Prezident İlham Əliyevin müsahibədə ən çox diqqət çəkən fikirlərindən biri beynəlxalq münasibətlər sistemində baş verən transformasiya ilə bağlı oldu. Dövlət başçısı vurğuladı ki, dünya artıq əvvəlki kimi beynəlxalq hüququn universallığına əsaslanan sistemlə idarə olunmur, getdikcə güc amili və milli maraqlar daha çox ön plana çıxır. Bu fikirlər qlobal miqyasda müşahidə olunan proseslərin dəqiq təsviridir.
Müharibələr, regional münaqişələr, böyük güclər arasında rəqabətin kəskinləşməsi beynəlxalq hüququn təsir imkanlarını xeyli zəiflədib. Prezidentin bu reallığı açıq şəkildə ifadə etməsi Azərbaycanın dünya siyasətinə romantik deyil, real və praqmatik baxışla yanaşdığını göstərir. Bu yanaşma ölkənin xarici siyasət strategiyasının əsas xəttini təşkil edir: milli maraqların qorunması, təhlükəsizliyin təmin edilməsi və müstəqil qərarvermə.
Bu mesaj beynəlxalq auditoriya üçün də mühüm siqnaldır. Azərbaycan artıq qlobal proseslərin passiv müşahidəçisi deyil, öz mövqeyini aydın ifadə edən və regional sabitliyin formalaşmasında fəal iştirak edən aktordur.
Müsahibənin mühüm istiqamətlərindən biri regionda təhlükəsizlik və sabitlik mövzusu oldu. Prezident İlham Əliyev qeyd etdi ki, Azərbaycan daxilində vəziyyət sabitdir, lakin qonşu regionlarda baş verən proseslər diqqətlə izlənilir. Xüsusilə Yaxın Şərq və İran ətrafında müşahidə olunan qeyri-sabitlik risk amili kimi dəyərləndirildi.
Bu fikirlər Azərbaycanın təhlükəsizlik siyasətinin yalnız daxili deyil, regional ölçülərini də əhatə etdiyini göstərir. Müasir dünyada heç bir ölkə özünü tam təcrid edə bilməz. Regional münaqişələr, miqrasiya axınları, enerji marşrutlarının təhlükəsizliyi kimi məsələlər birbaşa milli təhlükəsizliklə bağlıdır.
Prezidentin vurğuladığı əsas məqam ondan ibarətdir ki, sabitlik və proqnozlaşdırılan mühit inkişaf üçün əsas şərtdir. Bu, Azərbaycanın son illərdə yürütdüyü siyasətin fəlsəfəsini əks etdirir: müharibədən sonrakı dövrdə regionda sülhün və əməkdaşlığın qurulması, iqtisadi əlaqələrin genişləndirilməsi və qarşılıqlı etimadın bərpası.
Müsahibənin xüsusi yer tutan mövzularından biri də enerji siyasəti oldu. Prezident İlham Əliyev Azərbaycanın hazırda Avropa və digər regionlara enerji ixrac edən mühüm ölkə olduğunu, qazın artıq onlarla ölkəyə çatdırıldığını qeyd etdi. Bu fakt Azərbaycanın yalnız enerji istehsalçısı deyil, həm də Avropanın enerji təhlükəsizliyində mühüm tərəfdaş olduğunu göstərir.
Enerji diplomatiyası Azərbaycanın xarici siyasətində strateji alətə çevrilib. Enerji layihələri vasitəsilə ölkə həm iqtisadi gəlir əldə edir, həm də siyasi nüfuzunu artırır. Avropanın enerji təhlükəsizliyində Azərbaycanın rolunun artması ölkəmizin beynəlxalq münasibətlərdə etibarlı və məsuliyyətli tərəfdaş imicini möhkəmləndirir.
Bu kontekstdə Prezidentin mesajı aydındır: Azərbaycan enerji resurslarından yalnız iqtisadi deyil, həm də siyasi sabitliyə xidmət edən vasitə kimi istifadə edir. Bu siyasət ölkənin qlobal miqyasda mövqelərini gücləndirir və yeni tərəfdaşlıqlar üçün imkanlar açır.
Prezident İlham Əliyevin müsahibəsi bütövlükdə qlobal ictimaiyyətə ünvanlanan mühüm mesajlar toplusudur. Bu mesajların əsas xətti belə ifadə oluna bilər: müasir dünyada uğur qazanmaq üçün hər bir ölkə öz gücünə, potensialına və milli maraqlarına əsaslanmalıdır, eyni zamanda mümkün qədər geniş əməkdaşlıq şəbəkəsi qurmalıdır.
Azərbaycan bu strategiyanı ardıcıl şəkildə həyata keçirir. Balanslaşdırılmış xarici siyasət, enerji diplomatiyası, regional sülh təşəbbüsləri və müstəqil mövqe ölkənin beynəlxalq nüfuzunu artırır. Prezidentin Davosda verdiyi müsahibə bu siyasətin məntiqi davamı kimi çıxış edir.
Beynəlxalq münasibətlərdə yeni reallıqların qəbul edilməsi, regional sabitliyə verilən önəm, enerji diplomatiyasının gücləndirilməsi və suverenlik prinsipinə sadiqlik bu müsahibənin əsas siyasi xəttini təşkil edir. Bu xətt Azərbaycanın gələcək illərdə də müstəqil, balanslı və fəal xarici siyasət yürüdəcəyini göstərir.
Əminə Ağazadə,
Milli Məclisin deputatı
