Almaniya Prezidenti Frank-Valter Ştaynmayer hökumətin tərkibində kadr dəyişikliklərini təsdiqləyib.

“İki sahil” xəbər verir ki, Prezidentin iqamətgahında keçirilən mərasimdə kabinetin tərkibindən çıxan və yeni təyin olunan şəxslərə müvafiq sənədlər təqdim edilib. Belə ki, Torsten Fray xüsusi tapşırıqlar üzrə nazir və Kansler Ofisinin rəhbəri, Patrik Şnayder nəqliyyat naziri, Nina Varken isə səhiyyə naziri vəzifələrindən azad olunublar. Digər fərmanlarla Nina Varken xüsusi tapşırıqlar üzrə nazir və Kansler Ofisinin rəhbəri, Karsten Linneman səhiyyə naziri, Şteffen Bilger isə nəqliyyat naziri vəzifələrinə təyinat alıblar.

Mərasimdə çıxış edən Frank-Valter Ştaynmayer mövcud mürəkkəb geopolitik şəraitdə, qlobal böhranlar və daxili islahatlar fonunda hökumətin fəaliyyət qabiliyyətinin və qətiyyətinin qorunmasının vacibliyini diqqətə çatdırıb. O, vəzifəsinin icrasını başa vuran nazirlərə xidmətlərinə görə minnətdarlıq edib, yeni təyin olunan Kabinet üzvlərinə uğurlar arzulayıb. Yeni təyin olunmuş nazirlərin Bundestaqın yay fasiləsindən sonra keçiriləcək ilk iclasında parlament qarşısında and içəcəkləri gözlənilir.

Qeyd edək ki, T.Fray Xristian Demokratlar İttifaqı/Xristian Sosialistlər İttifaqı (CDU/CSU) blokunun parlament fraksiyasının rəhbəri seçilib. Fraksiya üzvlərinin 91,9 faizinin səsini alan T.Fray bir neçə gün əvvəl bu vəzifədən istefa vermiş Yens Şpanı əvəzləyib.