Azərbaycanın çoxəsrlik tarixində xalqımızın taleyinə mühüm təsir göstərən, milli düşüncəmizdə silinməz iz qoyan 8 Noyabr – Zəfər Günü əlamətdar hadisələr sırasında özünəməxsus yer tutur. Bu tarix Azərbaycanın ərazi bütövlüyü uğrunda apardığı mübarizənin uğurla başa çatmasının, milli iradənin və dövlətçilik əzminin rəmzidir. Vətən müharibəsində Şuşanın işğaldan azad edilməsi ilə xalqımız tarixinin ən qürurlu səhifələrindən birini yazdı və gələcək nəsillərə böyük əzmkarlıq nümunəsi miras qoydu.
Zəfər Günü xalqımızın yaddaşında yalnız hərbi uğur kimi deyil, uzun illər davam edən ədalətsizliyə son qoyulması istiqamətində qazanılmış tarixi nailiyyət kimi yaşayır. Ermənistanın Azərbaycana qarşı hərbi təcavüzü nəticəsində torpaqlarımızın işğal olunması, yaşayış məntəqələrinin dağıdılması və insanların doğma yurdlarından didərgin salınması ölkəmizin qarşısında ciddi sınaqlar yaratmışdı. Lakin Azərbaycan xalqı bütün çətinliklərə baxmayaraq, tarixi torpaqlarına qayıtmaq, hüquqlarını bərpa etmək və ölkənin ərazi bütövlüyünü təmin etmək əzmindən dönmədi.
Münaqişənin həlli üçün uzun illər ərzində aparılan diplomatik səylər gözlənilən nəticəni vermədiyi şəraitdə Azərbaycan özünün iqtisadi, siyasi və hərbi potensialını gücləndirmək istiqamətində ardıcıl fəaliyyət göstərdi. Dövlət müstəqilliyinin möhkəmləndirilməsi, beynəlxalq əlaqələrin genişləndirilməsi, milli iqtisadiyyatın inkişafı və müasir ordu quruculuğu vahid strategiyanın mühüm istiqamətləri idi. Bu siyasət nəticəsində Azərbaycan həm beynəlxalq müstəvidə mövqelərini möhkəmləndirdi, həm də milli təhlükəsizliyini təmin etmək üçün zəruri imkanlar qazandı.
Prezident İlham Əliyevin rəhbərliyi ilə həyata keçirilən məqsədyönlü siyasət Vətən müharibəsində əldə olunan Qələbənin mühüm əsaslarından birinə çevrildi. Dövlətin güclənməsi, ordunun döyüş qabiliyyətinin yüksəldilməsi və xalqın milli maraqlar ətrafında birləşməsi Azərbaycanın qarşıya qoyduğu strateji hədəflərə çatmasını təmin etdi. Vətən müharibəsi göstərdi ki, müstəqil siyasət yürüdən, iqtisadi dayaqlarını möhkəmləndirən və milli birliyini qoruyan dövlət ən mürəkkəb tarixi sınaqlardan uğurla çıxa bilər.
2020-ci il sentyabrın 27-də başlayan Vətən müharibəsi Azərbaycan tarixində yeni bir dövrün başlanğıcı oldu. 44 gün davam edən döyüşlər zamanı Azərbaycan Ordusu yüksək peşəkarlıq, fədakarlıq və qətiyyət nümayiş etdirdi. İşğal altındakı torpaqların azad olunması uğrunda aparılan əməliyyatlar hər bir azərbaycanlının qəlbində illərlə yaşatdığı qələbə arzusunu gerçəyə çevirdi. Ordumuzun qazandığı uğurlar xalqın dövlətə və Ali Baş Komandana inamını daha da gücləndirdi, ölkəmizdə misilsiz birlik və həmrəylik mühiti yaratdı.
Vətən müharibəsinin ən həlledici hadisələrindən biri Şuşanın azad edilməsi oldu. Azərbaycanın mədəniyyət paytaxtı, milli musiqi və ədəbiyyat tariximizin mühüm mərkəzlərindən biri olan bu şəhərin işğaldan qurtulması hərbi və mənəvi baxımdan müstəsna əhəmiyyət daşıyırdı. Şuşa uğrunda döyüşlər Azərbaycan hərbçilərinin misilsiz qəhrəmanlığını, çətin şəraitdə qərar qəbul etmək bacarığını və Vətənə bağlılığını nümayiş etdirdi. Şəhərin azad edilməsi müharibənin taleyinə həlledici təsir göstərərək qələbəyə aparan yolu sürətləndirdi.
Şuşanın azadlığı həm də xalqımızın tarixi və mədəni irsinə sahib çıxmasının rəmzi oldu. Bu şəhər Azərbaycan mədəniyyətinin inkişafında mühüm rol oynamış, görkəmli şəxsiyyətlər yetişdirmiş və milli kimliyimizin formalaşmasına böyük töhfələr vermişdir. Uzun illər işğal altında qalan Şuşada Azərbaycan Bayrağının dalğalanması xalqımız üçün tarixi ədalətin bərpası və milli qürurun yüksəlişi demək idi. Məhz buna görə 8 noyabr Azərbaycan dövlətinin və xalqının yaddaşında xüsusi məna daşıyan müqəddəs tarixə çevrilib.
