Dağlıq Qarabağ münaqişəsi başlanan gündən diplomatiya, informasiya, hərbi sahədə möhkəmlənən Türkiyə –Azərbaycan əməkdaşlığı hər iki xalqın birlik və həmrəyliyini daha da möhkəmləndirdi. Vətən müharibəsinin davam etdiyi günlərdə Türkiyənin «Haber Global», «Haber Türk», «A-Haber», Haber NTV televiziya kanallarının yayımladıqları verilişlər, Prezident İlham Əliyevin müsahibələri Dağlıq Qarabağ münaqişəsi ilə bağlı həqiqətlərin dünya ictimaiyyətinə çatdırılması üçün informasiya mənbəyi oldu. Azərbaycan Respublikası Prezidentinin köməkçisi, Prezident Administrasiyasının xarici siyasət məsələləri şöbəsinin müdiri Hikmət Hacıyevin başçılıq etdiyi nümayəndə heyətinin Türkiyəyə səfəri zamanı Azərbaycan –Türkiyə Media Platformasının (ATMP) yaradılması ilə bağlı təşəbbüsün dəstəklənməsi ölkələrimiz arasındainformasiya mübadiləsini gücləndirdi. İnformasiya mənbəyi olan Platformanın yaradılmasında məqsəd türk dövlətlərinin birliyini gücləndirmək, türkdilli ölkələrin siyasi, iqtisadi həyatındakı yenilikləri dünya ictimaiyyətinə operativ çatdırmaq, mediada yayılan dezinformasiyalar və xarici mənbələrdən gələn qara piarlara qarşı birgə mübarizə aparmaqdır. Erməni faşizminə qarşı ideoloji silah olan Türkiyə- Azərbaycan Media Platforması ilə bağlı ilk addımların atıldığı vaxtdan az müddət keçməsinə baxmayaraq informasiya təhlükəsizliyinin təmin olunması baxımından müəyyən işlər görülmüşdür.
İkinci Qarabağ müharibəsi zamanı Ermənistanı dəstəkləyən, Türkiyə –Azərbaycan dostluğuna qara yaxmağa çalışan dairələrin dezinformasiyalarına, təxribatlarına qarşı mübarizə aparan hər iki ölkənin media mənsublarının birgə fəaliyyəti səmərəsini göstərdi.
Vətən müharibəsinin ilk günlərindən bu dostluğu qarşılıqlı əməkdaşlıqdan hərbi, siyasi müstəviyə yönəltməyə çalışan qüvvələrə əsl həqiqəti əks etdirən informasiyalarla cavab verən yazarların istinad etdikləri mənbələr, faktlar və arqumentlər daha inandırıcı və kəsərli oldu. Qara qüvvələrə qarşı mübarizədə hər iki ölkə mediasının inteqrasiya şəklində fəaliyyəti, xalqların məlumatlandırılması səmərəsini göstərir. “Azərbaycan Respublikası ilə Türkiyə Respublikası arasında media sahəsində strateji əməkdaşlıq” haqqında” sənədin imzalanması ilə Platformanın fəaliyyəti güclənəcək, əhatə dairəsi genişlənəcək. Operativ xəbərlərin mübadiləsi, informasiya təhlükəsizliyinin qorunması sahəsində önəmli addımlar atılacaq. Prezident İlham Əliyevin təsdiqlədiyi həmin sənəddə qeyd olunduğu kimi, Platformanın məqsədi hər iki qardaş ölkə arasında ikitərəfli əlaqələri media və kommunikasiya sahəsində də genişləndirmək, strateji media ortaqlığını, sağlam media şəbəkəsinin infrastrukturunu yaratmaqdır. Birgə əməkdaşlıq nəticəsində media sahəsində təcrübə və informasiya mənbələrinin paylaşılması, rəsmi qurumlarla birgə fəaliyyət prinsipinin formalaşması, beynəlxalq arenada rast gəlinən dezinformasiyalara qarşı birgə mübarizə ilə dünya ictimaiyytəinə düzgün məlumatın çatdırılması nəzərdə tutulur. Televiziya və kino sahəsində, müxtəlif media və sektor təmsilçiləri arasında tərəfdaşlığın qurulması, peşə təhsili və mübadilə proqramlarının təşkili, hər iki ölkənin tanınmış öndərləri, siyasətçiləri, ictimai xadimləri arasında rabitə körpüsü olan canlı verilişlərin təşkili də qarşıya qoyulan vəzifələrdəndir.
