Prezident İlham Əliyevin sədri olduğu, beynəlxalq münasibətlərin tənzimlənməsində böyük rola malik,120 üzv,17 müşahidəçi dövləti , 10 müşahidəçi beynəlxalq təşkilatı birləşdirən Qoşulmama Hərəkatının bu təşəbbüsü xalqlar və dövlətlər arasında birlik və həmrəyliyi möhkəmləndirəcək
Multikulturalizm ənənələrinə sadiqliyini tolerantlıq təcrübəsi ilə bildirən, ev sahibliyi etdiyi biri-birindən əhəmiyyətli beynəlxalq tədbirlərlə dünya xalqları arasında körpü olan Azərbaycan mədəniyyətlərarası, sivilizasiyalararası və dinlərarası dialoqun dünya səviyyəsində tanınmış mərkəzlərindəndir. Müxtəlif illərdə ölkəmizdə «Multikulturalizm İli”»nin, «İslam Həmrəyliyi İli»nin elan olunması xalqımızın bəşəri dəyərlərə ehtiramının göstəricisidir. Bakıda multikultural dəyərləri, dinlərarası sülh və əməkdaşlığı təbliğ edən çoxsaylı beynəlxalq tədbirlərin təşkili, BMT-nin Sivilizasiyalar Alyansının Qlobal Forumunun, Dünya Dini Liderlərinin Forumunun, Mədəniyyətlərarası Dialoq Forumunun, «Bakı prosesi»nin təşkili dünya sivilizasiyasına və multikulturalizmə verilən töhfədir.
İkinci Qarabağ müharibəsi və postmüharibə dövründə belə humanitar siyasəti ilə diqqət çəkən Azərbaycan qarşılıqlı hörmət və etimad prinsiplərinə sadiqliyini davam etdirir. Ermənistanın işğal etdiyi torpaqlarımızın azad olunması ilə ərazilərimizdə başlanan quruculuq, bərpa işlərinin sürətləndirilməsi, tarixi abidələrimizin əvvəlki görkəminə qaytarılması üçün həyata keçirilən bərpa işlərinin hər biri özlüyündə xalqımıza Qələbə sevincini yaşadan Prezident, Ali Baş Komandan İlham Əliyevin Vətənə bağlılığının nümunəsidir. 44 gün davam edən İkinci Qarabağ müharibəsində milliyyətindən asılı olmayaraq bütün azərbaycanlıların torpaqlarımızın işğaldan azad olunması uğrunda döyüşlərdə mətanət göstərmələri, şəhidlik zirvəsinə ucalan Milli Qəhrəman Albert Aqarunov kimi digər millətləri təmsil edən hərbçilərin orden və medallarla təltif olunmaları bütün dünya xalqlarına Vətən uğurunda qurban getmək mətanətinin igidlik dərsi idi. Qısa müddətdə işğaldan azad olunmuş ərazilərdə ermənilər tərəfindən dağıdılmış təkcə məscidlərin deyil, azsaylı xalqlara məxsus dini abidələrin təmir və bərpası üçün dövlət başçımızın göstərdiyi diqqət xalqların birgəyaşayış prinsiplərinə sadiq Azərbaycanda dini və vicdan azadlığına göstərilən hörmətin, ksenofobiyaya qarşı barışmazlığın ifadəsidir. Ölkəmizdə əsrlərdən bəri məskunlaşan, Azərbaycanı özlərinin vətəni kimi sevən azsaylı xalqların iştirakı ilə Şuşada keçirilən «Xarıbülbül» musiqi festivalı müsəlman aləminin mədəniyyət paytaxtı olan bu qədim diyardan dünya xalqlarına birlik , həmrəylik nümunəsi, çağırışı idi. Şuşa festivalı göstərdi ki, sivilizasiyaların qovuşduğu məkan olan Azərbaycanda milliyyətindən asılı olmayaraq dini, irqi ayrı- seçkilik halları müşahidə olunmur. İşğaldan azad olunmuş Şuşada qısa müddətdə Yuxarı Gövhərağa məscidinin, Kəlbəcərdə udilərə məxsus Xudavəng kilsəsinin təmir olunması, əsl sahiblərinə qaytarılması yalnız Azərbaycan xalqına məxsus milli həmrəylik nümunəsidir. Kəlbəcərdə ermənilərin sahibləndiyi, saxta işarələrlə özününküləşdirdikləri Xudavəng monastr kompleksində Qafqaz Albaniyasının varislərinə ibadətlə məşğul olmaq imkanı yaradıldı. Rus Provaslav kilsəsinin, Qafqaz Müsəlmanları İdarəsinin Qazilər Şurasının nümayəndələrinin, Dağ Yəhudiləri İcmasının rəhbəri Melix Yevdayevin, Bakıdakı Avropa Yəhudiləri İcmasının başçısı Aleksandr Şarovskinin, Roma-katolik kilsəsinin Azərbaycandakı ordinarisi Vladimir Feketenin, Alban-Udi Dini İcmasının rəhbəri Robert Mobilinin Şuşaya birgə səfərləri, dini ocaqları ziyarət etmələri multikulturalizmə sadiqlik olmaqla dini inanclara hörmətlə yanaşan Prezident İlham Əliyevin «Biz bütün dinlərin məbədlərini qoruyuruq və qoruyacağıq. Heç kimdə şübhə olmasın. Artıq bunu müstəqillik tarixi də göstərib, müstəqillikdən əvvəlki tarix də göstərib. Bütün dinlərin abidələri bizdə qorunur-kilsələr, sinaqoqlar, o cümlədən erməni kilsəsi Bakının mərkəzində dövlət tərəfindən qorunur, təmir edilib» sözlərinin təsdiqidir. Müxtəlif inanclara hörmətlə yanaşmaq o deməkdir ki, birlik, bərabərlik, həmrəylik əsrlərdən bəri Azərbaycan xalqının genində yaşayan və kodlaşan milli xüsusiyyətdir.
