Prezident İlham Əliyev qələbəyə aparan 30 illik diplomatik «yol xəritəsi»ndə nəzərdə tutduğu zəfərini 44 gündə qazandı
30 ildən artıq müddətdə davam edən Dağlıq Qarabağ münaqişəsinin həlli istiqamətində aparılan danışıqların, keçirilən görüşlərin hər biri özlüyündə tarixi hadisə olsa da, əhəmiyyəti baxımından seçilənlər barmaqla sayılacaq qədərdir. Dünyanın bir çox ölkələrində ATƏT-in Minsk qrupu həmsədrliyinə daxil olan dövlət başçılarının münaqişə tərəflərinin iştirakı ilə təklikdə, üçlükdə keçirdikləri görüşlər səmərə verməsə də, dəyişilməyən və məqsədinə addım-addım yaxınlaşan Prezident İlham Əliyevin qətiyyətlə söylədiyi bu sözlər idi: Azərbaycan öz ərazisində ikinci erməni dövlətinin yaranmasına imkan verməyəcək.
2020-ci il fevralın 15-də Münxen Təhlükəsizlik Konfransı çərçivəsində keçirilən Ermənistan –Azərbaycan Dağlıq Qarabağ münaqişəsi ilə bağlı paneldə aparılan müzakirələr torpaqlarımızın işğaldan azad olunması istiqamətində davam edən danışıqların həlledici mərhələsi oldu. Həmin tədbirdə dünya siyasətindən, beynəlxalq qanunlardan xəbərsiz olduğunu dolaşıq nitqi ilə bildirən Ermənistanın baş naziri Nikol Paşinyanı diplomatik hazırlığı, hədəfə istiqamətlənmiş məntiqli dəlilləri ilə susduran Prezident İlham Əliyevin çıxışı paneldə iştirak edənlər tərəfindən maraqla qarşılandı.
Dağlıq Qarabağın əzəli Azərbaycan torpağı olduğunu tarixi əks etdirən faktlarla sübut edən Prezident İlham Əliyev münaqişəsinin yaranma tarixindən, Ermənistanın illərlə davam edən işğalçılıq, etnik təmizləmə siyasətindən, erməni millətçilərinin törətdikləri vəhşiliklərdən, erməni separatizminə dəstək göstərən qüvvələrin ikili standartlarından söz açdı. Cənab İlham Əliyev onu da vurğuladı ki, münaqişənin həllinin uzanmasının başlıca səbəbi 30 ilə yaxın davam edən danışıqlardan müxtəlif bəhanələrlə yayınan Ermənistanın xarici siyasətinin başqaları tərəfindən idarə olunması, xalqına xəyanət edən korrupsioner rəhbərliyin şəxsi maraqlarını güdməsidir. Sələflərinə xas hiyləgərlikdən, həqiqətdən yayınma kələyindən istifadə edən, «Mən Prezident İlham Əliyevdən tarixin çox dərinliklərinə getməməyi xahiş edəcəyəm» söyləyən, tarixi təhrif edən, «erməni kralı Böyük Tiqranı romalı hərbi lider Pompeylə dəyişik salan» Paşinyan Münxen Konfransında «Dağlıq Qarabağdakı yerli erməni, özünümüdafiə qüvvələri» haqqında söylədiyi cəfəngiyyatla da özünü ifşa etdi. Savadsızlığına haqq qazandırmaq üçün «millətlərin öz müqəddəratını təyinetmə hüququ»ndan bəhs edərək status-kvonunun saxlanılmasına çalışan Paşinyandan fərqli olaraq Prezident İlham Əliyevin məntiqli açıqlamasını tədbir iştirakçıları qüdrətli dövlət başçısının qətiyyəti kimi dəyərləndirdilər: «Erməni xalqı öz müqəddəratını artıq təyin edib. Onların erməni dövləti var. Mənim məsləhtim belə olacaq ki, onlar ikinci dəfə öz müqəddəratlarını təyin etmək üçün Yer kürəsində başqa yer tapsınlar. Azərbaycanda yox!»
«Küçə inqilabı» ilə hakimiyyətə gələn Ermənistanın baş naziri Nikol Paşinyanın üzərində növbəti diplomatik uğurunu MDB Dövlət Başçılarının Aşqabad Sammitində qazanan Prezident İlham Əliyev terrora dəstək göstərən, nasizmi qəhrəmanlıq kimi qələmə verən, neonasizmin yayılması və irqçiliyin, irqi ayrı-seçkiliyin, ksenofobiyanın və onlarla bağlı dözümsüzlüyün müasir formalarının yayılmasına şərait yaradan Ermənistanın vəhşiliyini faktlarla açıqladı. Bildirdi ki, SMERC qrupunun əməkdaşı, faşist cəlladı, satqın, əsas şüarı «Almaniya uğrunda həlak olan Ermənistan uğrunda həlak olur”» söyləyən Qaregin Ter-Arutyunyana Yerevanın mərkəzində heykəl qoyulması insanlığa ləkə, faşizm ideyalarına dəstəkdir.
