Azərbaycan Ordusu Ali Baş Komandan İlham Əliyevin rəhbərliyi ilə torpaqlarımızı işğaldan azad etdi, otuz ilə yaxın davam edən ədalətsizliyə son qoydu və xalqımızın milli qürurunu özünə qaytardı. 2023-cü ilin sentyabr ayında həyata keçirilən lokal xarakterli antiterror tədbirləri nəticəsində isə ölkəmizin bütün ərazisində dövlət suverenliyi tam bərpa edildi.
Hazırda Azərbaycan Ordusu yalnız regionun deyil, daha geniş coğrafiyanın ən peşəkar, intizamlı və yüksək döyüş qabiliyyətinə malik silahlı qüvvələrindən biri hesab olunur. Ordumuz müasir texnologiyalara yiyələnmiş, vətənpərvərlik ruhunda formalaşmış, xalqın sonsuz etimadını qazanan güclü bir hərbi qüvvəyə çevrilmişdir.
26 İyun – Silahlı Qüvvələr Günü münasibətilə bütün hərbi qulluqçularımızı, müharibə veteranlarını və şəhid ailələrini dərin ehtiramla salamlayır, şəhidlərimizin əziz xatirəsini minnətdarlıqla yad edirik. Məhz onların qəhrəmanlığı və fədakarlığı sayəsində bu gün Azərbaycan qalib dövlətdir, qalib ordunun sahibidir.
Ulu Öndər Heydər Əliyevin əsasını qoyduğu, Prezident, Ali Baş Komandan İlham Əliyevin uğurla inkişaf etdirdiyi ordu quruculuğu siyasəti bundan sonra da davam edəcək, Azərbaycan Silahlı Qüvvələri dövlətimizin müstəqilliyinin, ərazi bütövlüyünün və xalqımızın təhlükəsizliyinin etibarlı təminatçısı olaraq daha da güclənəcəkdir.
Yaşasın müstəqil Azərbaycan! Yaşasın qalib Azərbaycan Ordusu!
Əminə Ağazadə
Milli Məclisin deputatı
