Türk dünyasının birliyi naminə misilsiz xidmətlər göstərən, Azərbaycan-Türkiyə dostluğuna və qardaşlığına böyük töhfələr verən, xalqımızın Ümummilli Lideri, müasir müstəqil Azərbaycan dövlətinin qurucusu, görkəmli siyasi və dövlət xadimi Heydər Əliyevin işıqlı xatirəsi qardaş ölkədə, eləcə də bütün türk dünyasında daim uca tutulur. Ulu Öndər Heydər Əliyev deyirdi: “Özünün yeni yüksəliş dövrünü yaşayan çağdaş türk dünyası bəşər sivilizasiyasına yeni misilsiz nümunələr vermək iqtidarındadır. Bu gün öz suverenliyini əldə etmiş bir çox türk cümhuriyyətlərinin bu sıraya qoşulması türk dünyasının gələcəyinə işıqlı ümidlər oyadır. İqtisadi, siyasi və mədəni həyatın sıx telləri ilə birləşməyə başlamış türk xalqları yeni dünyanın mühüm amillərindən birinə çevrilməkdədir”.
Ümummilli Liderin Azərbaycan-Türkiyə münasibətlərinin inkişafındakı, bütövlükdə türk dünyası qarşısındakı əvəzsiz xidmətləri tarixə qızıl hərflərlə yazılıb. Ulu Öndər Azərbaycan-Türkiyə münasibətlərinin inkişafına həmişə xüsusi diqqət yetirib. Əsrlər boyu türk xalqlarının birliyinə nail olmaq üçün tarixi şəxsiyyətlərimiz dövrün siyasi şəraitinə uyğun mübarizə aparıblar. XX əsrin əvvəllərində bu tarixi missiyanı Qazi Mustafa Kamal Atatürk, ötən əsrin sonlarından başlayaraq isə Ulu Öndər Heydər Əliyev uğurla həyata keçiriblər. Ümummilli Lider Heydər Əliyev ötən əsrin 90-cı illərində böyük bir uzaqgörənliklə Azərbaycanın karbohidrogen ehtiyatlarının işlənməsi və Qərbə doğru nəqlini təmin etməklə ölkələrimizin iqtisadi qüdrətini artırıb, beynəlxalq enerji təhlükəsizliyi məsələsində qardaş Türkiyənin gücünü durmadan artıran yeni bir güc mərkəzi yaradıb. Məhz buna görə də qardaş ölkədə Ulu Öndərin adının əbədiləşdirilməsi dahi şəxsiyyətin tarixi missiyası qarşısında türk xalqının mənəvi borcudur.
Dahi rəhbər Heydər Əliyevin düşünülmüş və cəsarətli qərarları, qətiyyətli addımları və təməlini qoyduğu uğurlu xarici siyasət nəticəsində bu gün Azərbaycan-Türkiyə münasibətləri bütün dünyada bənzəri olmayan dostluq, qardaşlıq və müttəfiqlik səviyyəsinə yüksəlib. Ulu Öndər 1997-ci il mayın 6-da Türkiyə Böyük Millət Məclisində çıxışında bildirmişdi ki, Türkiyə-Azərbaycan dostluğu əbədi və sarsılmazdır.
Ümummilli Liderin 1999-cu il noyabrın 1-də Beynəlxalq Atatürk Sülh Mükafatına layiq görülməsi bir daha təsdiqlədi ki, Heydər Əliyevin türk dünyası qarşısındakı əvəzsiz xidmətləri qardaş, dost Türkiyədə yüksək qiymətləndirilir. Mükafatın təqdim edilməsi münasibətilə keçirilən təntənəli mərasimdə çıxış edən Ulu Öndər demişdir: “Mən bu gün böyük həyəcan içindəyəm, çünki Türkiyə dövlətinin qurucusu, böyük öndər Atatürkün adını daşıyan beynəlxalq sülh, barış mükafatına layiq görülmüşəm. Bu mükafatı mənə belə təntənəli şəraitdə-ən yüksək vəzifəli şəxslərin iştirakı ilə Türkiyə Cümhuriyyətinin başçısı, əziz dostum, qardaşım Süleyman Dəmirəl təqdim etdi. Mən həyatımda çox mükafatlar almışam. Ancaq Türkiyə Cümhuriyyətinin banisi, böyük öndər Mustafa Kamal Atatürkün adını daşıyan sülh mükafatını almaq mənim üçün böyük şərəfdir. Bu mükafat indiyə qədər aldığım mükafatların hamısından yüksək və qiymətlidir”.
Türk dünyasının birliyi naminə misilsiz xidmətlər göstərən, Azərbaycan-Türkiyə dostluğuna və qardaşlığına böyük töhfələr verən Ümummilli Liderimizin işıqlı xatirəsi qardaş ölkədə daim uca tutulur. Belə ki, 2012-ci ildə Ulu Öndərin vəfatının 9-cu ildönümü ilə əlaqədar Ankaranın Yeniməhəllə rayonunda Heydər Əliyev Parkının və Heydər Əliyev adına orta məktəbin açılış mərasimi olub.
