ABŞ-nin İsraildəki səfiri Mayk Hakabi və ABŞ-nin Livandakı səfiri Mişel İssa İsrail ilə Livan arasında münaqişənin tənzimlənməsində əldə olunan irəliləyişi müzakirə etmək üçün İsrailin baş naziri Binyamin Netanyahusu ilə görüşüblər.
“İki sahil” xəbər verir ki, bu barədə Hakabi "X" sosial şəbəkəsindəki səhifəsində yazıb.
"İsrail və Livan arasında ABŞ-nin təşkilatçılığı ilə keçirilən danışıqlardakı irəliləyişi müzakirə etmək üçün İsrailin baş naziri və ABŞ-nin Livandakı səfiri Mişel İssa ilə görüşdüm", — deyə Hakabi qeyd edib.
O əlavə edib ki, Vaşinqtonun nöqteyi-nəzərindən nizamlanma yolunda yeganə maneə "Hizbullah" hərəkatı olaraq qalır.
Əvvəllər "Al Jazeera" telekanalı ABŞ-dəki mənbələrə istinadla xəbər vermişdi ki, Livan və İsrail arasında yeni danışıqlar raundu sentyabrın əvvəlində Romada keçirilməlidir. "Al Mayadeen" telekanalı da göstərmişdi ki, avqustun 4-6-da Romada keçirilən danışıqların yeddinci raundunun yekunlarına əsasən, Amerika və İsrail tərəfləri artıq razılaşdırılmış iki rayonda irəliləyiş əldə olunana qədər Livanın təklif etdiyi "pilot zonaların" genişləndirilməsindən imtina ediblər.
İyunun 26-da Livan və İsrail Vaşinqtonda ABŞ-nin havadarlığı ilə keçirilən beş danışıqlar raundundan sonra çərçivə sazişi imzalayıblar. Həmin sazişə uyğun olaraq, Livan silahlı qüvvələri ölkənin bütün ərazisi üzərində nəzarəti tədricən bərpa etməlidir. Razılaşmalar İsrail qoşunlarının təxliyə ediləcəyi "pilot zonaların" yaradılmasını nəzərdə tutur. İyulun sonunda Livan ordusu ölkənin cənubundakı birinci "pilot zonada" yerləşdirilməyə başlayıb.
