ABŞ-nin 39-cu prezidenti Cimmi Karterin dəfn mərasimi cümə axşamı Corciya ştatının Pleyns şəhərində qapalı şəkildə keçirilib.

“İki sahil” xəbər verir ki, bu barədə “Associated Press” agentliyi məlumat yayıb.

Cimmi Karter Karterlər ailəsinin fermasında həyat yoldaşı Rozalinin yanında dəfn edilib. Keçmiş birinci xanım 2023-cü ildə 96 yaşında vəfat edib.

Cümə axşamı səhər Vaşinqton Kafedral Kilsəsində anım mərasimi keçirilib, bundan sonra yerli vaxtla saat 15:30-da (Bakı vaxtı ilə 00:30) Karterin cənazəsi xüsusi reyslə Corciya ştatındakı Fort Mur hərbi bazasına çatdırılıb. Hərbi orkestrin musiqisi və 21 topdan atəş açılması altında katafalkla kortej Pleyns Baptist kilsəsinə yola düşüb. Orada yalnız ailə üzvləri və az sayda dəvətli qonağın iştirakı ilə qısa anım mərasimi keçirilib.

Mərasimdən sonra keçmiş Amerika liderinin cənazəsi yenidən katafalka yerləşdirilib və Karterlər malikanəsinə aparılıb. Korteji son mənzilə yola salmaq istəyən insanlar marşrut boyunca düzülüblər.