Birləşmiş Ərəb Əmirliklərinin “Mubadala Capital” şirkəti növbəti on il ərzində Braziliyanın bioyanacaq bazarına 13,5 milyard dollar sərmayə qoymağı öhdəsinə götürüb. Nəticədə bazarın əhəmiyyətli dərəcədə böyüyəcəyi proqnozlaşdırılır.

Braziliya rəsmisi Oskar Fahlqren “Financial Times”a müsahibəsi zamanı təşəbbüsün büdcəsini açıqlayıb. O,  ilk növbədə qeyri-ərzaq bitki materiallarından istifadə etməklə bərpaolunan dizel və dayanıqlı aviasiya kerosini istehsal etmək planlarının təfərrüatlarını açıqlayıb. Müsahibədə Fahlqren “Mubadala”nın Braziliyadakı törəmə şirkəti “Acelen”in 2026-cı ilə qədər genişmiqyaslı bioyanacaq layihəsinin inkişafına təşəbbüs göstərəcəyini söyləyib.

Bu təşəbbüs hər biri 2,7 milyard dollar dəyərində olan beş modulu əhatə edəcək və gündə 20 min barel yanacaq emal edə biləcək yeni bioemal zavodunu özündə birləşdirəcək. Bundan əlavə, buraya giriş məhsulunu saxlamaq üçün lazımi infrastruktur və becərilən sahələr daxil olacaq.

“Burada bütün xammal əslində kənd təsərrüfatıdır. İqlim və münbit torpağa görə əkinçilik məhsuldarlığına gəlincə, Braziliya yəqin ki, planetin ən yaxşı ölkəsidir",-deyə Fahlqren əlavə edib. "Əbu-Dabi neft üçün nədirsə, Braziliya kənd təsərrüfatı üçün odur",-Oskar Fahlqren bildirib.

"Bu, çox vacib bir kapital layihəsidir. Mən Braziliyada yaşıl enerji keçid məkanına investisiya etmək üçün böyük fürsət görürəm",-deyə ölkə rəsmisi vurğulayıb.

“Mubadala” şirkəti, həmçinin Amerika Ticarət Qrupu vasitəsilə gələn il Braziliyada birja açmağı da planlaşdırır.

“Braziliya çox böyük ölkədir. Onun yalnız bir fond birjası var. Düşünürəm ki, bu, bu seqmentdə fəaliyyət göstərən şirkətlər üçün optimal deyil”,- Fahlqren deyib.

Nubar Süleymanova, “İki sahil”