10 fevral 2020 13:23
745

Avropada yüzlərlə aviareys ləğv olunub

Güclü “Kyara” fırtınası səbəbindən Avropanın şimal-qərbində, o cümlədən Böyük Britaniya və İrlandiyada yüzlərlə təyyarə və qatar reysləri ləğv olunub. Həmçinin La-Manş körfəzi üzərindən bərə hərəkəti dayandırılıb.

AZƏRTAC Qərb mətbuatına istinadla xəbər verir ki, Avropanın ən yüklü üçüncü hava limanı olan Sxipxol (Amsterdam) aeroportunda 240 aviareysin ləğv edildiyi bildirilir. Brüssel aeroportunda 60, Düsseldorf aeroportunda isə 120 reys ləğv olunub. Berlin, Münhen, Köln, Hannover, Frankfurt şəhərlərində də hava nəqliyyatının işində problemlər yaşanır

Kəskin hava şəraiti səbəbindən Böyük Britaniyada 60 min, İrlandiyada isə 10 min ev işıqsız qalıb. Uelsin şimal-qərbində küləyin sürəti saatda 150 kilometrə, Fransanın şimalında isə 140 kilometrə çatır.