SPECA (BMT-nin Mərkəzi Asiya Ölkələrinin İqtisadiyyatları üçün Xüsusi Proqramı) ölkələri arasında ticarət prosedurları sadələşdirilməlidir, ticarət dövriyyəsinin kəskin artırılması üçün şərait yaradılmalıdır.

“İki sahil” xəbər verir ki, bunu Özbəkistanın iqtisadiyyat və maliyyə naziri, baş nazirin müavini Cəmşid Kuçkarov bu gün Bakıda keçirilən SPECA-nın Rəhbər Şurasının 18-ci sessiyasında deyib.

"Özbəkistanın SPECA ölkələri ilə xarici ticarət dövriyyəsi ötən ilin sonu ilə müqayisədə 18 % artaraq 8 milyard ABŞ dollarına çatıb. Lakin bu il həmin artım templəri azalmaq üzrədir. Belə ki, ticarət sahəsində bir sıra maneələr var. Olduqca vacibdir ki, biz Avropa İqtisadi Komissiyası və ESCATO ilə fəaliyyətimizi daha da fəallaşdıraq. Yeni mexanizmlər istifadə edərək ticarət prosedurlarını sadələşdirməliyik, həcmləri artırmalıyıq. Bunun sayəsində gömrük inzibatçılığında qabaqcıl üsülların tətbiqi, yükdaşıma prosesinin rəqəmsallaşdırılması, standartlaşma və laborator sertifikatlaşmasında müasir üsülların tətbiqi, "vahid pəncərə"yə qoşulma və elektron kommersiyanın regional platformasının təqdim edilməsi mühüm əhəmiyyət kəsb edir. Bütün bunlar 2023-2024-cü illər üçün işçi qrupunun iş planına daxil edilməlidir", - C. Kuçkarov bildirib.

Hazırda Mərkəzi Asiya və Xəzər regionu qarşısında daha ciddi müasir çağırışların dayandığını diqqətə çatdıran nazir, yalnız birgə səylərin gücləndirilməsi və BMT-nin təsisatlarının dəstəyi ilə onlara effektiv müqavimət göstərməyin mümkün olacağını vurğulayıb.