30 mart 2023 20:06
730

Ucar rayonunda “Heydər Əliyev və Azərbaycançılıq məfkurəsi” mövzusunda konfrans keçirilib FOTO

Ucar rayonunda Azərbaycan Respublikasında 2023-cü ilin “Heydər Əliyev İli” elan edilməsi ilə əlaqədar Ucar Rayon İcra Hakimiyyətinin təşkilatçılığı ilə “Heydər Əliyev və Azərbaycançılıq məfkurəsi” mövzusunda konfrans keçirilib.

“İki sahil” xəbər verir ki,  konfransda Ucar Rayon İcra Hakimiyyətinin başçısı Mənsur Məmmədov, Milli Məclisin deputatı, Ailə, Qadın və Uşaq məsələləri komitəsinin sədr müavini xanım Jalə Əliyeva, rayonun hüquq mühafizə orqanlarının, idarə, müəssisə və təşkilatların rəhbərləri, rayon ziyalıları iştirak edib.

Əvvəlcə konfrans iştirakçıları tərəfindən Ümummilli Lider Heydər Əliyevin abidəsinin önünə gül-çiçək dəstələri qoyuldu.

Konfransda Ucar Rayon İcra Hakimiyyətinin başçısı Mənsur Məmmədov çıxış edərək qeyd etdi ki, Ulu Öndər Heydər Əliyev Azərbaycanı bir dövlət kimi zamanın ağır və sərt sınaqlarından uğurla çıxara bilmiş, ölkənin gələcək inkişaf strategiyasını müəyyən etmiş və onun həyata keçirilməsi üçün mühüm addımlar atmışdır. Həyatının mənasını xalqına xidmət etməkdə görən Ümummilli Lider Heydər Əliyevin siyasi irsinin nəticəsidir ki, bu gün müstəqil və demokratik Azərbaycan dövləti yaşayır və hərtərəfli inkişaf edir.

Bu gün Azərbaycan Respublikasının Prezidenti cənab İlham Əliyev Ümummilli Liderin siyasi kursunu layiqincə davam etdirir. Ulu Öndərin siyasətinin uğurla həyata keçirilməsi müstəqilliyimizi möhkəmləndirir, dövlətçiliyimizi qüdrətləndirir və beynəlxalq aləmdə Azərbaycan Respublikasının rolunu və nüfuzunu artırır.

Milli Məclisin deputatı, Ailə, Qadın və Uşaq məsələləri komitəsinin sədr müavini xanım Jalə Əliyeva, Göyçay İdarəetmə Kollecinin müəllimi, iqtisad elmləri namizədi Nurməmməd Tağıyev, Rayon Ağsaqqallar Şurasının sədri Mirzalı Ağamalıyev, Ucar Rayonu üzrə Təhsil sektorunun müdiri, fizika, riyaziyyat elmləri namizədi Rahib Bürcəliyev, Rayon Veteranlar Şurasının sədri Niyaz Xəlilov, ziyalı Hakim Nəcəfov mövzu ətrafında çıxış etdilər.