“Azərbaycan xalqı bu faciəvi hadisə ətrafında həmrəyliyini bir daha nümayiş etdirdi”
"Dekabr ayının 25-də baş verən təyyarə qəzası hər birimizi sarsıtdı. Bakı-Qroznı istiqaməti üzrə marşrutu yerinə yetirən AZAL-a məxsus “Embraer 190” tipli sərnişin təyyarəsi qəzaya uğraması və nəticədə 67 nəfərdən 38-nin həlak olması geridə qoymaqda olduğumuz 2024-cü ilin ən acı hadisəsi oldu. Faciəyə ilk operativ reaksiya dövlət başçımız cənab İlham Əliyevdən gəldi. O, məlum xəbəri eşidən kimi Sankt-Peterburqda keçiriləcək MDB Zirvə görüşündə iştirak etmək üçün etdiyi səfəri yarımçıq qoyub, vətənə döndü. Onun göstərişi ilə dərhal Dövlət Komissiyası yaradıldı, nümayəndə heyəti Aktau şəhərinə ezam edildi, həkimlərimiz Qazaxıstana yola salındı, Baş Prokurorluqda cinayət işi açıldı. Bunlar ilk zəruri addımlar idi. Eyni zamanda hər kəs cənab İlham Əliyevin hadisəyə necə reaksiya verəcəyini gözləyirdi. Çünki hər kəs hadisənin hansı ölkədə və hansı şəraitdə baş verdiyini bilirdi. Eyni zamanda vurulmuş təyyarənin Rusiyada yerə enməsinə icazə verilməməsi müxtəlif suallar, şübhələr doğururdu. Düşünürəm ki, cənab Prezident İlham Əliyev Azərbaycan Televiziyasına müsahibəsində bütün suallara cavab verdi”.
Bunu “İki sahil”ə açıqlamasında Milli Məclisin deputatı Mehriban Vəliyeva bildirib.
Ölkə başçısının müsahibəsinində səsləndirdiyi ədalətli, cəsarətli fikirlərin bütün dünya mediasında işıqlandırıldığını deyən millət vəkili əlavə etdi ki, Prezident ilk növbədə milli maraqlarımızı, xalqımızın mənafeyini hər şeydən üstün tutdu:
“Bəziləri yanlış olaraq düşünürdü ki, baş verən dəhşətli qəzaya görə xarici siyasi maraqlarımızı, müttəfiqlik əlaqələrimizi daha üstün tutacağıq, baş verənləri təsadüfdən doğan hansısa qəza kimi təqdim edəcəyik. Cənab Prezident bu düşüncədə olanları və bundan istifadə edərək çirkin kampaniya aparmaq istəyənləri yenə də məyus etdi. Ölkə başçısının da qeyd etdiyi kimi, təyyarə dost adlandırığımız ölkədə yerdən açılan atəş nəticəsində vurulmuşdu. Təəssüflər olsun ki, Rusiya tərəfi məsələni ört-basdır etmək üçün müxtəlif bəhanələr uydurdu. Gah dedilər ki, təyyarə quş sürüsü ilə toqquşub, gah dedilər ki, oksigen balonu partlayıb və s. Onlar günahlarını etiraf etmək, Azərbaycandan vaxtında üzr istəmək niyyətində deyildilər. “Açıq-aydın faktı inkar etmək və gözdən pərdə asmaq cəhdləri cəfəngiyyat və ağılsızlıqdır”, deyən Prezident İlham Əliyev hadisədən dərhal sonra qonşu dövləti fakt qarşısında qoydu. Cavabdeh tərəfin qarşısında tələblər qoydu. Birincisi, Rusiya tərəfi Azərbaycandan üzr istəməlidir. İkincisi, öz günahını etiraf etməlidir. Üçüncüsü, günahkarları cəzalandırmalıdır, cinayət məsuliyyətinə cəlb etməlidir və Azərbaycan dövlətinə və zərərçəkən sərnişin və ekipaj üzvlərinə təzminat ödəməlidir. Əslində bu tələblər beynəlxalq təcrübəyə və normal insani davranışa əsaslanır. Təkcə dövlətlərarası deyil, cəmiyyətdaxili münasibətlərdə də bu belədir. Haradasa bədbəxt hadisə baş verəndə səbəbkar günahını boynuna alır, üzr istəyir, xərcləri ödəyir və sonda barışıq təklif edir. Dövlətlər də bu qaydalara, normalara əməl etməlidir. Azərbaycan Ordusu 2020-ci ildə 44 günlük müharibənin son günlərində Ermənistandakı Rusiyaya məxsus hərbi təyyarəni bilmədən vurmuşdu. Azərbaycan Rusiyadan üzr istədi və kompensasiya təklif etdi. Halbuki, biz müharibənin qaynar nöqtəsində, separatçıların olduğu Xankəndi istiqamətində uçan hərbi helikopteri vurmuşduq. Amma Azərbaycan Prezidenti yenə də alicənablıq nümayiş etdirdi, dürüst, ləyaqətli addım atdı. Eyni dürüstlüyü, ləyaqətli davranışı Rusiyadan tələb etməyə haqqımız var. Hər bir ölkənin xarici siyasəti onun liderinin xarakterinə uyğun olur. Cənab İlham Əliyev dostluqda etibarlı, dürüst, milli maraqlarda qətiyyətli olduğu kimi, xarici siyasətimiz də belədir”.