Azərbaycanın dünyaya ünvanlanan sülh, həmrəylik çağırışları təkcə tolerantlıq təcrübəsi ilə məhdudlaşmır. Ölkəmizdə keçirilən bütün humanitar tədbirlərdə böyük diqqətlə dinlənilən Prezident İlham Əliyevin çıxışlarının hər biri Azərbaycanın birlik və qardaşlığa verdiyi dəyər, töhfədir. Türk Dövlətləri Əməkdaşlıq Şurasına sədrliyi müddətində müsəlman aləminin, türk dünyasının birliyinin daha da möhkəmlənməsinə xidmət edən Prezident İlham Əliyev Qoşulmama Hərəkatının sədri kimi də humanitar təşəbbüslərin müəllifi olmaqla böyük hörmət qazanıb.
Hələ də bütün dünya dövlətlərini iqtisadi böhranla üzləşdirən, insanları ölüm qorxusi ilə «təhdid edən» pandemiya dövründə Qoşulmama Hərəkatının sədri kimi önəmli təşəbbüsləri dəstəklənən Prezident İlham Əliyevin bütün dünya xalqlarına ünvanlanan bərabərlik çağırışları xalqımıza məxsus multikulturalizmdən qaynaqlanır. Qlobal hadisələrlə zəngin olan planetimizdə beynəlxalq münasibətlərin tənzimlənməsində böyük rola malik,120 üzv,17 müşahidəçi dövləti , 10 müşahidəçi beynəlxalq təşkilatı birləşdirən Qoşulmama Hərəkatına sədrlik dünya dövlətlərin üçdəikisinin maraqlarının bütün xalqlara çatdırılması deməkdir. Hərəkata sədrliyi müddətində ona həvalə olunan bu məsuliyyətli vəzifəni və göstərilən etimadı doğruldan Prezident İlham Əliyevə qarşıdakı ildə də eyni səlahiyyətini davam etdirməsi ilə bağlı etimadın göstərilməsi Hərəkat üzvlərinin dövlət başçımıza sonsuz inam və hörmətinin ifadəsidir. BMT-dən sonra əsas məqsədi dünyada sülh, təhlükəsizlik və inkişafa xidmət olan Hərəkatın varlığını əməli fəaliyyətlə göstərmək, öz sözünü qətiyyətlə demək, dünyada baş verən hadisələri sabitliyə xidmət istiqamətinə yönəltmək, qurum üzvlərinin etimadını qazanmaq siyasi təcrübə, səriştə və öndə addımlamaq qətiyyəti tələb edir. Pandemiyaya qarşı birgə mübarizənin vacibliyini Hərəkatın dünyanın müxtəlif regionlarını təmsil edən Təmas Qrupunun üzvlərinin iştirakı ilə müzakirəsi, onlayn formatda keçirilən Zirvə görüşündə BMT-nin Baş katibi, BMT Baş Assambleyasının sədrinin, Ümumdünya Səhiyyə Təşkilatının Baş direktorunun , Afrika İttifaqı Komissiyasının sədrinin, Avropa İttifaqının Ali nümayəndəsinin və Avropa Komissiyasının vitse-prezidentinin də iştirakı qurumun sədri Prezident İlham Əliyevə beynəlxalq səviyyədə göstərilən etimaddır. Bu etimad təşkilat üzvlərinin Azərbaycana mənəvi dəstəyində də hiss olunur. 2020-ci ilin iyulunda Qoşulmama Hərəkatı Ermənistan silahlı qüvvələrinin dövlət sərhədində törətdiyi hərbi təxribatla bağlı kommünike qəbul etdi. 2020-ci ilin oktyabrında nazirlər səviyyəsində keçirilən onlayn iclas çərçivəsində işğalçılığı pisləyən xüsusi bəyanat qəbul olundu. Bu sənədlərdə Qoşulmama Hərəkatında təmsil olunan ölkələr Azərbaycanın ədalətli mövqeyini dəstəkləyərək ərazi bütövlüyünün bərpasına yönəlmiş səyləri ilə Azərbaycanla həmrəyliyini ifadə etdi.
