44 günlük Vətən müharibəsi Azərbaycanın gücünü dünyaya nümayiş etdirdi. Ölkəmiz bu müharibədə sadəcə, Ermənistan dövlətini, onun hərbi və siyasi rəhbərliyini məğlub etmədi, eyni zamanda, regionda və dünyada mövcud olan erməni faşizmini və erməni lobbisini, yalan və saxtakarlıq üzərində qurulmuş ermənilik ideologiyasını yerlə-yeksan etdi. Hazırda Ermənistanda siyasi və iqtisadi tənəzzül, yoxsulluğun daha da artması, daxili qarşıdurma, qonşu ölkələrlə əlaqələrin kəsilməsi vəziyyəti hökm sürür. İndi bu ölkənin yeganə çıxış yolu sülh müqaviləsini imzalamaq, işğalçılıq siyasətindən birdəfəlik əl çəkməkdir. Azərbaycan tərəfi sülh müqaviləsini imzalamağa, sərhədləri tanımağa hazır olduğunu bütün beynəlxalq tədbirlərdə aydın şəkildə bəyan edib.
Prezident İlham Əliyev müsahibələrində bu məsələyə münasibət bildirərkən dəfələrlə deyib ki, Azərbaycan sülh müqaviləsini imzalamağa hazırdır: “Bizim bu təklifimiz qalib ölkənin təklifidir, güclü tərəfin təklifidir, müzəffər xalqın təklifidir. Əgər buna Ermənistanda mənfi reaksiya varsa, bunu da özləri bilərlər. Amma yenə də deyirəm, yenə də peşman olacaqlar. Biz isə bundan sonra ancaq və ancaq irəli gedəcəyik” .
Ermənistan və havadarları postmüharibə dövründə yeni geosiyasi reallıqları düzgün qiymətləndirməlidir. Cənab prezident İlham Əliyevin qeyd etdiyi kimi, bu məsələ artıq həll olunub.
Ermənistanın siyasi və hərbi rəhbərliyi unutmamalıdır ki, Azərbaycan Ordusu işğalçıları darmadağın etmək üçün cəmi 44 gün vaxt sərf etdi. Bu tarixi Qələbə, həm də işğalçı ölkəyə havadarlıq edənlərə mesajdır. Bundan sonra yenidən müharibə sevdasına düşənlər yenə də başları üzərində “dəmir yumruq” görəcəklər.
Otuz illik işğala öz gücü ilə son qoyan Azərbaycan vaxt itirmədən Ermənistanın illər ərzində dağıtdığı, talan etdiyi torpaqlarımızı dirçəltmək istiqamətində bərpa – quruculuq işlərinə başladı. Qarabağda geniş vüsət almış yenidənqurma - bərpa işlərinin hamısına, reallaşdırılan bütün layihələrə möhtərəm Prezidentimiz İlham Əliyev şəxsən nəzarət edir. Müharibə dövründə olduğu kimi, bərpa- quruculuq işlərində də Azərbaycan xalqı dövlət başçısının ətrafında sıx birləşib. Ermənistanda isə əksinə olaraq nizamsızlıq, qarşıdurmalar, qeyri-sabitlik gündən-günə dərinləşir. Birincisi, bu amil müharibədəki ağır məğlubiyyətlə bağlıdırsa, digər tərəfdən də, mövcud hakimiyyətə tabe olmamaqla və birincilik uğrunda qeyri-sivil mübarizə ilə əlaqədardır. Artıq Ermənistan rəhbərliyi də sülh müqaviləsinə məhkum olduqlarını dərk edir. Təbii ki, bu, son çıxış yoludur. Məhz bu səbəbdəndir ki, son günlər Paşinyan administrasiyası tərəfindən Azərbaycan və Türkiyə ilə əlaqədar müsbət siqnallar verilir. Lakin revanşizmə meyilli erməni lobbisi, hələ də dünyada qondarma “erməni soyqırımını” güclü maliyyə xərcləməklə təbliğ edir. Bununla belə, hazırda lobbinin özünün də daxilində destabilizasiya hökm sürür. Daha dəqiq desək, diaspor gücünü əvvəlki kimi toplayıb zərbəni bir yerə vura bilmir. Onlar öz narahatlıqlarını dilə gətirərək, Azərbaycan və Türkiyə ilə münasibətlərin yaxşılaşmasının Ermənistanda, ilk növbədə, erməniçiliyin 100 ildən çox hökm sürən ideoloji əsaslarını sarsıdacağını bildirirlər. Bu əsasların sarsıdılmasında isə Azərbaycan tərəfinin apardığı informasiya savaşının rolu danılmazdır. Müharibənin bitməsinə baxmayaraq, hələ də informasiya savaşı davam edir və bu da Ermənistana böyük zərbə vurur. Belə ki, müharibə dövründə bir tərəfdən ağır döyüşlər gedirdisə, digər tərəfdən də Azərbaycan dövləti sistemli və koordinasiyalı iş görərək, onların yalan üyüdən dəyirmanını susuz qoyurdu. Hazırda Ermənistan müharibədən keçən bu müddətdə hələ də özünə gələ bilmir. Belə çətin dönəmdə həm Koçaryan – Sarkisyan koalisiyası, həm diaspor, həm də terror təşkilatları aranı qızışdırmaq əvəzinə, düşünməlidirlər ki, Ermənistanın artıq sülh müqaviləsini imzalamaqdan başqa çıxış yolu yoxdur.
Gündüz Alıkişiyev,
YAP Tərtər rayon təşkilatının əməkdaşı