16 noyabr 2023 17:10
490

Əfqanıstan, Liviya, İraq  kimi dövlətləri  qan gölünə çevirən ABŞ sülhün düşmənidir - AÇIQLAMA

Uzun illər ərzində  ABŞ da daxil olmaqla bir sıra Qərb dövlətlərinin və bir sıra  beynəlxalq təşkilatların Azərbaycana yönəlik münasibətdə ikili standartlardan çıxış etməsinə şahidlik  etmişik. ABŞ Konqresində Azərbaycanın Qarabağ bölgəsinin gələcək taleyi adlı  məsələnin müzakirəyə çıxarılması da növbəti dəfə Azərbaycana yönəlik münasibətdən irəli gəlir. Təəssüflər olsun ki, bu dövlət 30 ilə yaxın müddətdə Azərbaycan torpaqları işğal altında olduğu sürəcdə Azərbaycana lazımi siyasi dəstək verməyib və ATƏT-in Minsk qrupunun həmsədrlərindən  biri olaraq da əslində münaqişənin aradan qaldırılması və Azərbaycan torpaqlarının işğaldan azad olunması istiqamətində fəaliyyət əvəzinə faktiki olaraq işğal altında olan ərazilərimizin ermənilərin xeyrinə rəsmiləşdirilməsi istiqamətində addımlar atması  da sirr deyil. Azərbaycan işğal altında olduğu dövrdə 1992-ci ildə Azərbaycana yönəlik 907 –ci  düzəlişin qəbul edilməsi də əslində ədalətsiz yanaşmanın bariz nümunəsi idi. İndi də bu cür məsələlər yenidən gündəmə gətirilir. Bu, çox təəssüfedici haldır. Görünən budur ki, Azərbaycanın torpaqlarını  öz gücünə işğaldan azad etməsi, regionda söz və güc sahibinə çevrilməsi bir sıra ABŞ və Fransa kimi Qərb dövlətlərini narahat etməkdədir. Bu narahatçılıq fonunda da  bu və ya digər formada Azərbaycana hansısa şəkildə təsir etmək,  yaranmış vəziyyəti Azərbaycanın ziyanına dəyişmək istiqamətində addımlar atılır.

Bu fikirləri “İki sahil”ə açıqlamasında Azərbaycan Milli İstiqlal Partiyasının sədri Arzuxan Əlizadə bildirib. 

Onun sözlərinə görə ötən 30 il ərzində ABŞ və Fransa kimi Qərb dövlətləri, Ermənistan tərəfindən işğal olunan ərazilərimizdən qaçqın, köçkün düşmüş soydaşlarımızın hüquqlarının müdafiəsi, dədə-baba yurdlarına qaytarılması istiqamətində heç bir addı atmadılar. Amma bu gün Qarabağdan öz istəyi ilə çıxıb gedən ermənilərin hüquqlarından danışırlar. ABŞ-ın bu mövqeyi qəbuledilməzdir. Əfqanıstan, Liviya, İraq  kimi dövlətləri  qan gölünə çevirən ABŞ sülhün düşmənidir.  Bu dövlət təəssüflər olsun ki, yenə də dünyanın jandarmı rolunda çıxış etməyə cəhd edir. Amma, gün o gün deyil. Azərbaycan arıtq 30 il bundan əvvəlki, Azərbaycan deyil. Dövlətimiz güclüdür, müstəqildir və regionda söz, güc sahibidir. Azərbaycan qardaş Türkiyə ilə tandemdə bu regionda sülhün və sabitliyin qarantı kimi çıxış edir. Bundan sonrakı dönəmdə də hər hansı dövlət bu ərazilərdə öz iqtisadi maraqlarını hansısa formada təmin etmək fikrinə düşəcəksə mütləq mənada mövqelərini Türkiyə və Azərbaycanla razılaşdırmalı və Azərbaycanın mövqeyi nəzərə almalıdırlar. Çünki bölgənin bu gün söz sahibi Azərbaycandır. ABŞ da bu reallıqla barışmalıdır.

Yaqut Ağaşahqızı, “İki sahil”