Macarıstanın Baş naziri Viktor Orban Rusiya ilə Ukrayna arasındakı münaqişənin, eləcə də Avropa İttifaqı daxilində artan fikir ayrılıqlarının “kritik nöqtəyə” çatdığını bildirib.

“İki sahil” xəbər verir ki, Macarıstan liderinin sözlərinə görə, Avropa gələcək strategiyasını müəyyənləşdirməlidir, çünki mövcud siyasət, onun fikrincə, nəticə vermir.

Orban vurğulayıb ki, ABŞ Prezidenti Donald Tramp hər iki tərəf üçün kompromis həlli ehtimal edən, münaqişənin yeni həll planı üzərində işləyir. Buna görə də, Baş nazirin iddia etdiyi kimi, Avropa seçim ilə üzləşir: Vaşinqtonun sülh səylərini dəstəkləmək və ya Kiyevə hərbi dəstək üçün əhəmiyyətli resurslar yatırmağa davam etmək.

Macarıstanın Baş naziri bildirib ki, uzun sürən çıxılmaz vəziyyətdən çıxış yolu yalnız Avropa ölkələri “üç il yarım davam edən eskalasiyanın” uğursuzluğa düçar olduğunu və Avropa vergi ödəyiciləri üçün əhəmiyyətli maliyyə yükünə çevrildiyini etiraf etdikdə mümkündür.

Orban xəbərdarlıq edib ki, mövcud kursun davam etdirilməsi yalnız Avropa İttifaqı ilə Rusiya arasında qarşıdurmanı dərinləşdirəcək. O vurğulayıb ki, Budapeşt sülh yolu ilə həlli təşviq etməyə davam etmək niyyətindədir, çünki hərbi yolu perspektivsiz hesab edir.