Xankəndidə keçirilən III Şuşa Qlobal Media Forumu ilə bağlı xarici KİV-lərdə yayılan açıqlamaların hər biri Prezident İlham Əliyevin daxili və xarici siyasətinə, diplomatik uğurlarına verilən "əla" qiymətdir
Dünya siyasətinə baxış kimi dəyərləndirilən, biri-birindən əhəmiyyətli problemlərin həlli üçün siyasi , iqtisadi, humanitar platformaya çevrilən, regional və qlobal miqyasda mövqelərini möhkəmləndirən Azərbaycan ev sahibliyi etdiyi III Şuşa Qlobal Media Forumu ilə yenə də dünya ictimaiyyətinin diqqətini cəlb etdi. Avropa Oyunları, İslam Həmrəyliyi Oyunları, Formula1 yarışları, BMT və TÜRKSOY kimi beynəlxalq təşkilatların forumları, COP29 iqlim konfransı kimi tədbirlər ölkəmizin diplomatik çevikliyinin, təşkilatçılıq potensialının təzahürüdür. Auditoriyasının genişliyi, cografiyasının müxtəlifliyi, müzakirə olunan mövzularının hədəfə ünvanlanması baxımından daha çox diqqətçəkən, artıq ənənəvi xarakter alan Şuşa Qlobal Media forumlarına artan maraq Prezident İlham Əliyev tərəfindən səsləndirilən strateji mesajların beynəlxalq ictimaiyyət tərəfindən dəstəklənməsinin ifadəsidir.
III Şuşa Qlobal Media Forumunun Azərbaycanın suverenliyinin tam və qəti təsdiqi olan Xankəndidə keçirilməsi təkcə rəmzi məna daşımır. Bu seçim Azərbaycanın müstəqil dövlət kimi bütövlüyünün, varlığının, ölkə qanunlarına hər kəsin hörmətlə yanaşmasının vacibliyini bildirən siyasi və hüquqi mesajdır: «Qarabağ artıq separatizm yuvası deyil, yenidən qurulan sülh, inkişaf və əməkdaşlıq məkanıdır.»
Mahiyyət etibarilə daha çox informasiya resurslarında çalışanların iştirakı ilə keçirilən Forum dünya hadisələrinə, siyasi situasiyalara, bu gün daha çox ehtiyac duyulan iqtisadi əməkdaşlığa, enerji təhlükəsizliyinin təminatına, qlobal nəqliyyat layihələrinin həllinə istiqamətlənmiş çağırış məkanıdır. Dünya ictimaiyyətini narahat edən hadisələrin obyektiv təhlili platformasıdır. Dörd saata yaxın davam edən Forumun açılış mərasimində siyasi mənsubiyyətindən, təmsil etdiyi ölkənin mövqeyindən asılı olmayaraq verilən bütün sualları məntiqlə cavablandıran Prezident İlham Əliyev liderliyin daha bir ustad dərsinə imza atdı. Qlobal münaqişələrdən, müharibələrdən sarsılan dünyamızın real informasiyalara daha çox ehtiyacının olduğunu təhlili açıqlamaları ilə diqqətə çatdırdı. Bölgədə yeni reallıqlar yaradan Azərbaycandan səsləndirilən humanizmə, qarşılıqlı əməkdaşlığa çağırış mesajları ilə bağlı xarici KİV-lərdə dərc olunan təhlili yazılar Prezident İlham Əliyevin xoşniyyətli siyasətinə gerilən dəyərdir.