Ermənistan baş nazirinin təəccüb doğuran «Qarabağ Ermənistanın bir hissəsidir və nöqtə”» sərsəmləməsini Soçidə keçirilən «Valday» Beynəlxalq Diskussiya Klubunun XVI iclasının plenar sessiyasında zərb- məsələ çevrilən «Birincisi, yumşaq desək, bu, yalandır. Dünya tərəfindən həm Aran, həm də Dağlıq Qarabağ Azərbaycanın ayrılmaz hissəsi kimi tanınıb. Ermənistan özü də bu qanunsuz qurumu tanımır. Qarabağ tarixi, əzəli Azərbaycan torpağıdır. Beləliklə, Qarabağ Azərbaycandır və nida işarəsi» sözləri ilə ifşa edən Prezident İlham Əliyevin məntiqli çıxışı Paşinyana daha bir siyasi şillə, diplomatik dərs oldu.
44 gün davam edən Vətən müharibəsində Ermənistan üzərində qələbə çalan Azərbaycanın zəfəri Prezident, Ali Baş Komandan İlham Əliyevin diplomatik səylərinin, uzaqgörənlklə müəyyənləşdirdiyi və qələbəyə hədəflənən «yol xəritəsi»nin uğuru idi. Fiaskoya uğrayan məsələlərdən biri də Ermənistanın baş nazirinin tez-tez təkrarladığı «Münaqişənin həlli Azərbaycan xalqı, Ermənistan xalqı və Dağlıq Qarabağ xalqı üçün məqbul olmalıdır» sərsəmləməsidir. Bu yalanlara da «İndi deməliyəm ki, «Dağlıq Qarabağ xalqı»” məfhumu mövcud deyil. Dağlıq Qarabağın əhalisi var, münaqişə başlayana qədər bu, bərabər hüquqlara malik olan Azərbaycan və erməni əhalisindən ibarət idi. Azərbaycan üçün hansı həll variantının məqbul olmasına gəldikdə isə, o, Azərbaycanın bütün dünya tərəfindən tanınmış ərazi bütövlüyünün bərpa olunması, qaçqınların və məcburi köçkünlərin öz doğma torpaqlarına, o cümlədən Dağlıq Qarabağa qayıtmasından ibarətdir» sözləri ilə aydınlıq gətirən, qlobal məsələlərin həllini beynəlxalq hüququn tələbləri baxımından ədalətli hesab edən dövlət başçımız siyasi hazırlığını göstərdi.
Vətən müharibəsində zəfər qazanan Milli Ordumuz Prezident İlham Əliyevin Münxendəki çıxışında söylədiyi bir həqiqəti də təsdiqlədi : «Baş nazir Dağlıq Qarabağın dırnaqarası özünümüdafiə qüvvələrindən danışanda , o bir daha həqiqətə uyğun olmayan sözlər söyləyir. O, çox yaxşı bilir və mən də bilirəm ki, dırnaqarası Dağlıq Qarabağ ordusunun 80 faizini Ermənistan vətəndaşları təşkil edir. Bu , həqiqətdir. Bəlkə 80 faizdən də artıqdır. Buna görə «Dağlıq Qarabağ ordusu» anlayışı yoxdur. «Dağlıq Qarabağ respublikası» anlayışı yoxdur. Münaqişənin yalnız iki tərəfi var: Ermənistan və Azərbaycan.» Vətən müharibəsində döyüş meydanında silah- sursatlarını belə atıb qaçan, gizlənən, məhv edilən ermənilərin əksəriyyətinin Ermənistan vətəndaşı olduqları artıq bütün dünyaya bəllidir.
İllərdən bəri mötəbər tribunalardan Azərbaycan həqiqətlərini dünya ictimaiyyətinə çatdıran Prezident İlham Əliyevin sözlərini işğaldan azad olunmuş torpaqlarımızda dalğalanan üçrəngli bayrağımız təsdiqləyir. Danışıqların nəticə vermədiyi məqamda əraziləri Ali Baş Komandan İlham Əliyevin rəhbərliyi altında güc yolu ilə azad edən Azərbaycan əsgəri erməni faşizmini məhv etdi. Düşmən tarixdə əbədi qalacaq, alçaldıcı kapitulyasiya aktına imza atdı. Prezident İlham Əliyevin «Mən demişəm ki, əgər kimsə Ermənistanda revanş haqqında düşünürsə, o, bizim dəmir yumruğumuzu bir daha görəcək. Bu dəmir yumruq onların belini qırdı, onların başını əzdi. Əgər bizə qarşı hər hansı bir təxribat törədilərsə, cavabımız çox sərt olacaq, çox peşman olacaqlar və yenə də acı məğlubiyyətlə üzləşəcəklər» söyləyən İlham Əliyev bildirir ki, düşmən bir daha belə cəhd edərsə, axırı lap pis olacaq.
Xuraman İsmayılqızı, «İki sahil»
