Yeni Azərbaycan Partiyası Nizami rayon təşkilatında “Qaraçimənin qan yaddaşı” adlı kitabın təqdimat mərasimi keçirilib.

“İki sahil” xəbər verir ki,  Azərbaycan Respublikasının Dövlət Himninin səslənməsi ilə başlayan tədbirdə Ulu Öndər Heydər Əliyevin, ölkəmizin ərazi bütövlüyü və suverenliyi uğrunda mübarizədə canlarını qurban vermiş şəhidlərimizin, eləcə də dekabrın 25-də təyyarə qəzası zamanı həlak olmuş vətəndaşlarımızın əziz xatirəsi bir dəqiqəlik sükutla yad edilib.

Kitabın müəllifi fizika-riyaziyyat elmləri üzrə fəlsəfə doktoru Nazim Qasımov diqqətə çatdırıb ki, kitab iki hissədən ibarətdir. Məlumat verib ki, kitabda azərbaycanlıların deportasiyası tarixi, Azərbaycana dair müxtəlif dövrlərin xəritələri, ərazi bütövlüyümüzün və suverenliyin bərpası prosesi, eləcə də Qərbi Azərbaycanın Qafan bölgəsinin, o cümlədən Qaraçimən kəndinin tarixi, ziyalıları və başqa informasiyalar yer alıb.

Çıxış edən Azərbaycan Respublikası Milli Məclisinin deputatı, Qərbi Azərbaycan İcmasının sədri Əziz Ələkbərli, AMEA-nın Riyaziyyat və Mexanika İnstitutunun direktoru, Yeni Azərbaycan Partiyasının Veteranlar Şurasının üzvü Misir Mərdanov, Nizami Rayon İcra Hakimiyyəti başçısının müavini İldırım Mehdiyev, Yeni Azərbaycan Partiyası Nizami rayon təşkilatının sədri Ramil Vəlibəyov çıxış edərək qeyd ediblər ki, Nazim Qasımovun müəllifi olduğu “Qaraçimənin qan yaddaşı” adlı kitab Qərbi Azərbaycan ilə bağlı cəmiyyətimizin siyasi-ideoloji dünyagörüşünə töhfədir.

Tədbirin sonunda iştirakçılara müəllifin imzası ilə kitab təqdim edilib.