ABŞ Prezidenti Donald Trampın öz sosial şəbəkəsində Prezident İlham Əliyevin Şuşa Qlobal Media Forumundakı çıxışı ilə bağlı paylaşımı, dövlət başçmızın bu cür diqqət üçün amerikalı həmkarına minnətdarlıq etməsi dünya siyasətində az təsadüf olunan siyasi həmrəylik nümunəsidir. Qlobal, regional sülh gündəliyinə sadiqliyi ilə bağlı fikirlərini öz sosial media platformasında paylaşdığına görə Ağ Evin sahibinə minnətdarlığını «Mən bir daha Prezident Trampın bütün dünyada, o cümlədən regionumuzda sülhün və sabitliyin təşviq edilməsi ilə bağlı baxışını və səylərini dəstəklədiyimizi vurğulamaq istəyirəm. Biz, həmçinin ailə ənənələrinin əhəmiyyəti kimi ortaq dəyərləri bölüşürük və onun prezidentliyi dövründə ABŞ-Azərbaycan münasibətlərinin yeni səviyyəyə qalxacağına ümid edirik» sözləri ilə bildirən, bölgədə sabitliyin tərəfdarı olan Prezident İlham Əliyevin qlobal enerji, nəqliyyat layihələrinin şaxələnməsi istiqamətində davam etdirdiyi strategiya beynəlxalq səviyyədə dəstəklənir.
Cənubi Qafqaz , Mərkəzi Asiya , Şərqdə və Qərbdə yerləşən ölkələr arasında əməkdaşlığın genişlənməsi dövlətlərarası təhlükəsizlik və inkişaf üçün perspektivləri artırır. Etimad prinsipinə əsaslanan qonşularla xoş münasibətlər üçün münbit şərait formalaşdırır. Forumda qeyd olunduğu kimi, bu amillər olmadığı təqdirdə hansısa ölkənin tranzit rolundan söhbət gedə bilməz. Ölkəmizdə bu sahədə də formalaşan diplomatik fəaliyyət respublikamızın etibarlı tərəfdaş imicini artırır. Prezident İlham Əliyevin artıq aforizmə çevrilən «Biz nümayiş etdirməyə çalışmışıq ki, ölkəmiz etibarlı tərəfdaşdır və sözümüzün imzamız qədər dəyəri var. Bu, bu günə qədər də məhz belə olmuşdur» sözləri beynəlxalq əməkdaşlıq üçün etibarlı qarantdır. «Bağlantı layihələrinə gəldikdə, biz, ilk növbədə, Orta Dəhlizi qeyd etməliyik. Bu, bu gün çox geniş coğrafiyanı birləşdirən bir layihədir. Mən artıq bir neçə dövləti qeyd etdim. Həmin dəhliz Şərqdən Qərbi Avropaya qədər uzanır və bu da müxtəlif aktorlar arasında anlaşmaya səbəb olacaq. Burada daha çox anlaşmaya ehtiyac var» sözləri ilə Azərbaycanın enerji, nəqliyyat layihələrinin qarşılıqlı əməkdaşlıq üçün etibarlı vasitə olduğunu qeyd edən Prezident İlham Əliyev ilk növbədə xarici müdaxilələrə qarşı barışmaz mövqeyini ifadə edir.