Qələbənin qazanılmasında xalq-ordu birliyi də mühüm rol oynadı. Müharibə dövründə Azərbaycan cəmiyyəti vahid amal ətrafında birləşərək hərbçilərə mənəvi dəstək göstərdi. İnsanlarımızın Vətənə bağlılığı, gənclərin torpaqlarımızın azadlığı uğrunda mübarizəyə qoşulmaq əzmi və cəmiyyətin bütün təbəqələrinin nümayiş etdirdiyi həmrəylik milli gücün əsas göstəricilərindən biri oldu. Bu birlik bir daha sübut etdi ki, Vətən sevgisi xalqımızı birləşdirən ən böyük mənəvi qüvvədir.
Şanlı Zəfərin təməlində şəhidlərin qanı, qazilərin fədakarlığı və Azərbaycan Ordusunun qəhrəmanlığı dayanır. Vətən uğrunda canından keçən igidlərin xatirəsi xalqımızın yaddaşında əbədi yaşayacaq. Onların göstərdiyi şücaət milli tariximizin ən şərəfli səhifələrindən biridir. Şəhid ailələrinə, müharibə əlillərinə və veteranlara dövlət tərəfindən göstərilən diqqət və qayğı bu müqəddəs xidmətin yüksək qiymətləndirilməsinin ifadəsidir. Şəhidlərin əziz xatirəsinin yaşadılması, qazilərin cəmiyyətə inteqrasiyası və onların sosial rifahının təmin olunması dövlət siyasətinin mühüm istiqamətlərindəndir.
Azərbaycanın tarixi Qələbəsi sonrakı mərhələdə də mühüm nəticələrlə müşayiət olundu. 2023-cü ilin sentyabrında həyata keçirilən antiterror tədbirləri nəticəsində ölkəmizin suverenliyi bütün ərazisində tam bərpa edildi. Beləliklə, Azərbaycan dövlət müstəqilliyinin möhkəmləndirilməsi və milli təhlükəsizliyinin təmin olunması baxımından mühüm tarixi məqsədinə nail oldu. Bu nailiyyət dövlətimizin qətiyyətinin, ordumuzun gücünün və milli maraqların qorunmasına yönəlmiş ardıcıl siyasətin nəticəsi idi.
Bu gün qazanılmış Zəfərin davamı azad edilmiş ərazilərdə aparılan bərpa və quruculuq işlərində öz əksini tapır. Qarabağ və Şərqi Zəngəzurda müasir infrastruktur yaradılır, şəhər və kəndlər yenidən qurulur, sosial və iqtisadi həyatın canlandırılması üçün geniş imkanlar formalaşdırılır. Böyük Qayıdış Proqramı çərçivəsində keçmiş məcburi köçkünlərin doğma yurdlarına qayıtması tarixi Qələbənin ən mühüm humanitar nəticələrindən biridir. İllərlə ayrılıq və həsrət yaşayan ailələrin öz evlərinə dönməsi, doğma torpaqlarda yeni həyat qurması Zəfərin insan talelərində yaratdığı dəyişiklikləri aydın şəkildə göstərir.
Zəfər Günü, eyni zamanda gələcək qarşısında məsuliyyətimizi müəyyənləşdirir. Tarixi qələbəni qorumaq, müstəqilliyimizi daha da möhkəmləndirmək, iqtisadi inkişafı davam etdirmək və milli birliyimizi saxlamaq hər bir vətəndaşın vəzifəsidir. Xüsusilə gənc nəslin Vətənə sevgi, milli-mənəvi dəyərlərə hörmət və dövlətçilik ənənələrinə sədaqət ruhunda yetişdirilməsi böyük əhəmiyyət daşıyır. Çünki bugünkü nailiyyətlərin gələcəkdə də qorunması üçün tarixi yaddaşımızı yaşatmalı və qazanılmış uğurların mahiyyətini yeni nəsillərə çatdırmalıyıq.
8 Noyabr – Zəfər Günü Azərbaycan xalqının sarsılmaz iradəsinin, güclü dövlətçiliyinin və milli həmrəyliyinin təntənəsidir. Bu tarix təsdiqləyir ki, xalqın birliyi, dövlətin qətiyyəti və ordunun qüdrəti bir məqsəd ətrafında birləşdikdə ən böyük hədəflərə çatmaq mümkündür. Zəfər Azərbaycan tarixində əbədi yaşayacaq, şəhidlərin müqəddəs xatirəsi daim ehtiramla yad ediləcək. Müstəqil və suveren Azərbaycan isə əldə etdiyi tarixi nailiyyətlərə söykənərək gələcəyə inamla addımlamaqda davam edəcəkdir.
Bədəl Bədəlov,
Milli Məclisin deputatı
