Şimali Kipr Türk Cümhuriyyəti (ŞKTC) Kiprdəki ziddiyyətlərin həll edilməsi məsələsində Türkiyə ilə addımlarını sıx əlaqələndirməyə davam edəcək. Biz danışıqlar naminə danışıqların əleyhinəyik. Biz 5+1 formatında (üç qarant ölkə - Türkiyə, Yunanıstan və Birləşmiş Krallıq, iki Kipr icması və BMT - red.) daxil olmaqla, dialoqun effektivliyinin tərəfdarıyıq.

“İki sahil” xəbər verir ki, bu barədə Şimali Kipr Türk Cümhuriyyətinin (ŞKTC) Prezidenti Tufan Erhürman BMT-nin Baş katibi Antonio Quterreş və Kipr Respublikasının Prezidenti Nikos Xristodulidis ilə üçtərəfli görüşdən sonra bildirib.

Kiprli türklərin liderinin sözlərinə görə, konkret həll yollarına nail olmaq naminə sülh prosesində gələcək addımlar üçün dəqiq metodologiyanın müəyyən edilməsi vacibdir.

“Biz dialoqun uzadılmasına çalışmırıq, əksinə aydın nəticələr istəyirik. Mən Nikos Xristodulidis ilə həftədə ən azı bir dəfə görüşməyə hazıram. Biz Kipr icmaları arasında etimadın artırılmasına dair tədbirlərin tərəfdarıyıq”, - deyə siyasətçi bildirib.

T.Erhürman daha sonra bildirib ki, Kiprdə silahlanma yarışı yolverilməzdir, çünki bu, Kiprin hər iki xalqı üçün təhlükəsizlik riskləri yaradır.

“Kiprdəki problemlərin həlli bütün regionda sabitliyə, sülhə və inkişafa töhfə verəcək. Şərqi Aralıq dənizi ölkələri böyük layihələri birgə həyata keçirə biləcəklər”, - deyə ŞKTC Prezidenti əminliklə bildirib.

Siyasətçi Avropa İttifaqının Kipr üzrə danışıqların tərəfi olmadığını vurğulayıb və Aİ qurumlarının, xüsusən də Avropa Parlamentinin Kipr məsələsində qərəzli mövqeyini xatırladıb.