Şimali Koreya şərq suları istiqamətində bir neçə qısamənzilli ballistik raket buraxıb.

“İki sahil” xəbər verir ki, bu barədə Cənubi Koreya silahlı qüvvələrinin baş qərargahı açıqlama yayıb. Raket buraxılışları yerli vaxtla səhər saat 7:30 radələrində baş tutub.

Baş qərargah Şimali Koreyanın raket buraxılışı barədə məlumatları ABŞ və Yaponiya ilə bölüşdüyünü bildirib.

Yaponiya sahil mühafizə xidməti ballistik olduğu güman edilən raketin ölkənin dənizdəki məxsusi iqtisadi zonasından kənara düşdüyünü açıqlayıb.

Qeyd edək ki, Şimali Koreyanın raket buraxılışı ABŞ-dakı prezident seçkiləri ərəfəsində baş tutur. Pxenyan oktyabrın 31-də isə yeni “Hwasong-19” qitələrarası ballistik raketi buraxıb. Həmin buraxılışa cavab olaraq Cənubi Koreya, ABŞ və Yaponiya Koreya yarımadasından cənubda birgə hərbi hava təlimləri keçirib.