Artıq bir neçə müddətdir ki, Azərbaycanın politoloqları, deputatları, jurnalistləri Türkiyə televiziyalarının videoformatda keçirdikləri canlı yayımlarda iştirak edirlər. Hər iki qardaş ölkənin media mənsublarını birləşdirən Media Platforması çərçivəsində həyata keçirilən layihələrdə iştirak edən jurnalistlər Dağlıq Qarabağ münaqişəsi, Ermənistanın mülki azərbaycanlılara qarşı törətdiyi terrorlar barədə məlumatları dünya ictimaiyyətinə hadisə yerindən birbaşa çatdırırlar. Vətən müharibəsinin davam etdiyi müddətdə Türkiyə televiziya kanallarında çalışan əməkdaşların döyüş bölgələrindən hazırladıqları reportajlar vasitəsi ilə erməni faşizmi, vandallığı təkcə qardaş xalqın ictimaiyyətinə deyil, bütün dünyaya çatdırılır. Türkiyənin telviziya kanallarına müsahibələrində bu qardaşlığın tarixi köklərindən, Ermənistanın Azərbaycana qarşı işğalçılıq siyasəti nəticəsində dağıdılan ərazilər haqqında məlumat verən Prezident İlham Əliyevin bildirdiyi kimi bərpa işlərində iştirak edəcək Türkiyə şirkətlərinin fəaliyyəti qarşılıqlı olaraq hər iki ölkə vətəndaşlarına çatdırılacaq. Türkiyənin Milliyyətçi Hərəkat Partiyasının işğaldan azad edilmiş Şuşada dahi bəstəkar Üzeyir Hacıbəyov adına məktəbin tikintisi ilə bağlı təşəbbüsü bu birliyin sarsılmazlığını göstərir.
Ermənistanın törətdiyi təxribatlar nəticəsində başlanan və Azərbaycan Ordusunun üstünlüyü ilə davam edən döyüşlərdə xalqımıza mənəvi dəstək olan qardaş yardımı göstərdi ki, Türkiyə və Azərbaycan hər zaman bir-birinin yanındadırlar. Azərbaycan Türkiyəyə, Türkiyə isə Azərbaycana güvənir. İkinci Qarabağ müharibəsinin ilk günlərindən Azərbaycanın yanında olduqlarını bildirən Türkiyənin Prezidenti Rəcəb Tayyib Ərdoğanın, digər dövlət və hökumət nümayəndələrinin, deputatların işğalçıya xəbərdarlığı qələbə əzmimizi artırdı.
«Rəcəb Tayyib Ərdoğanın bu toqquşmaların ilk saatlarında verdiyi dəstək sabitliyi qorudu. Bəziləri bəlkə bunu anlamırlar. Əgər o sözlər olmasaydı, əgər mənim qardaşım deməsəydi ki, Azərbaycan tək deyil, Türkiyə Azərbaycanın yanındadır, bəlkə də burada vəziyyət qarışardı. Bəlkə də başqa kimsə burada, necə deyərlər, bulanıq suda balıq tutmağa çalışacaqdı. Ona görə bundan sonra bu bölgədə biz yeni bir strateji mənzərə, strateji baxış yaratmalıyıq» söyləyən Prezident İlham Əliyevin vurğuladığı kimi, bu dəstək nəticəsində regionda yeni reallıqlar yarandı. Bölgədə sabitləşdirici rolu ilə fərqlənən, dünyada söz sahibi olan Türkiyə-Azərbaycan dostluğunun möhkəmlənməsində isə mətbuatın rolu əvəzsizdir.
Türkdilli xalqların əməkdaşlığının möhkəmlənməsində bu birliyin önəmli rolu vardır. Türk dövlətlərinin vahid dil sisteminin hazırlanması, ortaq televiziyanın yaranması kimi təkliflərin səslənməsi də zamanın tələbindən irəli gələn, türkçülüyün möhkəmlənməsinə xidmət edən amillərdəndir. Ortaq türk dilinin milli kimlik səviyyəsinə qaldırılmasında, ortaq tariximizin öyrənilməsində Media Platformasının fəaliyyəti inamı doğruldacaq.
Regionda iqtisadi gücü artan, beynəlxalq qlobal enerji, nəqliyyat layihələrinin reallaşmasında birgə fəaliyyət göstərən Türkiyə-Azərbaycan birliyi gərginləşən geosiyasi maraqlara qarşı mübarizədə də üstünlüyünü qorumaqdadır. Erməni faşizminə, terrora qarşı mübarizədə vahid güc nümayiş etdirən bu cütlük türkçülüyün sarsılmazlıq nümunəsi, “Bir millət-iki dövlət” müdrik kəlamının reallığıdır. Bu mübarizədə ideoloji silah Türkiyə- Azərbaycan Media Platforması olacaq.
Bu günlərdə Türkiyədə səfərdə olan respublikamızın Baş naziri Əli Əsədovun, Baş prokuror Kamran Əliyevin qardaş ölkədə keçirdikləri görüşlər, iqtisadi əməkdaşlıq üzrə Azərbaycan-Türkiyə Hökumətlərarası Komissiyanın iclası, imzalanan sənədlər haqqında ətraflı məlumatların ictimaiyyətə çatdırılması media mənsublarının birgə fəaliyyətinin nəticəsidir.
Xuraman İsmayılqızı, “İki sahil”
