Şəhid ailələrinin, Qarabağ müharibəsi əlillərinin sosial müdafiəsinin gücləndirilməsi dövlətimizin siyasətində prioritet məsələlərdəndir. Yanvarın 25-də  Prezident İlham Əliyev “Azərbaycan Respublikasının ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlilliyi müəyyən edilmiş şəxslərin və şəhid ailələrinin sosial-məişət şəraitinin yaxşılaşdırılması ilə bağlı bir sıra tədbirlər haqqında” Sərəncam imzalamaqla onlara göstərilən xüsusi qayğının davamlı olacağını bir daha nümayiş etdirib.

“Azərbaycan Bayrağı” ordenli, Azərbaycan Vətən Müharibəsi  Veteranları İctimai Birliyinin Nəsimi rayon şöbəsinin sədri, müharibə veteranı, ehtiyatda olan polkovnik Elmar Hüseynov mövzu ilə bağlı “İki sahil” qəzetinə  açıqlamasında bildirdi ki, Sərəncamda Əmək və Əhalinin Sosial Müdafiəsi Nazirliyinə ölkəmizin ərazi bütövlüyünün, müstəqilliyinin, konstitusiya quruluşunun müdafiəsi ilə əlaqədar əlilliyi müəyyən edilmiş şəxslərin, şəhid ailələrinin 2021–2025-ci illər ərzində mərhələlərlə mənzil və ya fərdi evlə təmin edilməsi öz əksini tapıb: “Şübhəsiz, şəhid ailələrinin, eləcə də əlillərin dövlət tərəfindən evlərlə və mənzillərlə təmin edilməsi təqdirəlayiqdir. Artıq neçə illərdir ölkəmizdə şəhid ailələri və Qarabağ müharibəsi əlillərinə mütəmadi olaraq  yeni mənzillər verilir. Halbuki dünyanın heç bir ölkəsində belə addımlar atılmır. Faşist xislətli Ermənistandan isə bu məsələ ilə bağlı danışmağa dəyməz. Üstəlik, şəhid ailələrinin və müharibə ilə əlaqədar əlilliyi olan şəxslərin digər problemləri də həllini tapır.”

İndiyədək 9100-dən çox mənzil və fərdi evin şəhid ailələrinə və müharibə ilə əlaqədar əlilliyi olan şəxslərə təqdim edildiyini vurğulayan müsahibimiz qeyd etdi ki, bu istiqamətdə mütəmadi addımların atılması heç də təsadüfi deyil: “Çünki bu kateqoriyaya daxil olan insanlar 30 ildən bəri Ermənistanın işğalı altında inləyən dədə-baba torpaqlarımızı böyük fədakarlıqla azad edərək Qarabağ nisgilimizə son qoyublar. Onlar haqq davasında əsl qəhrəmanlıq və şücaət göstəriblər və  xalqımıza çoxdan bəri gözlədiyi Böyük Qələbə sevinci yaşadıblar. Onlar bu müqəddəs yolda şəhid olmaqdan, sağlamlıqlarını itirməkdən çəkinməyiblər. Bununla həm ölkəmizin, həm də dünya hərb tarixinə yeni şərəfli səhifə yazaraq, ölkəmizin adını və nüfuzunu yüksəklərə qaldırıblar. Artıq bütün dünya Azərbaycanın qəhrəman oğullarının, canından keçən şəhidlərimizin, hərbçilərimizin möhtəşəm vətənpərvərliyindən, igidlik nümunələrindən danışmaqdadır. Belə şanlı tarix yazan şəxslər isə hər cür diqqətə və qayğıya layiqdirlər.

Yeri gəlmişkən onu da qeyd edim ki,  şəhidlik zirvəsinə yüksəlmiş və əlil olmuş vətəndaşlar üçün hər cür şəraitin yaradılmasını bizim mənəvi borcumuz kimi xarakterizə edən Prezident, Silahlı Qüvvələrin Ali Baş Komandanı İlham Əliyev əsgər və zabitlərimizin şücaətini, rəşadətini hər çıxışında yüksək dəyərləndirir. Dövlətimizin başçısı yanvarın 26-da Rəşad Nəbiyevi nəqliyyat, rabitə və yüksək texnologiyalar naziri təyin olunması ilə əlaqədar videoformatda qəbul edərkən də bu məsələyə toxunaraq demişdir ki, yeni texnologiyaların tətbiqi müharibədə qələbənin qazanılmasının əsas amillərindən biridir: “Ancaq mən bunu dəfələrlə demişəm, bir daha demək istəyirəm ki, torpaqları azad edən Azərbaycan əsgəri olub, Azərbaycan zabiti olub.” Bununla da Ali Baş Komandanımız Vətən müharibəsində qazanılan parlaq qələbənin qəhrəman şəhid və qazilərimizin canı-qanı bahasına əldə edildiyini bir daha xatırladıb. Məncə, bu sözlərlə müzəffər sərkərdəmiz 30 ildə dünyanın aparıcı dövlətlərinin, nüfuzlu beynəlxalq təşkilatlarının edə bilmədiklərini həyata keçirən əsgər və zabitlərimizə layiq olduqları qiyməti verib.”

Keçmiş köçkünlər üçün azad edilmiş yurd yerlərində evlərin tikiləcəyi nəzərə alınmaqla, Prezident İlham Əliyevin onlar üçün inşa olunmuş mənzillərin şəhid ailələrinə, müharibə ilə bağlı əlilliyi müəyyən edilmiş şəxslərə veriləcəyini xatırladan polkovnik Elmar Hüseynovun fikrincə, bu da onların mənzillə, evlə təminatında çox mühüm rol oynayacaq: “Yəni, onların hazırda yaşadıqları problem vaxtından əvvəl öz həllini tapacaq. Zənnimcə, 2021-ci il şəhid ailələrinə və müharibə ilə əlaqədar əlilliyi olan şəxslərə qayğının artırılması sahəsində mühüm irəliləyişlər ili olacaq. Eyni zamanda, həyata keçirilən bu kimi tədbirlər Azərbaycanı daha  güclü sosial siyasətə malik bir ölkə kimi tanıdacaq.”

Qvami Məhəbbətoğlu, “İki sahil”