SOCAR-ın Geofizika və Geologiya İdarəsində 2016-cı il ərzində əməyin mühafizəsi, təhlükəsizlik texnikası sahəsində görülən işlərin yekunlarına həsr olunan hesabat yığıncağı keçirildi

Yanvarın 31-də SOCAR-ın Geofizika və Geologiya İdarəsində (GGİ) 2016-cı il ərzində əməyin mühafizəsi, təhlükəsizliyi  sahəsi üzrə görülmüş işlərlə əlaqədar yekun hesabat toplantısı keçirildi.

Tədbiri GGİ-nin əməyin mühafizəsi üzrə rəis müavini İsmayıl Hüseynov  açaraq  bildirdi ki,  2016-cı il ərzində İdarənin strukturuna daxil olan istehsalat bölümlərində sağlam və təhlükəsiz əmək şəraitinin yaradılması, istehsalat sahələrinin, iş yerlərinin müasir standartların tələblərinə uyğun qurulması sahəsində bir çox işlər görülüb: “Hesabat dövründə İdarənin istehsalat bölümlərində əmək şəraitinin vəziyyətinə operativ nəzarətin  üç  mərhələsini ardıcıl həyata  keçirərək  cəmi  8345 baxış-yoxlama keçirilib ki, bunlardan 10-u daimi fəaliyyət  göstərən  komissiyaların (DFGK)  payına  düşür. Bu yoxlamalar  nəticəsində  yalnız  DFGK-lar  tərəfindən  44  müxtəlif  çatışmazlıq aşkar  edilib və qısa  müddət  ərzində  aradan  qaldırılıb.”

Geofizika və Geologiya İdarəsinin rəisi Elçin Şirinov vurğuladı ki, bu gün əməyin mühafizəsinə və insanların sağlamlığına təminat yaradan mütərəqqi texnologiyalara malik yeni müəssisələrin tikilməsinə, köhnə texnologiyaların yenisi ilə əvəz olunmasına, yaşıllıqların və parkların salınmasına, peşəkar mütəxəssislərin hazırlanmasına xüsusi diqqət yetirilir. E.Şirinov əməyin mühafizəsi, təhlükəsizlik qaydalarına riayət olunması istiqamətində müvafiq tapşırıqlarını da verdi: “Bölümlərdə işçilər arasında əməyin təhlükəsizliyi üzrə maarifləndirmə işlərinin gələcəkdə daha da keyfiyyətlə aparılmasına nəzarət gücləndirilməli, qarşıya çıxan hər hansı çatışmazlıqların qısa müddət ərzində aradan qaldırılması üçün operativ tədbirlər görülməlidir.”

GGİ-nin Əməyin mühafizəsi, təhlükəsizlik texnikası və ekologiya şöbəsinin rəisi Elxan Ələskərov 2016-cı il ərzində əməyin mühafizəsi, təhlükəsizliyi  sahəsi üzrə görülmüş işlərlə əlaqədar çıxış etdi. Bildirdi ki, 2016-cı il üçün  GGİ-nin  strukturuna  daxil  olan   istehsalat bölümlərində  sağlam  və  təhlükəsiz  əmək   şəraitinin  yaradılması  və  təmin  olunması, istehsalat  sahələrinin, binaların, iş  yerlərinin  müasir  standartların  tələblərinə  uyğun  səviyyədə  yenidən  qurulması, istehsalat  xəsarətlərinin, qəzaların, peşə  xəstəliklərinin  qarşısının  alınması  məqsədilə  əmək  şəraitinin  yaxşılaşdırılması  və sağlamlaşdırılması  üzrə  tədbirlər planı hazırlanıb və tətbiq olunub.

GGİ-nin strukturuna daxil olan “Mədəngeofizika”, “Kəşfiyyatgeofizika”, Kompleks Mühəndisi Axtarış İstehsalat Bölümlərinin rəhbər işçiləri əməyin mühafizəsi və təhlükəsizliyi  sahəsində həyata  keçirilən  işlər  barədə  məlumat  verdilər.

İdarənin Həmkarlar İttifaqı Komitəsinin sədri Fəxrəddin Əliyev qeyd etdi ki, sağlam və təhlükəsiz əmək şəraiti qurmaq GGİ rəhbərliyinin prioritet istiqamətlərindəndir. Bu sahədə əldə olunan nailiyyətlər idarə rəhbərliyinin və Şirkətin prezidentinin gündəlik diqqət və qayğısının nəticəsidir.

Sonda GGİ rəisinin I müavini Sarvan Mansurov çıxış edərək bildirdi  ki, istehsalat sahələrində qəzaların, yanğınların, bədbəxt hadisələrin baş verməsinə və peşə xəstəliklərinin yaranmasına səbəb ola biləcək risklərin müəyyən edilməsi, onların ləğvi və ya minimuma endirilməsi məqsədilə İdarə tərəfindən struktur bölmələrdə reydlər, yoxlamalar keçirilib. Gələcəkdə  bu istiqamətdə  işlərin daha da keyfiyyətlə aparılmasına ciddi fikir veriləcək.

Orxan Vahidoğlu, “İki sahil”