Qürurverici haldır ki, “Əsrin müqaviləsi”nin tərkib hissəsi olan, XXI əsrin ən böyük enerji layihəsi adlandırılan, 2006-cı il iyulun 13-də Prezident İlham Əliyevin iştirakı ilə Türkiyənin Ceyhan şəhərində açılış mərasimi keçirilən Bakı-Tbilisi-Ceyhan əsas ixrac boru kəmərinə də qardaş Türkiyə Cümhuriyyəti tərəfindən Ulu Öndər Heydər Əliyevin adı verilib. Həmçinin 2018-ci ildə İzmir şəhərinin Karşıyaka rayonunda Ümummilli Lider Heydər Əliyevin adına salınmış parkın və abidənin açılışı, Türkiyə Cümhuriyyətinin qurucusu Mustafa Kamal Atatürkün ən çox sevdiyi və ömrünün çox hissəsini keçirdiyi bu şəhərdə dahi şəxsiyyət Heydər Əliyevin adının əbədiləşdirilməsi türk dünyasının hər iki şəxsiyyətinə verdiyi ən böyük dəyərdir.
Türkiyə Cümhuriyyətinin Prezidenti Rəcəb Tayyib Ərdoğan 2022-ci il oktyabrın 20-də Cəbrayıl şəhərində səfərində olarkən bildirib ki, türk xalqı 2023-cü ilin Azərbaycanda “Heydər Əliyev İli” elan edilməsindən məmnunluq duyur: “Ümummilli liderimiz Heydər Əliyevin əziz xatirəsini birlikdə yaşatmağa davam edəcəyik. Rəbbim birliyimizi, bərabərliyimizi əbədi etsin! Yaşasın Azərbaycan-Türkiyə qardaşlığı!”.
Böyük qürur hissi ilə demək lazımdır ki, Qazi Mustafa Kamal Atatürkün “Azərbaycanın sevinci bizim sevincimiz, kədəri isə bizim kədərimizdir” və Ulu Öndər Heydər Əliyevin “Bir millət, iki dövlət” müdrik kəlamları bu gün Türkiyə-Azərbaycan münasibətlərinin tarixini və gələcək perspektivlərini özündə dəqiq ifadə edən ən mükəmməl formul kimi qəbul edilməkdədir. Həqiqətən də hazırda Türkiyə Azərbaycan üçün beynəlxalq aləmdə necə müttəfiq və dayaqdırsa, Azərbaycanın da güclü dövlət olması Türkiyənin dünya siyasətində gücünün və rolunun artırması deməkdir.
Ulu Öndər Heydər Əliyevin türk dünyası ilə siyasi, diplomatik, iqtisadi, sosial, hərbi sahələri əhatə edən çoxşaxəli fəaliyyəti nüfuzlu dövlət xadimləri, dünya şöhrətli alimlər, yazıcı və mütəfəkkirlər tərəfindən daim çox yüksək qiymətləndirlir. Görkəmli qazax yazıcısı Oljas Süleymenovun türk dünyasının fenomen lideri Heydər Əliyev haqqında dedikləri bunun əyani təsdiqidir: “Böyük siyasətçi və dövlət xadimi Heydər Əliyevi ata qədər sevmiş, fəaliyyətini həmişə dəyərləndirmişəm. Heydər Əliyev dahi şəxsiyyətdir. XX əsrdə Avrasiyada dövlət ideyalarını inkişaf etdirən bu nadir şəxsiyyət əlaqələrimizi nəinki Azərbaycanla, həm də türk dünyası ilə bağlayan görkəmli siyasətçilərdən idi. Onun həyatı və dünyagörüşü xalqlarımızın mənəvi dünyasını zənginləşdirdi”.
Prezident İlham Əliyevin Ulu Öndərin 100 illik yubileyinin dövlət səviyyəsində qeyd edilməsini təmin etmək üçün Azərbaycan Respublikasında 2023-cü ilin “Heydər Əliyev İli” elan edilməsi haqqında Sərəncamında deyilir: “Heydər Əliyev xalqını zamanın mürəkkəb tarixi-siyasi sınaqlarından uğurla çıxarmış və ardıcıl mübarizə apararaq onu müstəqilliyə qovuşdurmuş qüdrətli şəxsiyyətdir. Müstəqil Azərbaycan Ulu Öndərin indiki və gələcək nəsillərə əmanəti, onun zəngin və çoxşaxəli irsi isə xalqımızın milli sərvətidir. Bu müqəddəs mirası qoruyub saxlamaq hər bir azərbaycanlının şərəfli vəzifəsidir”.
Zahid Rza, “İki sahil”