M.Vəliyeva onu da qeyd etdi ki, Azərbaycan xalqı Həmrəyli Günü ərəfəsində daha bir hadisənin ətrafında həmrəyliyini nümayiş etdirdi:
“Azərbaycan Prezidentinin mövqeyi bütün azərbaycanlılar tərəfindən yüksək qiymətləndirildi. Hər kəs qəzada həlak olanların xatirəsini uca tutdu.Təyyarənin pilotları və ekipaj üzvlərinin qəhrəmanlıqları bizi qürrələndirdi. Pilotlar həm peşəkarlıq, həm qəhrəmanlıq göstərdilər. Ölkə başçısı qəza zamanı yüksək peşəkarlıq və şücaət göstərmiş şəxsləri təltif etdi. Sərəncamda xüsusi olaraq qeyd edilib ki, pilotların, bələdçilərin yüksək peşəkarlığı, şücaəti və cəsurluğu sayəsində təyyarə qəza enişi həyata keçirib və 29 sərnişin xilas edilib. Qəza zamanı xidməti vəzifələrinin yerinə yetirilməsində, sərnişinlərin həyatının xilas edilməsində yüksək peşəkarlıq, şücaət və fədakarlıq göstərdiklərinə görə təyyarənin pilotları İqor Kşnyakin, Aleksandr Kalyaninov və ekipaj üzvü Hökumə Əliyevaya ölümündən sonra “Azərbaycanın Milli Qəhrəmanı” adı verilib, digər ekipaj üzvləri Zülfiqar Əsədov və Aydan Rəhimli isə 1-ci dərəcəli “Rəşadət” ordeni ilə təltif ediliblər.
Bu da vətənin öz qəhrəman övladlarına verdiyi qiymətdir. Onu da bildirim ki, Hökumə Əliyevaya Salatın Əsgərova və Gültəkin Səgərovadan sonra Milli Qəhrəman adına layiq görülmüş üçüncü qadınımızdır. Azərbaycan xalqı, bütün Türk dünyası bu faciə ətrafında sıx birləşdi, həmrəy oldu. Qardaş Qazaxıstan dövlətinin və xalqının dəstəyi yüksək qiymətləndirilməlidir. Onlar qəza anında və sonrakı proseslərdə özlərini əsl qardaş türk xalqı kimi apardılar. Bu faciə Qazaxıstan və Azərbaycanı bir-birinə daha da doğmalaşdırdı. Türkiyə dövləti, mətbuatı ilk andan yanımızda oldular. Türkiyə mütəxəssislərindən ibarət ekspert qrupu yaradıldı. Onlar da bu dəfə də Azərbaycanı faciə qarşısında tək buraxmadılar”.
Millət vəkili sonda bildirdi ki, qəzalar millətləti və dövlətləri daha güclü, dözümlü edir:
“Təəssüf ki, bəzən bədbəxt hadisələrdən qaçmaq olmur. Allah qəzada həlak olanlara rəhmət eləsin, yaralılara şəfa versin. Yeni il ərəfəsində dünyaya və Azərbaycana faciəsiz yaşam diləyir, sabitlik və əmin-amanlıq arzulayıram”.