Qoşulmama Hərəkatının Təmas Qrupu Ölkələrinin Zirvə görüşünün davamı olaraq Prezident İlham Əliyevin növbəti təşəbbüsü ilə BMT Baş Assambleyasının dövlət və hökumət rəhbərləri səviyyəsində koronavirusla mübarizəyə həsr edilmiş Xüsusi Sessiyası keçirildi və beynəlxalq səviyyəli humanitar addım kimi bəyənildi. Azərbaycanın pandemiya dövründə 30-dan artıq ölkəyə humanitar dəstək, Ümumdünya Səhiyyə Təşkilatına 10 milyon dollar həcmində könüllü yardım göstərməsi qlobal miqyasda pandemiyaya qarşı mübarizədə əməkdaşlıq və həmrəyliyin nümunəsi, Prezident İlham Əliyevin vaksinlərin bütün ölkələr arasında ədalətli bölünməsi ilə bağlı təklifi isə Azərbaycan xalqına məxsus multikulturalizmin ifadəsi idi.
Bu günlərdə Qoşulmama Hərəkatının Xarici işlər nazirlərinin onlayn formatda keçirilən aralıq konfransında videoformatda təqdim olunan Prezident İlham Əliyev COVID-19 pandemiyasının yaratdığı yeni reallıqlardan və çətinliklərdən söz açdı. Vurğulandı ki, Hərəkata üzv ölkələrin əsas humanitar və tibbi ehtiyaclarının təminatı üçün məlumat bazasının yaradılması pandemiya ilə mübarizənin eyni mərkəzdən idarə olunmasını təmin edəcək. Qlobal səhiyyə böhranı fonunda «peyvənd millətçiliyi”»nin yaratdığı vəziyyətdən narahatlığını «Bu günədək dünyada mövcud olan peyvəndlərin 82 faizdən çoxu zəngin dövlətlər tərəfindən alınıb, azgəlirli ölkələrin payına düşən peyvənd həcmi isə yalnız 0,9 faiz təşkil edir» sözləri ilə ifadə edən Prezident İlham Əliyev pandemiyaya qarşı mübarizədə birik və həmrəyliyin vacibliyini diqqətə çatdırdı: «Azərbaycan Qoşulmama Hərəkatının vahid səsini ucaldaraq, Hərəkatın maraqlarını bütün mümkün beynəlxalq platformalarda müdafiə etmişdir. Azərbaycan Qoşulmama Hərəkatı çərçivəsində həmrəyliyin artırılması, beynəlxalq arenada Hərəkatın mövqeyinin və nüfuzunun gücləndirilməsi sahəsində birgə səylər göstərməkdə davam edəcək.» Hərəkatın perspektivlərindən, pandemiyadan sonra bərpa mərhələsinə dair fikir mübadiləsinin vacibliyindən söz açan Prezident İlham Əliyev bildirdi ki, təşkilatın mövqeyinin müəyyən edilməsi baxımından Qoşulmama Hərəkatına üzv dövlətlərin yüksəksəviyyəli iclasının keçirilməsi faydalı olar: «Pandemiyadan irəli gələn çətinliklərin mürəkkəbliyini nəzərə alaraq, Qoşulmama Hərəkatı tərəfindən COVID-19-dan sonra qlobal bərpaya dair BMT-nin Yüksək Səviyyəli Panelinin yaradılması təşəbbüsü ilə çıxış edilməsi məqsədə müvafiq olardı. Həmin panel dünyanın pandemiyadan daha yaxşı şəkildə çıxması üçün qlobal tədbirlərə dair tövsiyələr hazırlaya bilər.» Azərbaycan Prezidenti, Qoşulmama Hərəkatının sədri İlham Əliyevin bu təşəbbüsü də dünyada sabitliyin sülhün qorunmasına, həmrəyliyə növbəti çağırışdı.
Xuraman İsmayılqızı, «İki sahil»