31 mart 2019 19:02
280

31 mart soyqırımı tariximizin qanlı səhifəsidir

1918-ci ilin martında erməni millətçiləri tərəfindən azərbaycanlıların kütləvi şəkildə qətlə yetirilməsi, soyqırımına məruz qalması XX yüzillikdə dünya tarixinin qanlı səhifələrindən biri hesab olunur.

AZƏRTAC-ın bölgə müxbiri xəbər verir ki, bu fikir Azərbaycanlıların Soyqırımı Günü ilə əlaqədar martın 31-də Balakən şəhərində keçirilən toplantıda səsləndirilib.

Rayon rəhbərliyi və ictimaiyyətin nümayəndələri soyqırımı qurbanlarının xatirəsinə ucaldılmış abidə kompleksinin önünə gül dəstələri düzüb, onların xatirəsini ehtiramla yad ediblər.

Toplantıda iki yüz ilə yaxın müddətdə ermənilərin xalqımızın başına gətirdikləri müsibətlər, törətdikləri faciələr bir daha xatırlanıb, Ermənistanın bu gün də davam edən təcavüzkarlıq siyasəti qətiyyətlə pislənilib. Erməni millətçilərinin bu məkrli siyasəti nəticəsində yüz minlərlə günahsız soydaşımızın qətlə yetirildiyi qeyd olunub.

Bildirilib ki, xalqımızın məruz qaldığı soyqırımı və etnik təmizləmənin miqyasının beynəlxalq ictimaiyyətə çatdırılması istiqamətində son illər Prezident İlham Əliyev tərəfindən məqsədyönlü iş aparılır.