Dünyanın ən ağıllı futbolçusu
Dünyanın ən ağıllı futbolçusu kimi Frenk Lempard göstərilir. İngilis futbolçunun IQ göstəricisi 150-yə bərabərdir.
Messi haqqında maraqlı faktlar
Məşhur futbolçu Messi hal-hazırda böyük var-dövlətə sahib olsa da, ancaq karyerasını adi bir salfet üzərində imzaladığı müqavilə ilə başlamışdı. Həmin müqaviləni imzaladığı zaman onun yanında argentinalı agenti Josep Maria Minghelia və keçmiş Barselona məşqçisi Carles Rechak vardı. 2012-ci ildə həmin bu salfet Barselona Muzeyinə verilmişdi. Məşhur salfeti görmək istəyənlər, buna görə pul ödəməlidirlər.
Argentinalı ulduz Messinin uşaqlıqdan qalan digər maraqlı vərdişi isə odur ki, o hər oyundan əvvəl çoxlu "jelibon" konfeti yeyir.
23 qol vuran Ronaldiniyo
Bir zamanların super ulduzu Ronaldiniyo gənc ikən başqa uşaq komandası ilə oynadığı oyunda komandası 23:0 hesabı ilə qalib gəlib. Həmin 23 qolun hamısını Ronaldiniyo vurub. Məhz o oyundan sonra gənc futbolçu lazımi adamların diqqətini cəlb edib.
Avtoqolların rekordçusu
Bütün karyerası boyu yarımmüdafiəçi olan Pinheyro avtoqolların rekordçusu kimi tarixə düşüb. Fərqli oyunlarda qapını səhv salaraq öz qapılarına qol vuran futbolçu bir müddətdən sonra məşqçilərin hücumuna məruz qalmışdı. Qeyd edək ki, Pinheyro öz qapılarına 10 dəfə qol vuraraq, özünü antireklam etmişdi.
Modasevər futbolçu
Rusiya millisinin aparıcı futbolçusu Andrey Arşavin moda ilə peşəkar səviyyədə məşğul olur. Onun modaya aid 3 kitabı da var.
Ərköyün futbolçu
Zəngin italyan ailəsində ərköyün böyüdülmüş Mario Balotelli "Mançestr Siti"də oynadığı zaman avtomobilini düzgün park etmək vərdişinə alışa bilməyib. Təkcə bu səbəbdən üstə-üstə 10 000 funt-sterlinq məbləğində cəzalanıb.
Optik mağazası ilə məşhurlaşan Grosso
Qarşılaşma zamanı italyan qapıçı Grosso hakimin qərarlarından narazı qaldığından sonra ona eynək almasını məsləhət gördü. Hakim onun bu sözlərini təhqir kimi qəbul edərək, qapıçını oyundan kənarlaşdırdı. Lakin maraqlı faktlardan bir də odur ki, bir müddətdən sonra hakimin görmə problemi olduğu ortaya çıxdı. Sən demə, Grosso bir optik mağazasına sahib olduğuna görə, hakimin gözlərində olan bu problemə diqqət yetirmişdi. Nəticədə hakim məhz Grossonun optik mağazasına gedərək özünə eynək sifariş etdi. Aydındır ki, bu cür reklamlardan sonra Grossonun mağazası çox məşhurlaşdı.
Kriştiano Ronaldonun adının mənası
Müsahibələrindən birində Ronaldo adının haradan gəldiyini izah etdi. Onun sözlərinə görə, Ronaldoya Amerikanın qırxıncı Prezidenti Ronald Reyqanın adı verilib. Kristiano bu prezidentin karyerasında əsas vəzifəni tutduğu vaxtda anadan olduğuna görə, ona bu ad verilmişdi.
Çətin uşaqlığı olan idmançı
Sən demə "Borussiya" Dortmundun önəmli futbolçusu olan polşalı Yakov Blasçikovskinin çox çətin uşaqlığı olub. O, 12 yaşında olarkən atası anasını onun gözlərinin qarşısında öldürüb.
Futbol tarixində qeyri-adi oyunçu
Mərakeşdən olan futbolçu Hisham Zeruali soyadı sayəsində pərəstişkarlarından "Zero" (Sıfır) ləqəbini almışdı. Uzun illər ərzində "0" rəqəmi altında oynayan futbolçu çox təəssüf ki, 2004-cü ildə avtomobil qəzasında həyatını itirdi. Ölümündən sonra tarixə düşən bu futbolçunun şərəfinə " Pittodry" stadionunda abidə qoyulmuşdu.
Əliaçıq idmançı
Məşhur futbolçu Kaka gəlirinin yüzdə qırxını Rio-de-Janeyrodakı kilsələrin birinə bağışlayıb.
Samirə Tağıyeva, “İki sahil”
