Naxçıvan Muxtar Respublikası Təcili Tibbi Yardım Xidmətinin Ordubad rayonu üzrə Sabirkənd Ailə Sağlamlıq Mərkəzində yeni geolokasiya istifadəyə verilib.

Naxçıvan Muxtar Respublikası Səhiyyə Nazirliyinin mətbuat xidmətindən “İki sahil”ə verilən məlumata görə, bu münasibətlə keçirilən tədbirdə Ordubad Rayon İcra Hakimiyyətinin başçısı Rəcəb Rəhimli yeni istifadəyə verilən geolokasiyanın regionda səhiyyə xidmətlərinin keyfiyyətinin artırılmasında mühüm rol oynayacağını vurğulayıb. O, həmçinin bu yeniliyin kənd sakinlərinin tibbi yardıma daha operativ və əlçatan şəkildə çatmasına imkan yaradacağını qeyd edib.

Naxçıvan Muxtar Respublikasının səhiyyə naziri Samiq Sadıxov bu yeniliyin bölgə əhalisinin tibbi xidmətlərə əlçatanlığını təmin edəcəyini bildirib. Nazir, eyni zamanda, səhiyyə sektorunda həyata keçirilən islahatların bölgələrdə müsbət nəticələr verdiyini və bu cür layihələrin davam etdiriləcəyini vurğulayıb.

Qeyd edək ki, yaradılan yeni geolokasiya Sabirkəndlə yanaşı, Aza, Azadkənd, Qoşadizə, Gilançay, Biləv, Behrud, Parağa və Dəstə kəndlərindən olan vətəndaşlara da xidmət göstərəcək.