Azərbaycanın yaşıl enerji gündəliyi ilə bağlı təşəbbüslərinin geniş miqyasda dəstəklənməsi reallıqdır. Ötən il Azərbaycanda keçirilən COP29-da 2030-cu ilə qədər artıq imzalanmış investisiya müqavilələri əsasında ölkəmizdə ən azı 6 giqavatlıq yaşıl enerjini, o cümlədən Günəş, külək və su elektrik enerjisinin istehsalı ilə bağlı öhdəliklər də göstərir ki, iqlim dəyişmələri üzrə təşəbbüslərin müəllifi olan Azərbaycanda həyata keçirilən «Yaşıl Keçid Proqramı»” bütün region üçün əhəmiyyətlidir. «Bir daha qeyd etmək lazımdır ki, Azərbaycana gəldikdə, təsəvvür edə bilərsiniz, biz karbon emissiyalarına ən böyük töhfə verən tərəf deyilik. Lakin bununla belə, yaşıl gündəliyimiz və körpü salmaq, müxtəlif tərəflər arasında anlaşma yaratmaq kimi məsələlərdə göstərdiyimiz səylər BMT və bir çox beynəlxalq tərəfdaşlar tərəfindən lazımınca dəyərləndirilir. Bizə gəldikdə, bir daha qeyd edim ki, yaşıl gündəliyimizə sadiq qalacağıq.» sözləri ilə müxtəlif ölkələrin enerji ilə təminatında Azərbaycanın artan rolunu diqqətə çatdıran Prezident İlham Əliyev ölkələrin siyasi təhlükəsizliyinin , regional sabitliyin, dövlətlərin ərazi bütövlüyünün qorunmasını dünya siyasətinin aktual məsələsi kimi diqqətə çatdırır: «Regional gündəliyə gəldikdə, onu da qeyd edə bilərəm ki, biz yaşıl enerji layihələri üzərində çalışırıq. Çünki təkcə Azərbaycanda deyil, Mərkəzi Asiya ölkələrində də Günəş və külək elektrik enerjisi stansiyaları yaradılır. Ötən ilin noyabrında Bakıda COP29 çərçivəsində Özbəkistan, Qazaxıstan və Azərbaycan prezidentləri arasında yaşıl enerji ilə bağlı Xəzər dənizinin dibi ilə elektrik kabelinin çəkilməsi layihəsi imzalandı ki, Mərkəzi Asiyada istehsal olunan yaşıl enerji Azərbaycanın infrastrukturuna birləşdirilsin. Ona qədər Azərbaycan, Gürcüstan, Rumıniya, Macarıstan arasında da buna bənzər sənəd imzalandı ki, belə bir yaşıl enerji kabeli Qara dənizin dibi ilə çəkilsin. Yəni, region təkcə Cənubi Qafqazı əhatə etmir. Biz daha geniş coğrafiyanı əhatə edirik. Ancaq burada mərkəzi nöqtə məhz Azərbaycandır.»
Forumda yaddaqalan məqamlardan biri də Ukraynanın «Gordon»” media qurumunun təsisçisi, jurnalist Dmitro Qordonun sualı olub. Sualı Ermənistanın 30 il davam edən işğalçılıq siyasəti, İkinci Qarabağ müharibəsində qazandığımız Zəfər baxışından cavablandıran Prezident İlham Əliyevin «Bir neçə il əvvəl tədbirlərin birində Ukrayna nümayəndəsinin oxşar sualına cavab vermək imkanım olmuşdu. İndi verdiyim cavab ozamankı cavabımdan fərqli olmayacaq və düşünürəm ki, bu, Ukrayna xalqının istəkləri ilə də səsləşir – heç vaxt işğalla barışmamaq. Bu, əsas tövsiyədir. Bizim etdiyimiz də bu idi. Daha doğrusu, biz bu prosesi belə görürdük» sözləri Qələbəyə aparan yolun bələdçisi təsəvvürü formalaşdırdı. Dünyada bir sensasiya yaratdı. Prezident İlham Əliyev auditoriya qarşısında Zəfərə aparan yolla bağlı ustad dərsi keçərək «Nəyi, necə, nə vaxt» etməyin düsturunu beynəlxaq hüquqa əsaslanaraq Ukrayna variantı üçün təkmilləşdirdi. Məhkum olduğumuz çətin məqamlarda «qəbuledilməz»” əvəzinə «dayanıqsız» mesajlarının nə məqsədlə ortaya atıldığını liderlik qətiyyəti ilə açıqladı: «Amma əvvəl dediyimə qayıdıram: heç vaxt təslim olmamaq və heç vaxt ərazi bütövlüyünün pozulması ilə barışmamaq.» Bu ədaləti əldə etmək üçün hər gün işləmək, hər gün qələbəyə yaxınlaşmaq lazımdır. Əgər son qərar səndən asılıdırsa, həyatını bu işə həsr etməlisən. Ümidlər yalnız bu halda doğrula bilər: «Odur ki, əvvəldə dediyimə qayıdıram – heç vaxt təslim olmamaq!»
Xuraman İsmayılqızı, «İki sahil»
