Çində səfərdə olan energetika naziri Pərviz Şahbazov “TBEA Co.,Ltd” və “PowerChina International Group” şirkətləri ilə bərpa olunan enerji sahəsində əməkdaşlıq əlaqələrinin inkişafını müzakirə edib.

"İki sahil” Energetika Nazirliyinə istinadən xəbər verir ki, “TBEA Co.,Ltd” İdarə Heyətinin sədri Zhang Xin ilə görüşdə şirkətin istehsal, mühəndislik xidmətləri, satınalma, tikinti, enerjinin ötürülməsi və paylanması, elektrik stansiyaları, bərpa olunan enerji mənbələri və digər infrastruktur layihlələrinin maliyyələşdirilməsi üzrə fəaliyyəti barədə məlumat verilib.

TBEA şirkəti ilə Azərbaycanla bərpa olunan enerji avadanlıqlarının istehsalı, texnologiyaların təchizatı sahələrində, həmçinin regional “yaşıl enerji” infrastrukturu layihələrində əməkdaşlıq imkanları müzakirə edilib. Nazirliklə TBEA arasında əməkdaşlığa dair Anlaşma Memorandumunun imzalanması nəzərdən keçirilib. Söhbət zamanı COP29 çərçivəsində əməkdaşlığa da toxunulub.

“PowerChina International Group” şirkətinin vitse-prezidenti Yang Yisheng ilə görüşdə isə iki ölkə liderlərinin Azərbaycan-Çin münasibətlərini strateji tərəfdaşlığa yüksəldən siyasətinin “yaşıl enerji” sahəsində geniş əməkdaşlığı təşviq etdiyi bildirilib. Bu kontekstdə PowerChina şirkəti ilə Azərbaycanın bərpa olunan enerjinin inkişafı ilə bağlı növbəti mərhələsi və “yaşıl enerji dəhliz”lərini əhatə edən beynəlxalq miqyaslı fəaliyyəti çərçivəsində yeni əməkdaşlıq perspektivləri dəyərləndirilib. Həmçinin Xızı və Abşeronda 240 MVt-lıq külək enerjisi layihəsinin həyata keçirilməsində və 100 MVt gücündə Qobustan Günəş Elektrik Stansiyası üzrə keçirilən hərrac prosesində şirkətin iştirakından məmnunluq ifadə edilib. “PowerChina” şirkəti Xəzər dənizində külək enerjisinin istehsalı, bu enerjinin ötürülməsi və bərpa olunan enerjinin digər istiqamətləri üzrə əməkdaşlığa dəvət edilib.

***

Azərbaycanın Energetika Nazirliyi və Çinin TBEA şirkəti arasında Anlaşma Memorandumunun imzalanmasına dair fikir mübadiləsi aparılıb.

“İki sahil” xəbər verir ki, bunu Azərbaycanın energetika naziri Pərviz Şahbazov “X” hesabında bildirib.

Nazir qeyd edib ki, Pekində TBEA şirkətinin İdarə Heyətinin sədri Zhang Xin ilə səmərəli görüş olub: “Şirkətlə Azərbaycanda bərpa olunan enerji avadanlıqlarının istehsalı, texnologiyaların təchizatı sahələrində, həmçinin regional “yaşıl enerji” infrastrukturu layihələrində əməkdaşlıq imkanları müzakirə edilib”.