Fransa hökuməti büdcə xərclərini azaltmaq məqsədilə yüksək pensiyaların inflyasiyaya uyğun indeksləşdirilməsinin dayandırılması imkanını nəzərdən keçirir. Baş nazirlik isə hələlik heç bir qərarın qəbul edilmədiyini və söhbətin yalnız mümkün variantlardan getdiyini bildirir.
“İki sahil” xəbər verir ki, 2027-ci il büdcəsinin təqdimatına iki aydan az vaxt qalmış Baş nazir Sebastyən Lökornü hökuməti pensiyaların indeksləşdirilməsinin dayandırılması kimi siyasi baxımdan həssas məsələni yenidən gündəmə gətirib. Təklif xüsusilə prezident seçkiləri ərəfəsində ciddi siyasi qarşıdurmaya səbəb ola bilər.
Məsələ yeni deyil. Keçmiş baş nazirlər Mişel Barnye və Fransua Bayru da belə bir addımı gündəmə gətirmiş, lakin bunu həyata keçirə bilməmişdilər. Lökornü də 2026-cı il büdcəsinin müzakirəsi zamanı pensiyaların dondurulması ideyasını müdafiə etmiş, sonradan bu plandan imtina etmişdi. Hazırda hökumətin daha çox yüksək məbləğli pensiyalara yönəlmiş məhdud tədbiri nəzərdən keçirdiyi bildirilir.
Fransa Maliyyə Nazirliyinin hesablamalarına görə, heç bir tədbir görülməzsə, pensiya xərcləri 2027-ci ildə 12 milyard avro arta bilər. Bu artımın təxminən yarısı pensiyaların inflyasiyaya uyğun indeksləşdirilməsi, digər yarısı isə əhalinin qocalması və yeni pensiyaçıların sayının artması ilə bağlıdır. Pensiyaların ümumi indeksləşdirilməsi isə hazırda dövlət büdcəsinə təxminən 6 milyard avro əlavə xərc yaradır.
Hökumət daxilində müxtəlif qənaət variantlarının avqustun sonunda baş nazirə təqdim ediləcəyi gözlənilir. Daha sonra hökumət 2027-ci il maliyyə və sosial təminat qanun layihələri üzrə qərarlarını açıqlayacaq. Bu layihələrin sentyabrın 30-da təqdim edilməsi planlaşdırılır.
Təklif artıq siyasi partiyaların kəskin reaksiyasına səbəb olub.
Parlamentdə hökumətin sabit çoxluğa malik olmaması və prezident seçkilərinin yaxınlaşması fonunda 2027-ci il büdcəsinin müzakirəsinin son dərəcə gərgin keçəcəyi gözlənilir. Bir sıra deputatlar yüksək pensiyaların sahiblərinin dövlət maliyyəsinin bərpasına töhfə verməsinin mümkün olduğunu qəbul etsələr də, seçki ili belə bir tədbirə siyasi müqavimətin daha da güclənə biləcəyi barədə xəbərdarlıqlar səslənir.
