ABŞ-də qeydiyyatdan keçmiş NATO-nun kəşfiyyat təyyarəsi Qara dənizin neytral suları üzərində uçuşa başlayıb.

“İki sahil” xəbər verir ki, bu barədə TASS-a Avropa İttifaqının aviadispetçer xidmətlərindəki mənbə məlumat verib.

"Bombardier ARTEMIS II təyyarəsi Qara dənizin neytral suları üzərində müşahidə olunub", - agentliyin həmsöhbəti bildirib. Onun sözlərinə görə, bort Konstansadakı aerodromdan qalxıb və hazırda akvatoriyanın cənub hissəsində öz daimi uçuş traektoriyasına çıxır. O, sahil ölkələrinin hava məkanına daxil olmadan və mülki aviasiya üçün ayrılmış dəhlizləri kəsmədən qərbdən şərqə doğru və əks istiqamətdə bir neçə saat dövr edəcək.

Mənbə qeyd edib ki, bu təyyarə cari həftədə ilk dəfədir Qara dəniz üzərində nəzərə çarpır – o, bundan əvvəlki gün Polşa və Litvanın hava məkanından istifadə edərək Kalininqrad vilayəti ətrafında uçuşlar həyata keçirmişdi.

Bununla yanaşı, mənbə xatırladıb ki, son iki gün ərzində İsveç Hərbi Hava Qüvvələrinin təyyarəsi Qara dəniz üzərində radiolokasiya kəşfiyyatı aparıb. Ötən gün həmin təyyarə akvatoriya üzərindəki havada təxminən yeddi saat keçirib.